Telangana : గచ్చిబౌలిలో ఈగల్ టీం 'డెకాయ్ ఆపరేషన్'
హైదరాబాద్ ఐటీ కారిడార్‌లోని గచ్చిబౌలి ప్రాంతంలో గంజాయి వినియోగంపై ఈగల్ టీమ్ ఉక్కుపాదం మోపింది. తాజాగా నిర్వహించిన డెకాయ్ ఆపరేషన్‌లో 14 మంది గంజాయి వినియోగదారులను పట్టుకున్నారు. ఈగల్ టీమ్ ఇటీవల మహారాష్ట్రకు చెందిన ఒక గంజాయి పెడ్లర్ సందీప్‌ను అదుపులోకి తీసుకుంది. సందీప్ గచ్చిబౌలిలోని ఒక ప్రాంతంలో క్రమం తప్పకుండా డ్రగ్స్ అమ్ముతున్నట్లు గుర్తించారు. అతడి మొబైల్‌లోని కాంటాక్ట్స్ ఆధారంగా పోలీసులు ఈ డెకాయ్ ఆపరేషన్ చేపట్టారు. సందీప్ డ్రగ్స్ విక్రయించేందుకు ఉపయోగించే "భాయ్ బచ్చా ఆగయా భాయ్" అనే వాట్సాప్ కోడ్‌తో పోలీసులు డ్రగ్స్ వినియోగదారులకు సందేశాలు పంపారు. గంజాయి కొనుగోలు చేయడానికి గచ్చిబౌలిలోని నిర్దిష్ట ప్రదేశానికి రావాలని వారికి సూచించారు. అనంతరం ఆ ప్రాంతంలో మఫ్టీలో ఉన్న ఈగల్ టీమ్ సిబ్బంది మాటు వేసి, గంజాయి కొనేందుకు వచ్చిన 14 మంది కస్టమర్లను అదుపులోకి తీసుకున్నారు. రెండు గంటల వ్యవధిలోనే 14 మంది వినియోగదారులు అక్కడికి రావడం గమనార్హం. పట్టుబడిన వారికి యూరిన్ టెస్టులు నిర్వహించగా, అందరికీ పాజిటివ్ అని తేలింది. వారిలో నలుగురు ఐటీ ఉద్యోగులు, ఒక విద్యార్థి, ఒక ప్రాపర్టీ మేనేజర్, ఒక ట్రావెల్ ఏజెన్సీ యజమాని ఉన్నారు. ఈ కేసులో ఒక జంట తమ 4 ఏళ్ల బిడ్డతో గంజాయి కొనడానికి వచ్చారు. భర్తకు పాజిటివ్ అని తేలింది. మరొక దంపతుల జంట కూడా గంజాయి కొనుగోలు చేయడానికి రాగా, వారిద్దరికీ పాజిటివ్ వచ్చింది. అరెస్టైన వారిని డీఅడిక్షన్ సెంటర్లకు తరలించారు. ప్రస్తుతం, సందీప్ ఫోన్‌లోని ఇతర కాంటాక్ట్స్‌ను ట్రేస్ చేయడానికి పోలీసులు ప్రయత్నిస్తున్నారు, తద్వారా ఈ డ్రగ్ నెట్‌వర్క్‌ను పూర్తిగా ఛేదించవచ్చు.