India's Forex Reserves : వరుసగా రెండో వారం భారీగా పెరుగుదల.. రికార్డు గరిష్ట స్థాయికి దగ్గరగా భారత్ ఫారెక్స్ రిజర్వ్స్.

India's Forex Reserves : భారతదేశ విదేశీ మారక నిల్వలు మరోసారి 700 బిలియన్ డాలర్ల మైలురాయిని దాటాయి. అక్టోబర్ 17తో ముగిసిన వారంలో, ఫారెక్స్ రిజర్వులు ఏకంగా 4.496 బిలియన్ డాలర్లు పెరిగాయి. వరుసగా రెండో వారం పెరిగిన ఈ నిల్వలు, ఇప్పుడు 702.28 బిలియన్ డాలర్లకు చేరుకొని, చారిత్రక గరిష్ట స్థాయికి దగ్గరగా ఉన్నాయి. రిజర్వ్ బ్యాంక్ ఆఫ్ ఇండియా నిల్వల్లో ఈ పెరుగుదలకు ప్రధానంగా బంగారం ధరల పెరుగుదలే ముఖ్య కారణమని తెలుస్తోంది.

అక్టోబర్ 17తో ముగిసిన వారంలో భారతదేశ విదేశీ మారక నిల్వలు గణనీయంగా పెరిగాయి. రిజర్వుల పెరుగుదలలో సింహభాగం బంగారం నిల్వల వల్లే జరిగింది. ఈ ఒక్క వారంలో బంగారు నిల్వలు ఏకంగా 6.181 బిలియన్ డాలర్లు పెరిగాయి. రిజర్వుల్లో కీలకమైన విదేశీ కరెన్సీ ఆస్తుల విలువ మాత్రం 1.692 బిలియన్ డాలర్లు తగ్గింది. యూరో, పౌండ్, యెన్ వంటి కరెన్సీల విలువ తగ్గడం దీనికి ప్రధాన కారణం.

ఎస్డీఆర్ నిల్వలు కూడా 38 మిలియన్ డాలర్లు పెరిగినప్పటికీ, ఐఎంఎఫ్ వద్ద ఉన్న రిజర్వ్ స్థానం మాత్రం 30 మిలియన్ డాలర్లు తగ్గింది. అయినప్పటికీ, బంగారం ధరల పెరుగుదల వల్ల మొత్తం రిజర్వుల విలువ పెరిగింది. అక్టోబర్ 17, 2025 నాటికి భారత్ ఫారెక్స్ నిల్వల వివరాలుభారతదేశ మొత్తం ఫారెక్స్ నిల్వలు $702.28 బిలియన్లకు చేరాయి.

భారతదేశం ఫారెక్స్ నిల్వలు (17 అక్టోబర్ 2025 నాటికి)

మొత్తం నిల్వలు: 702.28 బిలియన్ డాలర్లు

విదేశీ కరెన్సీలు: 570.411 బిలియన్ డాలర్లు

బంగారం: 108.546 బిలియన్ డాలర్లు

ఎస్డీఆర్లు: 18.722 బిలియన్ డాలర్లు

అత్యధిక ఫారెక్స్ నిల్వలు కలిగిన దేశాల జాబితాలో భారతదేశం ఐదవ స్థానంలో ఉంది. ఇటీవలి వరకు ఇది నాల్గవ స్థానంలో ఉంది. రష్యా తన నిల్వలను గణనీయంగా పెంచుతోంది. చైనా 3.6 ట్రిలియన్ డాలర్ల ఫారెక్స్ నిల్వలతో మొదటి స్థానంలో ఉంది. జపాన్, స్విట్జర్లాండ్ ఒక ట్రిలియన్ డాలర్ల కంటే ఎక్కువ ఫారెక్స్ నిల్వలను కలిగి ఉన్నాయి. రష్యా 713 బిలియన్ డాలర్ల నిల్వలను కలిగి ఉంది.