Gujarat Man : చనిపోయిన తల్లి కోరిక..299 మంది రైతుల రూ. 90 లక్షల అప్పు తీర్చిన కొడుకు.

Gujarat Man : ధనం, మనస్సు రెండింటిలోనూ శ్రీమంతులు చాలా అరుదుగా ఉంటారు. అలాంటి అరుదైన వ్యక్తులలో ఒకరు గుజరాత్‌లోని అమ్రేలి జిల్లాకు చెందిన పారిశ్రామికవేత్త బాబూభాయ్ జీరావాలా. తన తల్లి కోరికను తీర్చడానికి, ఆయన తమ సొంత గ్రామంలోని 299 మంది రైతుల బ్యాంకు రుణాలను పూర్తిగా తీర్చేశారు. ఈ చర్య ద్వారా దాదాపు 30 సంవత్సరాలుగా బ్యాంకులో తాకట్టులో ఉన్న రైతుల భూమి పత్రాలను తిరిగి వారికి అందేలా చేసి, రుణ విముక్తులను చేశారు. దాదాపు 90 లక్షల రూపాయలు చెల్లించి, తన తల్లి కలను ఎలా నెరవేర్చారో ఇప్పుడు తెలుసుకుందాం.

గుజరాత్‌లోని అమ్రేలి జిల్లా, సావరకుండ్ల తాలూకాలోని జీరా గ్రామానికి చెందిన పారిశ్రామికవేత్త బాబూభాయ్ జీరావాలా, తన గ్రామానికి చెందిన 299 మంది రైతులను సామాజిక రుణ భారం నుంచి విముక్తులను చేశారు. జీరా సేవా సహకారి మండల్ బ్యాంకుకు రైతులు చెల్లించాల్సిన మొత్తం రూ. 89,89,209 (దాదాపు రూ. 90 లక్షలు). ఈ మొత్తాన్ని బాబూభాయ్ పూర్తిగా చెల్లించారు.

ఈ సహాయం ద్వారా, గత 30 సంవత్సరాలుగా బ్యాంకు వద్ద తాకట్టులో ఉన్న 299 మంది రైతుల భూమి పత్రాలు వారికి తిరిగి అందేలా చేశారు. రైతులు తాము తీసుకోని అప్పుల కారణంగా గత మూడు దశాబ్దాలుగా తీవ్ర ఇబ్బందులు పడ్డారు. 1990వ దశకంలో, జీరా సేవా సహకారి మండల్ బ్యాంక్ అప్పటి కమిటీ అధికారులు కొందరు రైతుల పేరు మీద మోసపూరితంగా రుణాలు తీసుకున్నారు.

తమది కాని అప్పుల భారం తమపై పడటం వల్ల రైతులు తీవ్ర నిరాశకు గురయ్యారు. 1995 నుంచి రైతులు, బ్యాంకు మధ్య ఈ రుణ వివాదం కొనసాగుతోంది. ఈ అప్పుల కారణంగా ఆ రైతులకు ఇతర బ్యాంకుల నుంచి రుణాలు లభించేవి కావు, ప్రభుత్వం నుంచి కూడా ఎలాంటి సహాయం అందేది కాదు. అంతేకాకుండా భూమిని పంచుకునే అవకాశం కూడా వారికి లేకుండా పోయింది.

బాబూభాయ్ జీరావాలా ఈ గొప్ప నిర్ణయం తీసుకోవడానికి ప్రధాన కారణం చనిపోయిన తన తల్లి కోరిక. తమ గ్రామంలోని రైతులు ఈ అప్పుల కారణంగా పడుతున్న కష్టాన్ని చూసి బాబూభాయ్ తల్లి ఎప్పుడూ బాధపడేవారట. తమ వద్ద ఉన్న నగలను అమ్మి అయినా సరే ఊరి రైతుల అప్పులు తీర్చాలనేది ఆమె చివరి కోరికగా ఉండేది. అయితే, ఆ కోరిక తీరకుండానే ఆమె మరణించారు. తన తల్లి పుణ్యతిథి సందర్భంగా బాబూభాయ్ జీరావాలా ఆమె కోరికను నెరవేర్చాలని నిర్ణయించుకున్నారు. రైతులందరి రుణాలను ఒక్కసారిగా తీర్చేశారు. బాబూభాయ్ చర్యతో 299 మంది రైతులు, వారి కుటుంబాలు సంతోషంగా రుణవిముక్తి ధృవపత్రాలు అందుకున్నారు. దీని ద్వారా బాబూభాయ్ తమ తల్లి ఆత్మకు శాంతి చేకూర్చారు.