EPFO : ఈపీఎఫ్ఓ నిబంధనల్లో భారీ మార్పు? కనీస పెన్షన్‌ను 2.5 రెట్లు పెంచే అవకాశం.

EPFO : ఉద్యోగుల భవిష్య నిధి సంస్థ (EPFO) కీలక కమిటీ సమావేశం అక్టోబర్ 10, 11 తేదీల్లో బెంగళూరులో జరుగుతోంది. ఈ మీటింగ్‌లో ముఖ్యంగా, పెన్షన్ డబ్బులు పెంచడం గురించి చర్చిస్తారు. ప్రస్తుతం రూ. 1,000 ఉన్న కనీస పెన్షన్‌ను రూ. 2,500 వరకు పెంచాలని అనుకుంటున్నారు. ఈ నిర్ణయం వస్తే లక్షలాది మంది పెన్షనర్లకు చాలా సహాయం అవుతుంది.

2014 నుంచి ఈపీఎస్-95 కింద పెన్షన్ డబ్బులు రూ. 1,000 మాత్రమే ఉన్నాయి. కానీ, ఇప్పుడు ఖర్చులు చాలా పెరిగాయి. అందుకే, ఈ రూ. 1,000 సరిపోవడం లేదని ఉద్యోగ సంఘాలు చాలా కాలంగా అడుగుతున్నాయి. వారు రూ. 7,500 వరకు పెంచాలని కోరుతున్నా, బోర్డు మాత్రం రూ. 2,500 వరకు పెంచే ఆలోచనలో ఉన్నట్లు తెలుస్తోంది.

పెన్షన్ ఎంత వస్తుందనేది ఒక ప్రత్యేక ఫార్ములాతో లెక్కిస్తారు. మీరు చివరి 60 నెలల్లో తీసుకున్న సగటు జీతం (గరిష్టంగా రూ. 15,000), మీరు ఎన్ని సంవత్సరాలు పనిచేశారు (కనీసం 10ఏళ్లు పనిచేయాలి) అనే దానిపై ఆధారపడి ఉంటుంది. ఉదాహరణకు, మీరు 35 ఏళ్లు పనిచేస్తే, నెలకు గరిష్టంగా రూ. 7,500 వరకు పెన్షన్ అందవచ్చు. 58 ఏళ్లు వచ్చిన వారికి సాధారణంగా పెన్షన్ వస్తుంది.

ఈ మీటింగ్‌లో ఈపీఎఫ్ఓ 3.0 అనే కొత్త ప్రాజెక్ట్ గురించి కూడా చర్చిస్తారు. ఈ ప్రాజెక్ట్ ద్వారా ఈపీఎఫ్ఓ సంస్థను పూర్తిగా డిజిటల్‌గా మార్చేస్తారు. అప్పుడు, మీరు ఏటీఎం/యూపీఐ ద్వారా కూడా వెంటనే పీఎఫ్ డబ్బులు తీసుకోవచ్చు. అలాగే, క్లెయిమ్‌లను తక్షణమే పరిష్కరించడం, ఆన్‌లైన్‌లో చనిపోయిన వారి క్లెయిమ్‌లు సులభంగా సెటిల్ చేయడం వంటి సౌకర్యాలు వస్తాయి. ఈ పెద్ద మార్పును అమలు చేయడానికి ఇన్ఫోసిస్, టీసీఎస్ లాంటి పెద్ద కంపెనీలకు బాధ్యతలు అప్పగించారు.

కనీస పెన్షన్ పెంచడంతో పాటు, ఈ సమావేశంలో పెట్టుబడి రూల్స్, డిజిటల్ మార్పులు గురించి కూడా చర్చిస్తారు. ఈ నిర్ణయానికి ప్రభుత్వం ఆమోదం తప్పనిసరి. ప్రస్తుతం ఉన్న కష్టాలను చూస్తే, పెన్షన్ పెంచడం అవసరమని కార్మిక సంఘాలు అంటున్నాయి. అందుకే ఈ అక్టోబర్ 10-11 మీటింగ్‌లో కోట్లాది మందికి మంచి నిర్ణయం వస్తుందని అందరూ ఆశిస్తున్నారు.