New Toll Rules : టోల్ నిబంధనల్లో మార్పులు.. రేపటి నుంచే అమల్లోకి కొత్త ధరలు.

New Toll Rules : కేంద్ర ప్రభుత్వం వాహనదారులకు ఒక భారీ ఊరటనిచ్చింది. నేషనల్ హైవేలు, ఎక్స్‌ప్రెస్‌వేలపై ప్రయాణించే వారు చెల్లించే టోల్ టాక్స్ నిబంధనల్లో కీలక మార్పులు చేస్తూ నిర్ణయం తీసుకుంది. ఇకపై నిర్మాణం పూర్తి కాని ఎక్స్‌ప్రెస్‌వేలపై ప్రయాణికుల నుంచి పూర్తి టోల్ వసూలు చేయడం కుదరదని స్పష్టం చేసింది. దీనివల్ల ప్రయాణికులకు టోల్ భారం గణనీయంగా తగ్గనుంది. ఎక్స్‌ప్రెస్‌వేలపై ప్రయాణించే వారికి ఇది నిజంగా శుభవార్త. సాధారణంగా ఎక్స్‌ప్రెస్‌వేలు సగం పూర్తి కాకముందే టోల్ వసూలు ప్రారంభమవుతుంటుంది. కానీ ప్రభుత్వం ఇప్పుడు నేషనల్ హైవే ఫీజు (రేట్ల నిర్ధారణ వసూలు) నిబంధనలు-2008కి సవరణలు చేస్తూ నోటిఫికేషన్ విడుదల చేసింది. దీని ప్రకారం, ఎక్స్‌ప్రెస్‌వే పూర్తిగా అందుబాటులోకి వచ్చే వరకు ప్రయాణికుల నుంచి పాత పద్ధతిలో భారీ వసూళ్లు చేయడానికి వీల్లేదు.

ఏమిటా మార్పు? ఎవరికి లాభం?

ఇప్పటివరకు ఉన్న నిబంధనల ప్రకారం.. ఎక్స్‌ప్రెస్‌వేలో కొంత భాగం మాత్రమే వాడుకున్నా లేదా రోడ్డు నిర్మాణం మధ్యలో ఉన్నా సరే.. ప్రయాణికులు పూర్తి టోల్ చెల్లించాల్సి వచ్చేది. కానీ కొత్త రూల్ ప్రకారం, ఎక్స్‌ప్రెస్‌వే ఎంతవరకు పూర్తయిందో, అంతవరకు మాత్రమే టోల్ వసూలు చేయాలి. అది కూడా నేషనల్ హైవే రేట్ల ప్రకారమే ఉండాలి. సాధారణంగా నేషనల్ హైవేలతో పోలిస్తే ఎక్స్‌ప్రెస్‌వేలపై టోల్ 25 శాతం ఎక్కువగా ఉంటుంది. ఇకపై నిర్మాణం పూర్తి కాకుండా ఈ 25 శాతం అదనపు టోల్‌ను వసూలు చేయకూడదని ప్రభుత్వం ఆదేశించింది.

ట్రాఫిక్ కష్టాలకు చెక్

ఈ నిర్ణయం వెనుక ఒక బలమైన కారణం ఉంది. ఎక్స్‌ప్రెస్‌వేలపై టోల్ రేట్లు ఎక్కువగా ఉండటంతో చాలా మంది వాహనదారులు పాత నేషనల్ హైవేలనే వాడుతున్నారు. దీనివల్ల పాత రోడ్లపై ట్రాఫిక్ జామ్‌లు ఏర్పడి కాలుష్యం పెరుగుతోంది. ఇప్పుడు టోల్ రేట్లు తగ్గించడం వల్ల వాహనదారులు ఎక్స్‌ప్రెస్‌వేలను వాడటానికి మొగ్గు చూపుతారు. ఫలితంగా ప్రయాణ సమయం తగ్గడంతో పాటు ఇంధనం కూడా ఆదా అవుతుంది. ముఖ్యంగా లారీలు, బస్సుల వంటి భారీ వాహనాల ఆపరేటర్లకు ఇది పెద్ద ఊరట.

ఎప్పటి నుంచి అమల్లోకి వస్తుంది?

ఈ కొత్త టోల్ నిబంధనలు ఫిబ్రవరి 15, 2026 నుంచి అమల్లోకి వస్తాయి. ఈ నిబంధన ఎక్స్‌ప్రెస్‌వే నిర్మాణం పూర్తిగా పూర్తయ్యే వరకు లేదా గరిష్టంగా ఏడాది కాలం పాటు అమలులో ఉంటుంది. రోడ్డు మొత్తం సిద్ధమై, వాహనాల రాకపోకలకు పూర్తిస్థాయిలో అనుమతి లభించిన తర్వాతే ప్రభుత్వం మళ్ళీ పాత టోల్ రేట్లను (ఎక్స్‌ప్రెస్‌వే రేట్లు) పునరుద్ధరిస్తుంది. అప్పటివరకు సామాన్యులకు జేబు చిల్లు పడకుండా ఈ డిస్కౌంట్ టోల్ అందుబాటులో ఉంటుంది.