SIP Planning : SIPతో కోటీశ్వరులు అయ్యే సాలిడ్ ఫార్ములా..ఎంత పెట్టుబడి పెట్టాలో తెలుసా ?

SIP Planning : కోటీశ్వరులు కావాలని అందరూ అనుకుంటారు. సరైన ప్రణాళిక, ఓపిక, క్రమం తప్పకుండా పెట్టుబడి పెడితే, జీతంపై ఆధారపడేవారు లేదా మధ్యతరగతి వారు కూడా ఈ లక్ష్యాన్ని సులభంగా చేరుకోవచ్చు. దీనికి అత్యంత ముఖ్యమైన విషయం ఏమిటంటే.. పెట్టుబడిని వీలైనంత త్వరగా ప్రారంభించి, దానిని ఎక్కువ కాలం కొనసాగించడం. ఈ ప్రయాణాన్ని సులభతరం చేసే మార్గం సిస్టమాటిక్ ఇన్వెస్ట్‌మెంట్ ప్లాన్ (SIP). SIPలో పెద్ద మొత్తంలో డబ్బు ఒకేసారి పెట్టాల్సిన అవసరం లేదు. ప్రతి నెలా ఒక నిర్ణీత మొత్తాన్ని పెట్టుబడి పెట్టడం ద్వారా, కాలక్రమేణా భారీ మొత్తాన్ని పోగు చేయవచ్చు.

SIP లో ఉన్న అతిపెద్ద ప్రయోజనం కాంపౌండింగ్ (చక్రవడ్డీ). ఇందులో మీరు పెట్టిన అసలుపై మాత్రమే కాక, అంతకు ముందు వచ్చిన లాభంపై కూడా లాభం వస్తుంది. దీని వల్ల కాలక్రమేణా మీ డబ్బు వేగంగా పెరుగుతుంది. అంతేకాకుండా స్టాక్ మార్కెట్లలో ఉండే హెచ్చుతగ్గుల ప్రభావం కూడా ఈ SIPలో పెట్టుబడి పెట్టడం వల్ల సగటున తగ్గుతుంది. దీర్ఘకాలిక పెట్టుబడులకు ఇది చాలా మంచి పద్ధతి.

నెలకు రూ.30,000 SIP తో ఎంత అవుతుంది?

కోటీశ్వరులు కావడానికి ఎంత పెట్టుబడి పెట్టాలి, ఎంత కాలం వేచి ఉండాలి అనేదానిపై ఒక అంచనా వేసి చూద్దాం. మీరు ప్రతి నెలా రూ.30,000 SIP ప్రారంభించి, సగటున 12% వార్షిక రాబడిని పొందుతారని అనుకుంటే, 8 సంవత్సరాల తర్వాత మీ పరిస్థితి ఇలా ఉంటుంది. మొత్తం పెట్టుబడి దాదాపు రూ.28.8 లక్షలు అవుతుంది. అంచనా వేసిన రాబడితో మొత్తం ఫండ్ సుమారు రూ.48 లక్షలు అవుతాయి. అంటే 8 ఏళ్లలో మీ డబ్బు దాదాపు రెట్టింపు అవుతుంది. కానీ కోటి రూపాయల లక్ష్యాన్ని చేరుకోవాలంటే ఈ మొత్తం సరిపోదు.

13 ఏళ్ల SIPతో 1 కోటి పక్కా!

కోటి రూపాయల లక్ష్యాన్ని చేరుకోవడానికి పెట్టుబడి మొత్తాన్ని పెంచాలి లేదా సమయాన్ని పెంచాలి. SIP నిజమైన ప్రభావం అంటే కాంపౌండింగ్ మ్యాజిక్, ఎక్కువ కాలం (10-13 ఏళ్లు) పెట్టుబడి కొనసాగించినప్పుడే కనిపిస్తుంది.

కోటి రూపాయల లక్ష్యం (13 ఏళ్లలో) చేరాలంటే మీరు అదే రూ.30,000 నెలవారీ SIP ను 13 సంవత్సరాల పాటు కొనసాగిస్తే మొత్తం పెట్టుబడి దాదాపు రూ.46.8 లక్షలు. అంచనా వేసిన రాబడి సుమారు రూ.66 లక్షలు. 13 ఏళ్ల తర్వాత మొత్తం విలువ రూ.1.12 కోట్లకు పైగా అవుతుంది. ఈ విధంగా క్రమశిక్షణతో కూడిన దీర్ఘకాలిక పెట్టుబడి ద్వారా మీరు కోటీశ్వరులు కావాలనే లక్ష్యాన్ని చేరుకోవచ్చు.

స్టెప్-అప్ SIP తో మరింత వేగంగా లక్ష్యం

మీ జీతం ప్రతి సంవత్సరం పెరుగుతుంటే మీ SIP లో కూడా ప్రతి సంవత్సరం కొంత మొత్తాన్ని పెంచడం (స్టెప్-అప్ SIP) చాలా తెలివైన ఆలోచన. దీని వల్ల లక్ష్యాన్ని ఇంకా త్వరగా చేరుకోవచ్చు.

ఉదాహరణకు (10 ఏళ్లలో): మీరు రూ.30,000తో మొదలుపెట్టి, ప్రతి సంవత్సరం మీ SIP మొత్తాన్ని 10 శాతం పెంచుతూ పోతే, 12% రాబడితో దాదాపు 10 ఏళ్లలోనే మీరు కోటి రూపాయల ఫండ్‌ను చేరుకునే అవకాశం ఉంది.