Rajkot game zone: . ప్రమాదంలో రాజ్‌కోట్ గేమ్ జోన్ సహ యజమాని ప్రకాష్ హిరాన్ మృతి
గేమ్ జోన్ తగలబడి దాదాపు పిల్లలతో సహా 27 మంది ప్రాణాలు కోల్పోయారు. దీంతో గుజరాత్ సహా దేశ వ్యాప్తంగా అందరూ దిగ్భ్రాంతి వ్యక్తం చేశారు. అయితే పలువురిని గుర్తుపట్టకపోవడంతో పోలీసులు డీఎన్‌ఏ టెస్టులు నిర్వహించారు. దీంతో పలువురి డీఎన్‌ఏ టెస్టులు రావడంతో కీలక విషయం బయటపడింది. రాజ్‌కోట్ గేమ్ జోన్ సహ యజమాని ప్రకాష్ హిరాన్ అగ్నిప్రమాదంలో అగ్నికి ఆహుతైనట్లుగా గుర్తించారు. ఈ విషయాన్ని అధికారులు నిర్ధారించారు.
రాజ్‌కోట్‌లోని టీఆర్‌పీ గేమ్ జోన్ యజమానులలో ఒకరైన ప్రకాష్ హిరాన్ గత వారం గేమింగ్ సెంటర్‌లోనే ఉన్నారు. అగ్నికీలలు చెలరేగి అగ్నిప్రమాదంలో మరణించినట్లు ధృవీకరించారు. ఈ దుర్ఘటనలో చిన్నారులు సహా 27 మంది ప్రాణాలు కోల్పోయారు. డీఎన్‌ఏ పరీక్షల ద్వారా ప్రకాష్ హిరాన్ ఎవరనే విషయాన్ని అధికారులు నిర్ధారించారు. సంఘటనా స్థలంలో లభించిన అవశేషాల నుంచి తీసిన నమూనాలు ప్రకాష్ తల్లి డీఎన్‌ఎతో సరిపోలడంతో అతని దురదృష్టవశాత్తు మరణించినట్లు నిర్ధారించారు.
ప్రకాష్ హిరాన్ అత్యంత లాభదాయకమైన TRP గేమ్ జోన్‌లో ప్రధాన వాటాదారు. అగ్నిప్రమాదం జరిగినప్పటి నుంచి CCTV ఫుటేజ్ సంఘటనా స్థలంలో ప్రకాష్‌ను గుర్తించారు. ప్రమాద సమయంలో అతను అక్కడే ఉన్నారనే సాక్ష్యాన్ని బలపరిచారు. ప్రకాష్ సోదరుడు జితేంద్ర హిరాన్ పోలీసులకు ఫిర్యాదు చేయడంతో ఈ ఘటన వెలుగులోకి వచ్చింది. అగ్నిప్రమాదం తర్వాత ప్రకాష్‌తో ఎటువంటి సంబంధాలు లేదని, అన్ని ఫోన్ నంబర్లు స్విచ్ ఆఫ్ చేయబడ్డాయని తెలిపారు. ఇక అగ్నిప్రమాదం జరిగిన ప్రదేశంలో ప్రకాష్ కారు కూడా అక్కడే ఉన్నట్లుగా గుర్తించారు.
గేమ్ జోన్‌లో జరిగిన అగ్నిప్రమాదానికి సంబంధించి హిరాన్‌తో సహా ఆరుగురిపై పోలీసులు కేసు నమోదు చేశారు. రేస్‌వే ఎంటర్‌ప్రైజెస్‌కు చెందిన ఐదుగురు భాగస్వాములతో కలిసి టీఆర్‌పీ గేమ్ జోన్‌ను నడిపిన ధవల్ కార్పొరేషన్ యాజమాన్యం ధవల్ ఠక్కర్‌ను గుజరాత్ పోలీసులు అరెస్టు చేశారు. ఈ కేసులో రేస్‌వే ఎంటర్‌ప్రైజెస్‌లో భాగస్వాములైన యువరాజ్‌సింగ్ సోలంకి, రాహుల్ రాథోడ్, గేమ్ జోన్ మేనేజర్ నితిన్ జైన్‌లను కూడా పోలీసులు అరెస్టు చేశారు.
నిందితుడు యువరాజ్‌ హరి సింగ్‌ సోలంకి పశ్చాత్తాపం లేకుండా ప్రవర్తించాడు. ‘ఇలాంటి ఘటనలు సాధారణంగా జరుగుతుంటాయి’ అని నవ్వుతూ వ్యాఖ్యానించడంపై స్థానిక కోర్టు సోమవారం ఆగ్రహం వ్యక్తం చేసింది. ఘటనపై విచారం వ్యక్తం చేస్తున్నట్టుగా కనిపిస్తూ కోర్టులోకి ప్రవేశించిన సోలంకి.. కొద్ది క్షణాల్లోనే నవ్వడం ప్రారంభించాడని, ఈ తరహా ఘటనలు జరుగుతుంటాయని వ్యాఖ్యానించారని పబ్లిక్‌ ప్రాసిక్యూటర్‌ తుషార్‌ గోకని పేర్కొన్నారు.
అగ్నిప్రమాద ఘటనలో అరెస్టు చేసిన సోలంకితో సహా ముగ్గురు నిందితులను పోలీసులు స్థానిక కోర్టులో ప్రవేశపెట్టారు. వీరిని న్యాయ స్థానం 14 రోజుల కస్టడీకి అప్పగించింది. దర్యాప్తునకు నిందితులు సహకరించడం లేదని, ఏ పత్రాల గురించి అడిగినా సమాధానాన్ని దాటవేస్తున్నారని, అవి మంటల్లో కాలిపోయాయని చెబుతున్నారని పబ్లిక్‌ ప్రాసిక్యూటర్‌ తుషార్‌ గోకని పేర్కొన్నారు.
