AI: షాపింగ్లో ఏఐ మ్యాజిక్.. టాప్లో భారత్
గతంలో ఐటీ రంగం లేదా డేటా విశ్లేషణకు మాత్రమే పరిమితమైన కృత్రిమ మేధ, ఇప్పుడు వ్యక్తిగత సలహాదారుగా మారుతోంది. ప్రపంచవ్యాప్తంగా 12 దేశాల్లో 12,000 మంది వినియోగదారులపై నిర్వహించిన సర్వేలో ఆసక్తికరమైన అంశాలు వెలుగులోకి వచ్చాయి.
వినియోగంలో భారత్ జోరు
అంతర్జాతీయ సగటుతో పోలిస్తే భారతీయులు షాపింగ్ కోసం ఏఐ టూల్స్ను వినియోగించడంలో ముందంజలో ఉన్నారు. అంతర్జాతీయంగా 25% మంది ఏఐ సాధనాలను వాడుతుండగా, భారత్లో ఇది 41% గా ఉండటం విశేషం. మరో 40% మంది భారతీయులు త్వరలోనే వీటిని వాడాలని భావిస్తున్నారు. అంటే దాదాపు 80% మంది భారతీయ వినియోగదారులు ఏఐ వైపు మొగ్గు చూపుతున్నారు. స్వీడన్, సింగపూర్ వంటి దేశాల్లో 66% మంది ఏఐని తమ జీవనశైలిలో భాగంగా మార్చుకున్నారు.
Gen Z ప్రభంజనం
ఏఐ విప్లవానికి నేటి యువత (జెన్ జీ) వెన్నెముకగా నిలుస్తోంది. ప్రతి 10 మంది యువకుల్లో ఏడుగురు చురుగ్గా ఏఐ సాధనాలను అన్వేషిస్తున్నారు. వీరిలో 61% మంది ఇప్పటికే వినియోగిస్తుండగా, ప్రతి ముగ్గురిలో ఒకరు రోజుకు కనీసం ఒక గంట పాటు ఏఐ టూల్స్తో గడుపుతున్నారు. 2023తో పోలిస్తే వీరి వినియోగం రెట్టింపు కావడం గమనార్హం. ఏఐపై ఆసక్తి ఉన్నప్పటికీ, వినియోగదారులు కొన్ని షరతులు విధిస్తున్నారు. 79% మంది భారతీయులు ఏఐ అసిస్టెంట్లకు బడ్జెట్ పరిమితులు, వస్తువుల కేటగిరీల వంటి కఠిన నిబంధనలు ఉండాలని కోరుకుంటున్నారు. ఒక ఉత్పత్తిని ఎందుకు సిఫారసు చేసిందో వివరణ ఇస్తేనే 80% మంది దాన్ని నమ్ముతామని చెబుతున్నారు. అలాగే ఏఐ రూపొందించిన ప్రకటనలను స్పష్టంగా వెల్లడించాలని 74% మంది కోరుతున్నారు. షాపింగ్ అలవాట్లను ఏఐ ఎలా సేకరిస్తుందో 72% మందికి అవగాహన లేదు. దీనిపై స్పష్టత ఉండాలని వారు ఆశిస్తున్నారు.
ఏఐ సేవలు కావాలి కానీ, అందుకు డబ్బు చెల్లించడంపై వినియోగదారులు ఆసక్తి చూపడం లేదు. ప్రపంచవ్యాప్తంగా కేవలం 19% మందే ప్రీమియం సేవల కోసం చెల్లించేందుకు సిద్ధంగా ఉన్నారు. భారత్లో 23% మంది అసలు డబ్బు కట్టే ప్రసక్తే లేదని తేల్చి చెప్పగా, మరో 23% మంది ఆఫర్లు లేదా రివార్డులు ఇస్తేనే ఆలోచిస్తామని అంటున్నారు. వినియోగదారులు కేవలం తక్కువ ధరకే కాకుండా నాణ్యత, విశ్వసనీయతకు ప్రాధాన్యం ఇస్తున్నారు. బ్రాండ్లు తమ ఏఐ అల్గారిథమ్లలో పారదర్శకతను పాటిస్తే, రాబోయే రోజుల్లో ఏఐ ప్రతి ఇంటి 'పర్సనల్ షాపింగ్ అసిస్టెంట్'గా మారడం ఖాయం. ఈ నేపథ్యంలో, ఏఐ కంపెనీలు వినియోగదారుల నమ్మకాన్ని, భద్రతను పెంపొందించేలా కృషి చేయాలి. వ్యక్తిగత డేటా గోప్యతకు అత్యంత ప్రాధాన్యతనిస్తూ, ఏఐ సలహాల వెనుక ఉన్న కారణాలను స్పష్టంగా వివరించగలగాలి. అప్పుడే ఏఐ టూల్స్ వినియోగం మరింత విస్తృతమై, ప్రతి ఒక్కరి జీవితంలోనూ విడదీయరాని భాగంగా మారగలదు. ఈ డిజిటల్ పరివర్తన వినియోగదారులకు మరింత మెరుగైన, సమర్థవంతమైన షాపింగ్ అనుభవాన్ని అందిస్తుందని నివేదిక స్పష్టం చేసింది.