G-20: ఆఫ్రికన్ యూనియన్‌కు జీ20లో శాశ్వత సభ్యత్వం
భారత్‌ ప్రతిష్టాత్మకంగా నిర్వహిస్తున్న జీ 20 శిఖరాగ్ర సదస్సులో కీలక పరిణామం సంభవించింది. 55 సభ్య దేశాలున్న ఆఫ్రికా యూనియన్‌ ఆ జీ 20లో శాశ్వత సభ్య దేశంగా చేరింది. సుమారు 130 కోట్ల జనాభా కలిగిన AUచేరడంతో జీ20 కూటమి ప్రపంచానికి మరింత దగ్గరైంది. అయితే జీ20లో చేరడం వల్ల ఆఫ్రికా యూనియన్‌కు సభ్య దేశాలకు కలిగే ప్రయోజనాలు ఏంటి అన్నది ఆసక్తికరంగా మారింది. అయితే ఈ చేరికతో పరస్పర ప్రయోజనాలున్నాయని నిపుణులు తెలిపారు.
ప్రపంచ జీడీపీలో 85శాతం వాటా కలిగిన జీ20 దేశాల శిఖరాగ్ర సదస్సు దిల్లీలో అట్టహాసంగా జరుగుతోంది. ఈ క్రమంలో భారత్‌ ప్రతిపాదించిన ఆఫ్రికన్ యూనియన్‌కు శాశ్వత సభ్యత్వాన్ని సభ్యదేశాలన్నీ అంగీకరించడం..... కీలక పరిణామం. 55కు పైగా దేశాలు ఉన్న ఆఫ్రికా యూనియన్‌లో 2050 నాటికి జనాభా దాదాపు 250 కోట్లకు చేరనుంది. జీ20 కూటమిలో ఇప్పటి వరకు ఏయూ నుంచి కేవలం ఒక్క దక్షిణాఫ్రికా మాత్రమే సభ్య దేశంగా ఉంది. కానీ, ఇప్పుడు భారత్‌ చొరవ, సభ్య దేశాల అంగీకారంతో ఆఫ్రికన్ యూనియన్‌ శాశ్వత సభ్యత్వం పొందింది. ఈ నేపథ్యంలో శక్తిమంతమైన జీ20లో చేరడం వల్ల అటు ఆఫ్రికన్ యూనియన్‌కు ఇటు కూటమికి పరస్పర ప్రయోజనాలు ఉన్నాయని విశ్లేషకులు అంచనా వేస్తున్నారు.ఆఫ్రికాలో వివాదాస్పదంగా ఉన్న పశ్చిమ సహారా ఐరాసతో పాటు ఇతర అంతర్జాతీయ వేదికల్లో ప్రాతినిధ్యం కోసం ఒత్తిడి తెస్తోంది.
ప్రపంచ బ్యాంకు వంటి అంతర్జాతీయ ఆర్థిక వ్యవస్థల్లోనూ సంస్కరణలు చేయాలని వాదిస్తోంది. జీ20లో ఆఫ్రికన్ యూనియన్‌కు శాశ్వత సభ్యత్వం కల్పించడం, ప్రపంచంలోనే అతిపెద్ద స్వేచ్ఛా వాణిజ్యానికి కేంద్రంగా మారనుంది. అంతేకాకుండా వాతావరణ మార్పులను ఎదుర్కోవడంలో ప్రపంచానికి అవసరమైన వనరులు ఈ ఖండంలో పుష్కలంగా ఉన్నాయి. ప్రపంచంలో 60శాతం పునరుత్పాదక శక్తి వనరులు ఆఫ్రికా ఖండంలోనే ఉన్నాయి. ఇందుకు అవసరమైన 30శాతానికిపైగా ఖనిజాలకూ ఆఫ్రికా నిలయంగా ఉంది. ప్రపంచవ్యాప్తంగా లభించే కోబాల్ట్‌లో సగానికి పైగా కాంగోలోనే ఉన్నట్లు ఇటీవల ఐరాస నివేదిక వెల్లడించింది. ఆఫ్రికా వనరులను ఇప్పటికే కొన్ని దేశాలు వినియోగించుకొంటూ లాభాలు పొందుతున్నాయనే వాదన ఉంది. అయితే, వీటివల్ల తమ ప్రాంతంలో పారిశ్రామిక అభివృద్ధితోపాటు ఆర్థిక వ్యవస్థలకు తోడ్పడాలని స్థానిక నేతలు కోరుకుంటున్నారు. ఎంతో విలువైన తమ సహజ వనరులను పరిగణనలోకి తీసుకోవాలని కెన్యా అధ్యక్షుడు విలియం రుటో ఇటీవలే పేర్కొన్నారు.
