Chandrayaan-3: జాబిల్లికి మరింత చేరువైన చంద్రయాన్‌-3

జాబిల్లిపై అన్వేషణకు బయల్దేరిన చంద్రయాన్‌-3 (Chandrayaan-3) నిర్దేశిత లక్ష్యానికి మరింత చేరువైంది. చంద్రుడి చుట్టు వ్యౌమనౌక కక్ష్య తగ్గింపు విన్యాసాన్ని ఇస్రో (ISRO) మరోసారి విజయవంతంగా నిర్వహించింది. జాబిల్లి చివరి కక్ష్యలోకి ప్రవేశించిన చంద్రయాన్‌-3... చంద్రుడి ఉపరితలంపై దిగే చరిత్రాత్మక ఘట్టానికి మరింత చేరువైంది. చంద్రయాన్‌-3 కక్ష్య తగ్గింపు విన్యాసాన్ని ఇప్పటికే మూడుసార్లు విజయవంతంగా ఇస్రో నిర్వహించింది. నాలుగోసారి కక్ష్య తగ్గింపును ఇస్రో విజయవంతంగా నిర్వహించింది. నేటి విన్యాసంతో కక్ష్య తగ్గింపు ప్రక్రియలు అన్నీ విజయవంతంగా పూర్తయినట్లు ఇస్రో ప్రకటించింది.

చంద్రయాన్‌-3 (Chandrayaan-3) కక్ష్య తగ్గింపు విన్యాసాన్ని (Orbit Reduction Maneuvre) మరోసారి విజయవంతంగా నిర్వహించినట్లు ఇస్రో ప్రకటించింది. వ్యోమనౌక కక్ష్యను 153 km x 163 kmలకు తగ్గించినట్లు ఇస్రో వెల్లడించింది. ఇప్పుడు చంద్రయాన్‌-3 చంద్రుడిపై 100 కిలోమీటర్ల ఎత్తున ఉన్న కక్ష్యలోకి చేరింది.

చంద్రయాన్-3ని విజయవంతగా చంద్రుడిపై 100 కిలోమీటర్ల ఎత్తున ఉన్న కక్ష్యలోకి ప్రవేశపెట్టడంతో ఇప్పుడు ఇస్రోకు అత్యంత కఠిన సవాలు ఎదురుకానుంది. ఆగస్టు 23న ఈ అంతరిక్షనౌకను సాఫ్ట్ ల్యాండింగ్ చేయాలని భావిస్తున్న ఇస్రో అందుకోసం "డీబూస్ట్" అనే పద్ధతిని వాడనుంది. దీనితో అడ్డంగా ప్రయాణాన్ని కొనసాగిస్తున్న చంద్రయాన్‌-3 చివరి 30 కిలోమీటర్లకు వచ్చేసరికి నిట్టనిలువునా ల్యాండ్ కానుంది. ఈ అంతరిక్షనౌక వేగాన్ని చివరి 30 కిలోమీటర్ల ఎత్తు నుంచి తుది ల్యాండింగ్‌కు చేర్చే ప్రక్రియ అత్యంత కీలకమైన భాగమని ఇస్రో ఛైర్మన్ S. సోమ్‌నాథ్ తెలిపారు. ల్యాండింగ్ ప్రక్రియ మొదలైనప్పుడు ఈ అంతరిక్షనౌక వేగం సెకనుకు 1.68 కిలోమీటర్లు ఉంటుందని చెప్పారు.

చంద్రయాన్-2కు ఈ ప్రక్రియ వద్దే ఇబ్బంది తలెత్తిందని ఇస్రో ఛైర్మన్ S. సోమ్‌నాథ్ గుర్తు చేశారు. జాబిల్లిపై పరిశోధనలకు భారత అంతరిక్ష పరిశోధన సంస్థ-ఇస్రో ప్రయోగించిన చంద్రయాన్‌-3 సోమవారంతో నెల రోజులు పూర్తి చేసుకుంది. ప్రస్తుతం చంద్రుడి చుట్టూ చక్కర్లు కొడుతోంది. అంతా సజావుగా సాగితే ఈ నెల 23 సాయంత్రం 5.47 గంటలకు ల్యాండర్‌ చంద్రుడి దక్షిణ ధ్రువంపై అడుగుపెట్టనుంది. చంద్రయాన్‌-3 (Chandrayaan-3)’ని జులై 14న ఎల్‌వీఎం3-ఎం4 రాకెట్‌ ద్వారా విజయవంతంగా భూకక్ష్యలో ప్రవేశపెట్టింది.