8th Pay Commission : ఉద్యోగులకు హోలీ ముందే దీపావళి.. 8వ వేతన సంఘంపై కీలక అప్‌డేట్.

8th Pay Commission : కోట్లాది మంది కేంద్ర ప్రభుత్వ ఉద్యోగులు, పెన్షనర్లకు హోలీ పండగ కంటే ముందే కేంద్రం తీపి కబురు అందించేలా కనిపిస్తోంది. ఎంతో కాలంగా ఎదురుచూస్తున్న 8వ వేతన సంఘం పనులు వేగవంతం కావడంతో పాటు, కొత్త డీఏ ప్రకటనకు ముహూర్తం ఖరారైనట్లు తెలుస్తోంది. 2026 జనవరి 1 నుంచే 8వ వేతన సంఘం అమలులోకి వచ్చినట్లు పరిగణించినప్పటికీ, పూర్తిస్థాయి సిఫార్సులు అమలయ్యే వరకు ఉద్యోగులు ప్రస్తుత నిబంధనల ప్రకారమే జీతభత్యాలు అందుకోనున్నారు. అయితే మధ్యంతర ఉపశమనంగా డీఏ పెంపుపై స్పష్టత రావడంతో ఉద్యోగుల్లో హర్షాతిరేకాలు వ్యక్తమవుతున్నాయి.

హోలీ కానుకగా 5% డీఏ పెంపు

కేంద్ర ప్రభుత్వ ఉద్యోగులకు మార్చి నెలలో భారీ ప్రయోజనం చేకూరనుంది. డిసెంబర్ నెలకు సంబంధించిన పారిశ్రామిక కార్మికుల వినియోగదారుల ధరల సూచీ (AICPI-IW) 148.2 వద్ద స్థిరంగా ఉండటంతో, డీఏ 5 శాతం పెరిగే అవకాశం ఉంది. ప్రస్తుతం 58 శాతంగా ఉన్న డీఏ, ఈ పెంపుతో 63 శాతానికి చేరుకోనుంది. మార్చిలో హోలీ పండగ సందర్భంగా ప్రభుత్వం ఈ ప్రకటన చేసే అవకాశం ఉందని అఖిల భారత ఎన్‌పీఎస్ ఉద్యోగుల సంఘం తెలిపింది. ఏప్రిల్ జీతంతో పాటు జనవరి నుంచి పెరిగిన డీఏ బకాయిలను కూడా ఉద్యోగులు అందుకోనున్నారు.

ఫిబ్రవరి 25న కీలక భేటీ.. రంగంలోకి వెబ్‌సైట్

8వ వేతన సంఘం కార్యకలాపాలు ఇప్పటికే ఢిల్లీ వేదికగా ప్రారంభమయ్యాయి. కొత్త జీతాల సవరణ, కనీస వేతనం, ఇతర భత్యాలపై చర్చించేందుకు వివిధ ప్రభుత్వ విభాగాల ప్రతినిధులు (రైల్వే, డిఫెన్స్, పోస్టల్, ఐటీ) ఫిబ్రవరి 25న జాతీయ రాజధానిలో భేటీ కానున్నారు. ఈ సమావేశంలో ఒక ఉమ్మడి ముసాయిదాను సిద్ధం చేసి వేతన సంఘానికి సమర్పించనున్నారు. మరోవైపు, సమాచార పారదర్శకత కోసం ప్రభుత్వం అధికారికంగా www.8cpc.gov.in వెబ్‌సైట్‌ను ప్రారంభించింది. ఉద్యోగులు, పెన్షనర్లు నేరుగా తమ సూచనలు, సలహాలను ఈ పోర్టల్ ద్వారా అందజేయవచ్చు.

తక్షణమే నివేదిక ఇవ్వాలని ఉద్యోగుల డిమాండ్

8వ వేతన సంఘం తన నివేదికను సమర్పించడానికి సాధారణంగా 18 నెలల సమయం తీసుకుంటుంది. అయితే, దేశవ్యాప్తంగా ఉన్న సుమారు 400 జిల్లాల ఎన్‌పీఎస్ ప్రతినిధులు ఈ ప్రక్రియను వేగవంతం చేయాలని కోరుతున్నారు. కేవలం 200 రోజుల్లోనే నివేదిక ఇచ్చి, పెరిగిన జీతాలను త్వరగా అమలు చేయాలని ఆల్ ఇండియా ఎన్‌పీఎస్ ఎంప్లాయీస్ ఫెడరేషన్ డిమాండ్ చేస్తోంది. కేంద్ర ప్రభుత్వ ఉద్యోగులతో పాటే రాష్ట్ర ప్రభుత్వ ఉద్యోగులకు కూడా మూల వేతనం, డీఏ సవరణలు జరగాలని కోరుతూ ప్రధానమంత్రి కార్యాలయానికి లేఖలు పంపారు.