Jharkhand: వర్ష బీభత్సం.. అయిదుగురు మృతి, అనేక మందికి గాయాలు..
జార్ఖండ్‌లోని కొన్ని ప్రాంతాల్లో భారీ వర్షాలు విధ్వంసం సృష్టించడంతో ఐదుగురు మరణించగా, ఒకరు గల్లంతయ్యారని, అనేక మంది గాయపడ్డారని అధికారులు శనివారం ఉదయం తెలిపారు. శుక్రవారం రాత్రి సెరైకేలా-ఖర్సవాన్ జిల్లాలో ఇల్లు కూలిపోవడంతో ఒక మహిళ, ఆమె ఏడేళ్ల కుమారుడు మరణించారని తెలిపారు. రాజ్‌నగర్ బ్లాక్‌లోని దండు గ్రామంలో జరిగిన ఈ సంఘటనలో మరో ఎనిమిది మంది గాయపడ్డారని వారు తెలిపారు.
"జంషెడ్‌పూర్‌లోని ఎంజిఎం ఆసుపత్రిలో చికిత్స పొందుతూ ఆ మహిళ, ఆమె కుమారుడు మరణించారు. సంతోష్ లోహార్ అనే వ్యక్తికి చెందిన కచ్చా ఇల్లు కూలిపోవడంతో మరో ఎనిమిది మంది గాయపడ్డారు" అని రాజ్‌నగర్ బిడిఓ మలయ్ దాస్ తెలిపారు.
బంధువులు లోహర్ ఇంటికి వచ్చినప్పుడు ఈ సంఘటన జరిగింది. జిల్లాలో జరిగిన మరో సంఘటనలో, శనివారం ఉదయం ఇంటి గోడ కూలిపోవడంతో ఐదేళ్ల బాలుడు మరణించగా, మరో ముగ్గురు గాయపడ్డారని పోలీసులు తెలిపారు.
శుక్రవారం ఛత్రా జిల్లాలో ఉప్పొంగుతున్న నదిలో ఒక జంట కొట్టుకుపోయింది. ఈ సంఘటన కట్ఘారా గ్రామంలో జరిగింది. "భర్త మృతదేహం లభ్యం కాగా, భార్య ఇంకా కనిపించ లేదు" అని గిధోర్ బిడిఓ రాహుల్ దేవ్ తెలిపారు. జిల్లాలోని పథల్‌గడ బ్లాక్‌లోని ఖైరటోలా గ్రామంలో కూడా వర్షానికి సంబంధించిన సంఘటనలో ఒక వ్యక్తి మరణించినట్లు అధికారులు తెలిపారు.