దేవుడా నీకు నేనున్నా…

ఏ దిక్కు లేని వాళ్ళకి దేవుడు దిక్కు అంటారు కానీ ఓ కాకి మాత్రం, దేవుడికి ధైర్యం చెబుతోంది. గుడికి ఎవరు రావట్లేదా అయినా ఏం పర్వాలేదు నీకు నేనున్నాను స్వామి, అంటూ గుడికి వచ్చి గంట కొట్టి వెళుతోంది. తమిళనాడు సంగోటై సమీపంలోని వినాయకస్వామి ఆలయంలో ఓ కాకి గంటను మోగిస్తుండడం స్థానికంగా చర్చనీయాంశమైంది. తెన్‌కాశీ జిల్లా సెంగోటై సమీపంలోని చెరువు వద్ద గణేశుని ఆలయం ఉంది. ఈ ఆలయాన్ని బుధ, శనివారాల్లో ఉదయం, సాయంత్రం వేళల్లో మాత్రమే భక్తులు సందర్శిస్తారు. అందుకే పూజారి కూడా ఈ రెండు రోజులు మాత్రమే ఆలయానికి వచ్చి పూజలు చేస్తుంటారు.

అయితే మిగిలిన రోజుల్లో అసలు జన సంచారమే లేని ఆ ప్రాంతంలో ఓ కాకి గంట కొడుతుండాడాన్ని స్థానికులు గుర్తించారు. ధూపదీప నైవేద్యాలు లేని రోజుల్లో ఓ కాకి వచ్చి గంట మోగించి వెళ్లడాన్ని గమనించారు. పూజలు జరిగే ఆ రెండు రోజులు కాకుండా మిగిలిన ఐదు రోజులు ఉదయం 7 గంటలకు, సాయంత్రం 5 గంటలకు గుడి ముందు గంటను కాకి మోగిస్తోందని తెలిపారు. మొదట్లో వారు కూడా ఈ విషయం పెద్దగా పట్టించుకోలేదు. మొదటి సారి చూసినప్పుడు కాకి అప్పుడప్పుడు గంట కొట్టి వెళుతుంది అని మాత్రమే అనుకున్నారు అయితే కాస్త పరిశీలించిన తర్వాత వారంలో పూజలు జరగని ఐదు రోజులు మాత్రమే కాకి వచ్చి గంట కొట్టడం గమనించామన్నారు. ఇప్పుడు ఈ దృశ్యాన్ని చూసేందుకు చుట్టుపక్కల ప్రజలు పెద్దఎత్తున వస్తున్నారని తెలిపారు.

గతంలో ఒక శివాలయంలో పంది, వినాయకుడి ఆలయంలో ఎలుక ప్రదక్షిణలు చేసి వార్తలలో నిలిచాయి.

మనసులో భక్తి, విశ్వాసం, నింపుకొని చేసే ఏ పని అయినా మనకి ప్రశాంతతనే కాదు ముక్తి ని కూడా ఇస్తుంది. అయితే జంతువులకు ఇలాంటివి ఉండవు కానీ అవి ప్రదక్షిణలు చెయ్యడం లేదా ఇలా గంట కొట్టడం వంటివి మాత్రం చాలా ఆశ్చర్యం కలిగించే విషయాలు.