Crude Oil : చమురు కంపెనీలకు లాభాల పంట..అయినా పెట్రోల్ డీజిల్ ధరలు ఎందుకు తగ్గట్లేదు ?

Crude Oil : అంతర్జాతీయ మార్కెట్‌లో ముడి చమురు ధరలు తగ్గుముఖం పట్టాయి. దీనివల్ల చమురు విక్రయించే కంపెనీలకు భారీ లాభాలు వస్తున్నాయి. అయినప్పటికీ దేశంలో పెట్రోల్, డీజిల్ ధరలు మాత్రం తగ్గడం లేదు. ఒకవైపు కంపెనీల ఆదాయం అమాంతం పెరుగుతుంటే, మరోవైపు సామాన్య ప్రజలు ఈ ధరల స్థిరత్వం కారణంగా నిత్యావసర వస్తువుల ధరల పెరుగుదల భారాన్ని మోస్తున్నారు.

క్రెడిట్ రేటింగ్ ఇచ్చే సంస్థ అయిన క్రిసిల్ ఇటీవలి నివేదిక ప్రకారం.. ఈ ఆర్థిక సంవత్సరంలో చమురు కంపెనీల వ్యాపార లాభం 50% కంటే ఎక్కువ పెరిగి, ఒక బ్యారెల్‌పై సుమారు $18 నుంచి $20 డాలర్ల వరకు చేరుకునే అవకాశం ఉంది. ఇది కంపెనీలకు చరిత్రలో ఎన్నడూ లేని లాభం కానుంది. కానీ ఈ లాభం ప్రయోజనం ప్రజలకు చేరడం లేదు.

చమురు విక్రయించే కంపెనీల వ్యాపారం ప్రధానంగా శుద్ధి చేయడం, అమ్మకాల ద్వారా జరుగుతుంది. ముడి చమురును ఇంధనంగా మార్చినప్పుడు వారికి కొంత లాభం వస్తుంది. తయారుచేసిన ఇంధనాన్ని విక్రయించినప్పుడు మరో లాభం లభిస్తుంది. క్రిసిల్ నివేదిక ప్రకారం ఈ సంవత్సరం అమ్మకాల లాభంలో భారీ పెరుగుదల ఉంది. ఇది శుద్ధి లాభంలో వచ్చే స్వల్ప తగ్గుదలను సులభంగా భర్తీ చేయనుంది.

అంతర్జాతీయంగా చమురు ధరలు బ్యారెల్‌కు $65-$67 వద్ద స్థిరంగా ఉండటంతో కంపెనీలకు చౌకగా ముడిసరుకు దొరుకుతోంది. అయితే, దేశీయంగా అమ్మే ధరలను తగ్గించకుండా స్థిరంగా ఉంచడం వల్ల, అమ్మకాల లాభం ప్రతి బ్యారెల్‌కు $14 (లేదా సుమారు లీటర్‌కు రూ.8) దాకా పెరిగే అవకాశం ఉంది. ఈ లాభం వల్లనే కంపెనీల మొత్తం ఆదాయం అమాంతం పెరుగుతోంది.

చమురు కంపెనీల లాభాలు ఇంత భారీగా పెరగడానికి ముఖ్య కారణం.. వారు గతంలో జరిగిన నష్టాలను పూడ్చుకోవడానికి ప్రయత్నించడం. గత 5 ఆర్థిక సంవత్సరాలలో ప్రపంచ రాజకీయ అస్థిరత కారణంగా ముడి చమురు ధరలు బాగా పెరిగినా, దేశంలో పెట్రోల్-డీజిల్ ధరలు మాత్రం పరిమితంగానే ఉన్నాయి.

ఉదాహరణకు 2023 ఆర్థిక సంవత్సరంలో ముడి చమురు ధర సగటున బ్యారెల్‌కు $93 ఉన్నప్పుడు, కంపెనీల వ్యాపార లాభం కేవలం $0.13 కి పడిపోయింది. అంటే వారికి ఆ సమయంలో భారీ నష్టం జరిగింది. కానీ ఇప్పుడు ముడి చమురు ధర తగ్గినప్పటికీ దేశీయ ధరలు స్థిరంగా ఉంచడం ద్వారా, కంపెనీలు తమ గత నష్టాలను పూడ్చుకుంటున్నారు. కంపెనీలు పాత నష్టాలను భర్తీ చేసుకోవడంతో పాటు, భవిష్యత్తులో చేయబోయే భారీ పెట్టుబడుల కోసం కూడా డబ్బును పోగు చేసుకుంటున్నాయి.

ఈ ఏడాది బలమైన లాభాల కారణంగా కంపెనీల మొత్తం నగదు నిల్వ గత ఏడాది రూ.55,000 కోట్ల నుంచి ఈ ఏడాది రూ.75,000-80,000 కోట్ల వరకు పెరిగే అవకాశం ఉంది. ఈ నిధులతో కంపెనీలు తమ ప్రస్తుత ప్లాంట్‌ల సామర్థ్యాన్ని పెంచడానికి రూ.90,000 కోట్ల భారీ ఖర్చు చేయాలని ప్రణాళికలు వేస్తున్నాయి. ఈ మెరుగైన ఆదాయం వల్ల బయటి అప్పులపై ఆధారపడటం తగ్గి, వారి ఆర్థిక స్థితి మరింత మెరుగుపడుతుంది.