Bullet Bike Theft : యూట్యూబ్‌ చూసి 16 బుల్లెట్‌ బైక్‌లు చోరి

యూట్యూబ్‌ చూసి 16 బుల్లెట్‌ బైక్‌లు చోరికి పాల్పడ్డారు. ఈ సంఘటనలో ఇద్దరు యువకులను పోలీసులు అరెస్టు చేశారు. వారిలో ఒకరు ఐటీ ఉద్యోగి కాగా, మరొకరు ఇంటర్ ఫెయిల్ అయిన విద్యార్థి. వీరు కర్ణాటకలోని బళ్లారికి చెందినవారు. వీరు మొదట యూట్యూబ్‌లో బుల్లెట్ బైక్‌లను ఎలా దొంగిలించాలి, లాక్ ఎలా పగలగొట్టాలి అనే వీడియోలు చూశారు. ఆ వీడియోల సహాయంతో, ఏకంగా 16 రాయల్ ఎన్‌ఫీల్డ్ బుల్లెట్ బైక్‌లను చోరీ చేశారు. ఈ దొంగతనం జరిగిన తర్వాత పోలీసులు రంగంలోకి దిగి, సీసీటీవీ ఫుటేజ్‌ల ఆధారంగా దర్యాప్తు ప్రారంభించారు. దీనిలో భాగంగా, వారికి ఈ ఇద్దరు యువకులపై అనుమానం వచ్చింది. పోలీసులు వారిని పట్టుకుని విచారించగా, వారు తాము బుల్లెట్ బైక్‌లను చోరీ చేసినట్లు ఒప్పుకున్నారు. పోలీసులు వారి నుంచి 16 బుల్లెట్ బైక్‌లను స్వాధీనం చేసుకున్నారు. వీటిలో 13 బెంగళూరులోని శివనగర్ పోలీస్ స్టేషన్ పరిధిలో మరియు 3 ఇతర ప్రాంతాల్లో చోరీ అయినట్లు తెలిసింది. వాటి విలువ దాదాపు రూ. 32 లక్షలు ఉంటుందని అంచనా. యూట్యూబ్ వంటి ప్లాట్‌ఫారమ్‌లలో ఇలాంటి అసాంఘిక కార్యకలాపాలను ప్రోత్సహించే వీడియోలు ఉండటంపై పోలీసులు ఆందోళన వ్యక్తం చేశారు. భవిష్యత్తులో ఇలాంటి సంఘటనలు జరగకుండా నిఘాను మరింత పెంచుతామని తెలిపారు.