Tata Sierra : ఏకంగా నాలుగు ఇంజిన్ ఆప్షన్లతో..క్రెటాని ఢీ కొట్టేందుకు మొనగాడిని దింపుతున్న టాటా.

Tata Sierra : టాటా మోటార్స్ సంస్థ 2030 ఆర్థిక సంవత్సరం నాటికి ఏడు కొత్త వాహనాలను విడుదల చేయనున్నట్లు ప్రకటించింది. ఈ ప్రణాళికలో మొదటిది, ఎంతో మంది ఆసక్తిగా ఎదురు చూస్తున్నది పాతకాలంలో పాపులర్ అయిన సియెర్రా కారు లేటెస్ట్ వెర్షన్. కొత్త 2025 టాటా సియెర్రా గురించి మార్కెట్‌లో ఇప్పటికే చాలా చర్చ జరుగుతోంది. దీంతో వినియోగదారుల్లో ఈ మోడల్ పట్ల ఉత్సాహం పెరిగింది. ఇది మీడియం రేంజ్ ఎస్‌యూవీ సెగ్మెంట్లో హ్యుందాయ్ క్రెటా, మారుతి విక్టోరిస్, కియా సెల్టోస్ వంటి కార్లతో పోటీ పడనుంది.

టాటా సియెర్రా కోసం సంస్థ మల్టీ-పవర్‌ట్రైన్ వ్యూహాన్ని అనుసరించబోతోంది. అంటే, ఈ కారును ఏకంగా నాలుగు ఇంజిన్ ఎంపికలతో మార్కెట్‌లోకి తీసుకురానున్నారు. అవి పెట్రోల్ , పెట్రోల్ (ట‌ర్బోచార్జ్డ్), డీజిల్, ఎలక్ట్రిక్ (ఈవీ).

సియెర్రా ఐసీఈ (పెట్రోల్, డీజిల్), ఎలక్ట్రిక్ వేరియంట్ల అధికారిక విడుదల తేదీని టాటా మోటార్స్ ఇంకా ప్రకటించలేదు. ఐసీఈ మోడల్ నవంబర్ 2025లో అమ్మకాలకు రావచ్చు.

సియెర్రా పెట్రోల్/డీజిల్ ఇంజిన్ వివరాలు పెట్రోల్ ఇంజిన్: ప్రారంభంలో సియెర్రాను కొత్త 1.5-లీటర్ సాధారణ పెట్రోల్ ఇంజిన్‌తో విడుదల చేయనున్నట్లు మీడియా నివేదికలు చెబుతున్నాయి. ఇది ఎంట్రీ-లెవల్ వేరియంట్లలో లభిస్తుంది, తద్వారా టాటా ఈ ఎస్‌యూవీని తక్కువ ప్రారంభ ధరతో అందించగలుగుతుంది. అధిక మోడల్స్‌లో 1.5-లీటర్ టీజీడీఐ డైరెక్ట్ ఇంజెక్షన్ టర్బో పెట్రోల్ ఇంజిన్ ఉంటుంది. ఈ ఇంజిన్ 5,000 ఆర్‌పీఎం వద్ద 170 బీహెచ్‌పీ పవర్, 2,000 ఆర్‌పీఎం నుండి 3,500 ఆర్‌పీఎం మధ్య 280 ఎన్ఎం టార్క్‌ను ఉత్పత్తి చేస్తుంది. ఈ రెండు పెట్రోల్ ఇంజిన్లు మాన్యువల్, ఆటోమేటిక్ గేర్‌బాక్స్ ఆప్షన్లతో లభిస్తాయి.

డీజిల్ ఇంజిన్: సియెర్రా డీజిల్ వేరియంట్‌లో 2.0 లీటర్ క్రయోటెక్ ఇంజిన్ ఉండే అవకాశం ఉంది. ఇది 6-స్పీడ్ మాన్యువల్ లేదా 6-స్పీడ్ ఆటోమేటిక్ ట్రాన్స్‌మిషన్‌తో వస్తుంది. ఈ డీజిల్ ఇంజిన్ 170 బీహెచ్‌పీ పవర్, 350 ఎన్ఎం టార్క్‌ను ఉత్పత్తి చేస్తుంది.

సియెర్రా ఈవీ పవర్ ట్రైన్ సియెర్రా ఎలక్ట్రిక్ వేరియంట్‌లో హారియర్ ఈవీ నుంచి తీసుకున్న 65kWh, 75kWh బ్యాటరీ ప్యాక్‌లు ఉండే అవకాశం ఉంది. ముఖ్యంగా, 75kWh ప్యాక్ QWD, AWD వేరియంట్‌ల కోసం కేటాయించవచ్చు. ఈ ఎస్‌యూవీలో ఏడబ్ల్యూడీ సిస్టమ్ ఉండే అవకాశం ఉంది. ఇది పూర్తిగా ఛార్జ్ అయిన తర్వాత 500 కిలోమీటర్ల కంటే ఎక్కువ డ్రైవింగ్ రేంజ్‌ను అందించగలదని అంచనా.