Yamaha : ఈవీ మార్కెట్‌లోకి యమహా ఎంట్రీ.. 160 కి.మీ రేంజ్‌తో రెండు స్టైలిష్ ఎలక్ట్రిక్ స్కూటర్లు లాంచ్.
Yamaha : భారతీయ ఎలక్ట్రిక్ టూ-వీలర్ మార్కెట్‌లో అడుగు పెట్టేందుకు యమహా రెడీ అవుతుంది. తన 70వ వార్షికోత్సవం సందర్భంగా కంపెనీ ముంబైలో రెండు కొత్త, స్టైలిష్ ఎలక్ట్రిక్ స్కూటర్లను ఆవిష్కరించింది. యమహా ఏరోక్స్ ఈ, యమహా EC-06. ఈ రెండు ఈ-స్కూటర్లు 2026 చివరి నాటికి భారతదేశంలో లాంచ్ కానున్నాయి. ఇవి యమహా 10 కొత్త మోడళ్ల విస్తరణ ప్రణాళికలో భాగం. అద్భుతమైన డిజైన్, గరిష్టంగా 160 కి.మీ రేంజ్ అందించే ఈ బైక్‌ల పూర్తి వివరాలు, స్పెసిఫికేషన్ల గురించి తెలుసుకుందాం. ప్రపంచంలోని అతిపెద్ద టూ-వీలర్ మార్కెట్లలో ఒకటైన భారతదేశంలో ఎలక్ట్రిక్ వాహనాల విభాగంలో అడుగు పెట్టడానికి యమహా సిద్ధమైంది. ఈ రెండు మోడళ్లను భారత ప్రభుత్వం వికసిత్ భారత్ ప్రణాళికకు అనుగుణంగా అభివృద్ధి చేశారు. యమహా మొత్తం 10 కొత్త మోడళ్లను (8 పెట్రోల్ + 2 EV) విడుదల చేయాలని ప్లాన్ చేస్తోంది. ఈ రెండు EV స్కూటర్లు – యమహా ఏరోక్స్ E, యమహా EC-06 – 2026 చివరి నాటికి లాంచ్ అయ్యే అవకాశం ఉంది.
వీటిలో యమహా ఏరోక్స్ E ని ప్రత్యేకంగా భారత మార్కెట్ అవసరాలకు అనుగుణంగా డిజైన్ చేశారు. దీని ధరను 2026 మొదటి త్రైమాసికంలో ప్రకటించే అవకాశం ఉంది. లాంచ్‌కు ముందే కంపెనీ భారతదేశంలో ఛార్జింగ్ మౌలిక సదుపాయాలను, ట్రైనింగ్ కార్యక్రమాలను ఏర్పాటు చేయనుంది. ఏరోక్స్ E అనేది ఇప్పటికే ఉన్న పెట్రోల్ ఏరోక్స్ మోడల్‌ను పోలి ఉండే పెర్ఫార్మెన్స్-ఫోకస్డ్ ఎలక్ట్రిక్ మ్యాక్సీ స్కూటర్. ఈ స్కూటర్ ఇన్ స్టంట్ టార్క్, స్మూత్ యాక్సిలరేషన్‌ అందించేలా రూపొందించారు. ఏరోక్స్ E లో రెండు రిమూవబుల్ 1.5 kWh బ్యాటరీ ప్యాక్‌లు (మొత్తం 3 kWh) ఉన్నాయి. ఇది 9.4 kW ఎలక్ట్రిక్ మోటారుకు శక్తిని అందిస్తుంది, ఇది 48 Nm టార్క్‌ను ఉత్పత్తి చేస్తుంది. ఒక్కసారి పూర్తిగా ఛార్జ్ చేస్తే ఈ స్కూటర్ 106 కిలోమీటర్ల వరకు రేంజ్ ఇస్తుంది.
యమహా EC-06, దాని ఫ్యూచరిస్టిక్ డిజైన్, మెరుగైన రేంజ్ తో యువ రైడర్‌లను లక్ష్యంగా చేసుకుంది. ఈ స్కూటర్‌లో స్టాక్డ్ LED హెడ్‌ల్యాంప్, షార్ప్ బాడీ లైన్స్‌తో కూడిన క్లీన్ లుక్ ఉంది. దీని అధిక సెంటర్ ఆఫ్ గ్రావిటీ, సౌకర్యవంతమైన రైడింగ్ పొజిషన్ దీనిని నడపడం సులభతరం చేస్తుంది. EC-06 లో 4 kWh ఫిక్స్‌డ్ బ్యాటరీ ఉంటుంది. ఇది 4.5 kW ఎలక్ట్రిక్ మోటారుకు పవర్ ఇస్తుంది (పీక్ పవర్ 6.7 kW). IDC (ఇండియన్ డ్రైవింగ్ సైకిల్) క్లెయిమ్ చేసిన దాని ప్రకారం.. ఈ స్కూటర్ ఒక్కసారి ఛార్జ్ చేస్తే 160 కిలోమీటర్ల రేంజ్ ఇస్తుంది. దీని టాప్ స్పీడ్ గంటకు 90 కిమీ వరకు ఉంటుంది. దీనిని సాధారణ హోమ్ ఛార్జర్‌తో దాదాపు 9 గంటల్లో పూర్తిగా ఛార్జ్ చేయవచ్చు.