Best Selling SUVs : క్రెటా-స్కార్పియోల డామినేషన్‌కు చెక్..టాప్ 10లో అత్యధికంగా అమ్ముడైన ఎస్‌యూవీలు ఇవే.

Best Selling SUVs : భారతీయ ఆటోమొబైల్ పరిశ్రమ 2025 నవంబర్‌లో గణనీయమైన వృద్ధిని నమోదు చేసింది. గత నెలలో దేశవ్యాప్తంగా మొత్తం 4,17,495 ప్యాసింజర్ వాహనాలు అమ్ముడయ్యాయి. ఇది నవంబర్ 2024లో అమ్ముడైన 3,51,592 యూనిట్లతో పోలిస్తే, ఏకంగా 18.7% వృద్ధిని సూచిస్తోంది. ఈ అమ్మకాల పెరుగుదలలో ఎస్‌యూవీ విభాగం ప్రధాన పాత్ర పోషించింది.

ఈ అమ్మకాల వృద్ధిలో ముఖ్యంగా ఎస్‌యూవీల విభాగంలో టాటా మోటార్స్ అగ్రస్థానంలో నిలిచి తిరుగులేని ఆధిపత్యాన్ని ప్రదర్శించింది. టాటా నెక్సాన్ 22,434 యూనిట్ల అమ్మకాలతో అత్యధికంగా అమ్ముడైన ఎస్‌యూవీగా నిలిచింది. ఇది గత సంవత్సరం కంటే 46% వృద్ధిని చూపించింది. రెండో స్థానంలో కూడా టాటా మైక్రో ఎస్‌యూవీ టాటా పంచ్ ఉంది. ఇది 18,753 యూనిట్లను విక్రయించింది. టాటా నెక్సాన్, పంచ్ కలయికతో, టాటా మోటార్స్, హ్యుందాయ్ క్రెటా, మహీంద్రా స్కార్పియో వంటి బలమైన పోటీదారులను కూడా సులభంగా వెనక్కి నెట్టింది.

టాప్ 10 జాబితాలో ఇతర ప్రముఖ మోడల్స్ కూడా మంచి అమ్మకాలను నమోదు చేశాయి. హ్యుందాయ్ క్రెటా 17,344 యూనిట్ల అమ్మకాలతో మూడో స్థానానికి పరిమితమైంది. మహీంద్రా స్కార్పియో 15,616 యూనిట్లు అమ్ముడై 23% వృద్ధిని సాధించింది. మారుతి సుజుకికి చెందిన ఫ్రాంక్స్, విటారా బ్రెజా, విక్టోరిస్ వరుసగా ఐదు, ఆరు, ఏడు స్థానాల్లో నిలిచాయి. కియా సోనెట్ 30% వృద్ధిని నమోదు చేయగా, హ్యుందాయ్ వెన్యూ, మారుతి గ్రాండ్ విటారా కూడా టాప్ 10 జాబితాలో స్థానం పొందాయి.

అమ్మకాలలో దూసుకుపోతున్న టాటా మోటార్స్, ఈ విజయాన్ని కొనసాగించడానికి త్వరలో టాటా పంచ్ ఫేస్‌లిఫ్ట్ అప్‌డేట్‌ను తీసుకురాబోతోంది. ఈ అప్‌డేటెడ్ మైక్రో-ఎస్‌యూవీ టెస్ట్ మోడల్‌కు సంబంధించిన కొత్త చిత్రాలు ఇప్పటికే మీడియాలో వైరల్ అయ్యాయి. 2026 ప్రారంభంలో ఈ మోడల్‌ను అధికారికంగా విడుదల చేసేందుకు టాటా సిద్ధమవుతోంది.