PMFBY : పీఎం ఫసల్ బీమా యోజనలో కీలక మార్పు.. ఇకపై అడవి జంతువుల దాడికి కూడా బీమా పరిహారం.

PMFBY : కేంద్ర ప్రభుత్వం అమలు చేస్తున్న ప్రధాన మంత్రి ఫసల్ బీమా యోజనలో ప్రభుత్వం కొన్ని కీలక మార్పులు చేసింది. ఇందులో ముఖ్యంగా దేశవ్యాప్తంగా రైతులు చాలా కాలంగా కోరుతున్న ఒక పెద్ద డిమాండ్‌ను పరిగణనలోకి తీసుకున్నారు. ఇకపై పంట నష్టానికి కారణమయ్యే స్థానిక ప్రమాదాల జాబితాలోకి అడవి జంతువుల దాడిని కూడా చేర్చారు. ఈ నిర్ణయం రైతులకు పెద్ద ఊరటనివ్వనుంది.

అడవి జంతువుల దాడికి పరిహారం

కొత్తగా చేసిన మార్పు ప్రకారం.. అడవి జంతువులైన ఏనుగులు, కోతులు మొదలైన వాటి దాడి వల్ల పంటకు నష్టం జరిగితే, ఆ నష్టాన్ని బీమా సంస్థలు రైతులకు చెల్లిస్తాయి. పీఎం ఫసల్ బీమా యోజనలోని ప్రమాదాల జాబితాలో ఇది ఐదో అంశంగా చేర్చబడింది. అలాగే వరి పంట ముంపు సమస్యను కూడా స్థానికీకరించిన విపత్తుల జాబితాలోకి తిరిగి చేర్చారు. 2018లో దీనిని జాబితా నుంచి తొలగించారు. ఈ నిర్ణయం కర్ణాటకతో సహా వరదలు ఎక్కువగా వచ్చే రాష్ట్రాల్లోని వరి రైతులకు పెద్ద ఉపశమనం కలిగించే అవకాశం ఉంది.

ఎప్పటి నుంచి అమలు?

పీఎం ఫసల్ బీమా యోజనలో చేసిన ఈ మార్పులు 2026 వేసవి/ఖరీఫ్ సీజన్ నుంచి అమలులోకి రానున్నాయి. ఏయే అడవి జంతువుల వల్ల పంట నష్టం జరిగితే పరిహారం లభిస్తుంది. అలాగే ఏ జిల్లాలు వరద ముంపునకు గురయ్యే అవకాశం ఉంది అనే విషయాలపై రాష్ట్ర ప్రభుత్వాలు ప్రత్యేకంగా జాబితాలను విడుదల చేయనున్నాయి. రైతులు తమ రాష్ట్ర ప్రభుత్వాల జాబితా కోసం ఎదురు చూడాలి.

రైతులు తమ భూమిలో పండించిన పంటకు బీమా చేయించుకునే అవకాశం ఈ పథకంలో ఉంటుంది. ఏదైనా సహజ విపత్తుల కారణంగా పంట నష్టం జరిగితే, రైతులకు బీమా పరిహారం లభిస్తుంది. పంట నాశనమైనప్పుడు రైతులు 72 గంటలలోపు పంట బీమా యాప్ ద్వారా తప్పనిసరిగా నష్టాన్ని నివేదించాలి.ఖరీఫ్ (వేసవి) పంటలకు బీమా ప్రీమియం 2% గా నిర్ణయించబడింది. ఉదాహరణకు, రూ. 50,000 బీమా చేస్తే ప్రీమియం రూ. 1,000 అవుతుంది. రబీ (శీతాకాల) పంటలకు ప్రీమియం 1.5% గా ఉంది.వాణిజ్య పంటలకు ప్రీమియం 5% గా నిర్ణయించారు.