Hexaware Lawsuit: అమెరికాలో భారతీయ ఐటీ కంపెనీలకు బిగ్ టెన్షన్.. హెగ్జావేర్ పై రూ.4వేల కోట్ల దావా.
Hexaware Lawsuit : భారతీయ ఐటీ కంపెనీలు ప్రస్తుతం ఒక పెద్ద మార్పు దశలో ఉన్నాయి. కేవలం ఔట్‌సోర్సింగ్ సేవలు అందించడం వరకే కాకుండా, ఇప్పుడు సొంతంగా సాఫ్ట్‌వేర్ ఉత్పత్తులు, ప్లాట్‌ఫారమ్‌లు, ఏఐ బేస్డ్ సొల్యూషన్స్ కూడా క్రియేట్ చేస్తున్నాయి. ఈ మార్పు మన కంపెనీలు కొత్త శిఖరాలకు చేరుకోవడానికి సంకేతం అయినప్పటికీ, ముఖ్యంగా అమెరికా వంటి కఠినమైన న్యాయ వ్యవస్థ ఉన్న మార్కెట్లలో మేధో సంపత్తికి సంబంధించిన కొత్త ప్రమాదాలు తెరపైకి వస్తున్నాయి.
ఇటీవల అమెరికాకు చెందిన నట్సాఫ్ట్, అప్‌డ్రాఫ్ట్ అనే రెండు కంపెనీలు, భారతదేశానికి చెందిన హెగ్జావేర్ టెక్నాలజీస్ పై ఏకంగా $500 మిలియన్లు (సుమారు రూ.4,000 కోట్లు) నష్టపరిహారం కోరుతూ దావా వేశాయి. హెగ్జావేర్ తమ సాఫ్ట్‌వేర్, టెక్నాలజీ అక్రమంగా ఉపయోగించుకుందని వారి ఆరోపణ. ఇది కేవలం ఒకే కేసు కాదని, భారతీయ కంపెనీలు ఎంత వేగంగా ఆవిష్కరణల వైపు అడుగులు వేస్తున్నాయో, అంతే వేగంగా చట్టపరమైన ప్రమాదాలు పెరుగుతున్నాయని ఈ కేసు స్పష్టం చేస్తోంది.
భారతీయ ఐటీ కంపెనీలకు ప్రపంచంలోనే అతిపెద్ద కస్టమర్ మార్కెట్ అమెరికా. కానీ అక్కడే వారికి అత్యధిక చట్టపరమైన రిస్క్ కూడా ఉంది. అమెరికా న్యాయ వ్యవస్థ చాలా కఠినంగా ఉంటుంది. ఒక కంపెనీపై పేటెంట్ లేదా సాఫ్ట్‌వేర్ అక్రమ వినియోగం ఆరోపణ రుజువైతే, కోట్ల డాలర్ల నష్టపరిహారం చెల్లించాల్సి వస్తుంది. అందుకే అమెరికాలో జరిగే చట్టపరమైన వివాదాలు భారతీయ కంపెనీలకు చాలా సున్నితమైనవి.. ప్రమాదకరమైనవిగా మారుతున్నాయి.
భారతీయ ఐటీ కంపెనీలు ఇప్పుడు సాఫ్ట్‌వేర్ లైసెన్సింగ్, కోడ్ యాజమాన్యం, ఏఐ టెక్నాలజీపై తమ సొంత హక్కును ప్రకటించడానికి ప్రయత్నిస్తున్నాయి. అయితే, పాత క్లయింట్‌లతో లేదా భాగస్వామ్యాలతో చేసుకున్న ఒప్పందాలు, లేదా ఓపెన్-సోర్స్ కోడ్ వినియోగం విషయంలో స్పష్టత లేకపోవడం వల్ల వివాదాలు తలెత్తుతున్నాయి. అమెరికాలో, కంపెనీలు వెంటనే కోర్టులో దావా వేస్తాయి. దీనివల్ల ప్రాజెక్టులపై ప్రభావం పడటమే కాకుండా, కంపెనీ విశ్వసనీయత కూడా ప్రమాదంలో పడుతుంది.
ఈ తరహా వివాదాల నుంచి తమను తాము కాపాడుకోవడానికి భారతీయ కంపెనీలు కొన్ని ముఖ్యమైన చర్యలు తీసుకోవాలని నిపుణులు సూచిస్తున్నారు.
డ్యూ డిలిజెన్స్ : చట్టపరమైన తనిఖీలను కంపెనీ ప్రక్రియలో తప్పనిసరి చేయాలి.
స్పష్టమైన కాంట్రాక్టులు: ఉద్యోగులు, కాంట్రాక్టర్లతో మేధో సంపత్తి యాజమాన్యంపై స్పష్టమైన ఒప్పందాలు చేసుకోవాలి.
సమగ్ర డాక్యుమెంటేషన్: తాము తయారు చేసే AI, సాఫ్ట్‌వేర్ ఉత్పత్తుల కోడ్ మరియు లైసెన్సింగ్‌ను పూర్తిగా, కచ్చితంగా డాక్యుమెంట్ చేయాలి.
టెక్నాలజీలో ముందుకు వెళ్లడం అంటే కేవలం ఆవిష్కరణలతోనే కాదు, చట్టపరమైన బాధ్యతలు, భద్రతా చర్యలతో కూడి ఉంటుందని స్పష్టమవుతోంది. హెగ్జావేర్ కేసు ఒక ఉదాహరణ మాత్రమే అయినప్పటికీ, ఇది మిగిలిన ఐటీ కంపెనీలకు ఒక పెద్ద పాఠం. భారతీయ ఐటీ సంస్థలు ప్రపంచం కోసం ఉత్పత్తులను తయారు చేయడం మొదలుపెట్టినందున, వారు రాసే ప్రతి ఒక్క కోడ్ లైన్ కూడా చట్టపరమైన రిస్క్ కావచ్చు అనే విషయాన్ని అర్థం చేసుకోవడం చాలా అవసరం.