ITR : ఐటీఆర్ గడువు మిస్సయ్యారా? తప్పులున్నాయా? అయితే ఇది తప్పకుండా తెలుసుకోవాల్సిందే.

ITR : చాలామంది ఆదాయపు పన్ను రిటర్న్ ఫైల్ చేసిన తర్వాత పని అయిపోయిందని అనుకుంటారు. కానీ ఆ ఐటీఆర్‎లో ఏదైనా తప్పు ఉంటే ఏం జరుగుతుందో ఎప్పుడైనా ఆలోచించారా? .. 2024-25 ఆర్థిక సంవత్సరం కోసం ఆడిట్ లేని ఐటీఆర్ దాఖలు చేయడానికి చివరి తేదీ సెప్టెంబర్ 16, 2025 అయినప్పటికీ, ఆదాయపు పన్ను శాఖ ఇంకా ఒక అవకాశం కల్పించింది. మీరు ఏదైనా తప్పు చేసి ఉంటే లేదా ఐటీఆర్ ఫైల్ చేయడం మర్చిపోయి ఉంటే డిసెంబర్ 31, 2025 వరకు సమయం ఉంది. ఈ తేదీలోగా మీరు మీ రిటర్న్‌లో తప్పులు సరిదిద్దుకోవచ్చు. ఫైల్ చేయకపోతే ఆలస్యంగా ఫైల్ చేయవచ్చు.

ఐటీఆర్ ఫైల్ చేసేటప్పుడు తొందరలో చిన్న చిన్న తప్పులు జరగడం సహజం. మీరు మీ ఆదాయ వనరు ఏదైనా నమోదు చేయడం మర్చిపోయి ఉండవచ్చు, లేదా పన్ను మినహాయింపు క్లెయిమ్ చేయడం మర్చిపోయి ఉండవచ్చు. కొన్నిసార్లు వ్యక్తిగత వివరాలు కూడా తప్పుగా నింపి ఉండొచ్చు. ఆదాయపు పన్ను చట్టం, 1961లోని సెక్షన్ 139(5) ప్రకారం.. ఆదాయ పన్ను శాఖ అలాంటి అన్ని తప్పులను సరిదిద్దడానికి అవకాశం ఇస్తుంది. దీనిని రివైజ్డ్ ఐటీఆర్ అంటారు.

దీనిని ఫైల్ చేయడం చాలా సులువు: ముందుగా ఆదాయపు పన్ను పోర్టల్‌లో లాగిన్ అవ్వండి. 'e-File' విభాగంలో 'Income Tax Return'కు వెళ్లి, 'File Income Tax Return' ఎంచుకుని సరైన అసెస్‌మెంట్ ఇయర్‌ను సెలక్ట్ చేసుకోవాలి. తప్పు సరిదిద్దడానికి సెక్షన్ 139(5) కింద 'Revised Return' ఆప్షన్ ఎంచుకోండి. ఇక్కడ మీ అసలు ఐటీఆర్ అక్నాలెడ్జ్‌మెంట్ నంబర్‌ను నింపి, తప్పులను సరిదిద్దుకోవాలి. ఒకవేళ మీరు సెప్టెంబర్ 16, 2025 గడువును కోల్పోయి ఉంటే ఆలస్యంగా రిటర్న్ దాఖలు చేయడానికి డిసెంబర్ 31, 2025 వరకు అవకాశం ఉంది. అయితే, ఫైన్ చెల్లించాల్సి ఉంటుంది. వార్షిక ఆదాయం రూ.5 లక్షల కంటే ఎక్కువ ఉన్న వారికి రూ.5,000 ఫైన్, రూ.5లక్షల కంటే తక్కువ ఆదాయం ఉన్న వారికి రూ.1,000 పెనాల్టీ ఉంటుంది. దీంతో పాటు చెల్లించాల్సిన పన్నుపై నెలకు 1% వడ్డీ కూడా చెల్లించాలి.

ఒకవేళ మీరు డిసెంబర్ 31 తేదీని కూడా కోల్పోతే, మీకు చివరి ఆప్షన్ గా అప్‌డేటెడ్ రిటర్న్ లేదా ITR-U ఉంటుంది. దీనిని సెక్షన్ 139(8A) కింద దాఖలు చేయవచ్చు. కానీ ఈ ఆప్షన్ కేవలం పన్ను బాధ్యతను పెంచడానికి మాత్రమే, అంటే మీరు దీని ద్వారా కొత్త మినహాయింపులను క్లెయిమ్ చేసి మీ పన్ను బాధ్యతను తగ్గించలేరు. ఇందులో పెనాల్టీ కూడా చాలా ఎక్కువ ఉంటుంది.. ఇది దాఖలు చేసే సమయంపై ఆధారపడి ఉంటుంది. ఫైల్ చేయని సమయం 12 నెలల లోపు అయితే 25% అదనపు పెనాల్టీ, 12 నుండి 24 నెలల మధ్య అయితే 50%, 24 నుండి 36 నెలల మధ్య అయితే 60%, 36 నుండి 48 నెలల మధ్య అయితే 70% పెనాల్టీ విధిస్తారు. ఐటీఆర్ ఫైల్ చేయకపోవడం లేదా తప్పు సమాచారం ఇవ్వడం మీకు పెద్ద సమస్యలను సృష్టిస్తుంది. డిపార్ట్‌మెంట్ నోటీసులు పంపవచ్చు, రిఫండ్‌లు నిలిచిపోవచ్చు. పన్ను మొత్తం రూ.25 లక్షల కంటే ఎక్కువ అయితే 6 నెలల నుండి 7 సంవత్సరాల వరకు జైలు శిక్ష కూడా పడవచ్చు.