Third Party Insurance : బైక్, కారు ఉన్నాయా? థర్డ్ పార్టీ ఇన్సూరెన్స్ లేకపోతే జేబు ఖాళీ అవ్వడం ఖాయం.

Third Party Insurance : భారతదేశంలో రోడ్డుపై వాహనం నడపాలంటే ఖచ్చితంగా ఉండాల్సింది డ్రైవింగ్ లైసెన్స్ మాత్రమే కాదు, థర్డ్ పార్టీ ఇన్సూరెన్స్ కూడా. దీనినే సాంకేతిక భాషలో యాక్ట్-ఓన్లీ ఇన్సూరెన్స్ అని పిలుస్తారు. అసలు ఈ ఇన్సూరెన్స్‌లో ఫస్ట్ పార్టీ, సెకండ్ పార్టీ, థర్డ్ పార్టీ అంటే ఎవరో మీకు తెలుసా? ఇన్సూరెన్స్ పాలసీ కొనే మీరు ఫస్ట్ పార్టీ అయితే, ఇన్సూరెన్స్ ఇచ్చే కంపెనీ సెకండ్ పార్టీ అవుతుంది. మీ వాహనం వల్ల ప్రమాదవశాత్తూ ఎవరైతే నష్టపోతారో వారు థర్డ్ పార్టీ అన్నమాట. మోటార్ వాహనాల చట్టం ప్రకారం ఈ బీమా లేకపోతే భారీ జరిమానాలు చెల్లించాల్సి ఉంటుంది.

థర్డ్ పార్టీ ఇన్సూరెన్స్ వల్ల కలిగే ప్రయోజనాలు

ఈ ఇన్సూరెన్స్ వల్ల కలిగే అతిపెద్ద లాభం ఆర్థిక భద్రత. రోడ్డుపై వెళ్లేటప్పుడు అనుకోకుండా మీ వాహనం వల్ల ఎదుటి వ్యక్తికి గాయాలైనా లేదా వారి ఆస్తికి (ఉదాహరణకు కారు లేదా బైక్) నష్టం వాటిల్లితే, ఆ నష్టపరిహారాన్ని ఇన్సూరెన్స్ కంపెనీ చెల్లిస్తుంది. దీనివల్ల మీపై ఒక్క రూపాయి భారం కూడా పడదు. అంతేకాకుండా, ఇది చట్టబద్ధంగా తప్పనిసరి కాబట్టి ట్రాఫిక్ పోలీసులు చలాన్లు వేసే అవకాశం ఉండదు. అన్నింటికంటే ముఖ్యంగా, దీని ప్రీమియం ధరలు చాలా తక్కువగా ఉంటాయి, కాబట్టి సామాన్యులు కూడా సులభంగా కొనుగోలు చేయవచ్చు.

ఈ పరిస్థితుల్లో నష్టపరిహారం రాదు.. జాగ్రత్త

బీమా పాలసీ ఉన్నప్పటికీ, కొన్ని సందర్భాల్లో కంపెనీలు నష్టపరిహారం ఇవ్వడానికి నిరాకరిస్తాయి. అర్హమ్ సెక్యూర్ బ్రాంచ్ మేనేజర్ సుశీల్ కుమార్ తెలిపిన వివరాల ప్రకారం.. వాహనం నడిపే వ్యక్తి మద్యం సేవించి ప్రమాదం చేసినా, లేదా డ్రైవింగ్ చేసే వ్యక్తికి సరైన లైసెన్స్ లేకపోయినా ఇన్సూరెన్స్ వర్తించదు. అలాగే, మైనర్లు (చిన్నపిల్లలు) వాహనం నడిపి ప్రమాదం చేస్తే కూడా కంపెనీ ఒక్క పైసా ఇవ్వదు. కాబట్టి ఇన్సూరెన్స్ ఉంది కదా అని నిర్లక్ష్యంగా ఉండకూడదు.

థర్డ్ పార్టీ ఇన్సూరెన్స్ అనేది కేవలం ఎదుటివారి నష్టాన్ని పూడ్చడానికి మాత్రమేనని గుర్తుంచుకోవాలి. ఈ పాలసీలో మీ వాహనానికి జరిగే డ్యామేజీకి ఎలాంటి కవరేజీ లభించదు. ఒకవేళ మీ కారు లేదా బైక్‌కు కూడా బీమా రక్షణ కావాలనుకుంటే మీరు కాంప్రహెన్సివ్ ఇన్సూరెన్స్ తీసుకోవాల్సి ఉంటుంది. కాబట్టి పాలసీ తీసుకునేటప్పుడు దాని పరిమితులను సరిగ్గా అర్థం చేసుకోవడం చాలా ముఖ్యం.