Ultraviolette X47 : ప్రపంచంలోనే మొట్టమొదటి రాడార్ ఫీచర్ బైక్ డెలివరీలు షురూ.. ధర ఎంతో తెలుసా ?
Ultraviolette X47 : ప్రపంచంలోనే మొట్టమొదటి రాడార్ ఫీచర్ కలిగిన ఎలక్ట్రిక్ బైక్ డెలివరీలు ప్రారంభమయ్యాయి. బెంగళూరుకు చెందిన ప్రముఖ ఎలక్ట్రిక్ వాహన తయారీ సంస్థ అల్ట్రావయోలెట్, తన కొత్త ఎలక్ట్రిక్ క్రాసోవర్ మోడల్ అయిన ఎక్స్47 డెలివరీలను అధికారికంగా మొదలుపెట్టింది. అద్భుతమైన పర్ఫామెన్స్ గల F77 మోటార్‌సైకిల్‌తో ఇప్పటికే పేరుగాంచిన ఈ సంస్థ, X47 ద్వారా మరో పెద్ద సెగ్మెంట్‌లోకి విస్తరిస్తోంది. భారత్‌లోనే డిజైన్ చేసి, అభివృద్ధి చేసిన ఈ బైక్‌కు, బుకింగ్‌లు ప్రారంభమైన తొలి 24 గంటల్లోనే 3,000లకు పైగా ఆర్డర్లు వచ్చాయి.
అల్ట్రావయోలెట్ కంపెనీ పూర్తిగా ఎలక్ట్రిక్ క్రాసోవర్ మోడల్ X47, భారతదేశంలోనే డిజైన్ చేయబడి, అభివృద్ధి చేయబడింది. దీని డెలివరీలు దేశంలోని కొన్ని నగరాల్లో అధికారికంగా మొదలయ్యాయి. ఈ బైక్‌కు కస్టమర్ల నుంచి అద్భుత స్పందన వచ్చింది. బుకింగ్‌లు ప్రారంభమైన మొదటి 24 గంటల్లోనే 3,000కు పైగా ఆర్డర్లు వచ్చాయి.
పెరుగుతున్న ఆర్డర్లను పూర్తి చేయడానికి, ఉత్పత్తిని దశలవారీగా పెంచుతున్నట్లు కంపెనీ తెలిపింది. కస్టమర్ల అనుభవాన్ని మెరుగుపరచడానికి, వేగవంతమైన డెలివరీ కోసం కంపెనీ ఒక నిర్దిష్ట వ్యూహంతో ముందుకు సాగుతోంది. అల్ట్రావయోలెట్ X47 క్రాసోవర్ బైక్ మొత్తం నాలుగు విభిన్న వేరియంట్లలో లభిస్తుంది. అవి ఒరిజినల్, ఒరిజినల్+, రికాన్, రికాన్+. వీటి ఎక్స్-షోరూమ్ ధరలు రూ.2.49 లక్షల నుంచి రూ.3.99 లక్షల మధ్య ఉన్నాయి. ఒరిజినల్ వేరియంట్లలో 7.1 kWh బ్యాటరీ ప్యాక్ ఉంటుంది, అయితే రికాన్ వేరియంట్లలో పెద్ద 10.3 kWh యూనిట్ ఇచ్చారు.
X47 బైక్ డిజైన్ దీనికి పవర్ఫుల్ లుక్ ఇస్తుంది. దీని బాడీ వర్క్, విశాలమైన హ్యాండిల్‌బార్ రోడ్డుపై ప్రత్యేక ఆకర్షణగా నిలుస్తాయి. ఈ బైక్ కాస్ట్-అల్యూమినియం సబ్-ఫ్రేమ్, అప్‌డేటెడ్ స్టీరింగ్ జామెట్రీని కలిగి ఉంది. ఇది F77 మోడల్ నుంచి ప్రేరణ పొందినప్పటికీ, X47 బైక్‌కు ప్రత్యేక గుర్తింపునిస్తుంది. దాదాపు 200ఎంఎం గ్రౌండ్ క్లియరెన్స్ ఉండటం వలన ఇది గుంతలు పడిన రోడ్లు, కొద్దిపాటి కఠినమైన మార్గాలకు కూడా అనువుగా ఉంటుంది.
X47 బైక్ సింక్రోనస్ ఎలక్ట్రిక్ మోటారుతో పనిచేస్తుంది. చిన్న 7.1 kWh బ్యాటరీ 211 కి.మీ. రేంజ్‌ను ఇస్తుంది. పెద్ద 10.3 kWh బ్యాటరీతో రేంజ్ ఏకంగా 323 కి.మీ.కు పెరుగుతుంది. టాప్-స్పెక్ Recon+ వేరియంట్ సుమారు 30 kW శక్తిని, 610 Nm వీల్ టార్క్‌ను ఉత్పత్తి చేస్తుంది. ఈ బైక్ సుమారు 8 సెకన్లలో 0 నుంచి 100 కి.మీ/గం వేగాన్ని అందుకుంటుంది. దీని టాప్ స్పీడు 145 కి.మీ/గం. బైక్ ఇరువైపులా 170 mm సస్పెన్షన్ ట్రావెల్‌ను కలిగి ఉంది. ఇందులో ఇంట్లో ఉపయోగం కోసం 1.6 kW ఆన్‌బోర్డ్ ఛార్జర్ కూడా ఉంది. దీనికి మల్టీ-లెవల్ ట్రాక్షన్ కంట్రోల్, స్విచబుల్ డ్యూయల్-ఛానల్ ఏబీఎస్, హిల్-హోల్డ్ అసిస్టెన్స్, తొమ్మిది-స్టెప్ రీజెనరేటివ్ బ్రేకింగ్ వంటి ఫీచర్లు ఈ బైక్‌లో ఉన్నాయి. బైక్‌లో గ్లైడ్, కాంబాట్, బాలిస్టిక్ అనే మూడు రైడింగ్ మోడ్స్ ఉన్నాయి. ఇవి రైడర్ అవసరాన్ని బట్టి పవర్ డెలివరీ, థ్రాటిల్ రెస్పాన్స్, రీజెనరేషన్ ఇంటెన్సిటీని మారుస్తాయి.