PM Kisan : బీహార్ ఎన్నికలు అయ్యాయి.. 21వ విడత పీఎం కిసాన్ డబ్బులకు లైన్ క్లియర్ అయినట్లేనా ?

PM Kisan : బీహార్ అసెంబ్లీ ఎన్నికల ఫలితాలు వెలువడి నితీష్ కుమార్ నేతృత్వంలోని ఎన్‌డీఏ కూటమి మరోసారి అధికారం చేపట్టింది. ఈ రాజకీయ సందడి అంతా ఒకవైపు జరుగుతుండగా, దేశంలోని కోట్లాది మంది రైతులు ప్రధానమంత్రి కిసాన్ సమ్మాన్ నిధి యోజన 21వ విడత డబ్బుల కోసం ఆత్రుతగా ఎదురుచూస్తున్నారు. సాధారణంగా నాలుగు నెలలకు ఒకసారి, అంటే ఆగస్టులో 20వ విడత వచ్చిన తర్వాత, 21వ విడత అక్టోబర్ 2025లో విడుదల కావాల్సి ఉంది. కానీ, ఈసారి విడత విడుదల ఆలస్యం అవుతోంది. ఈ ఆలస్యానికి గల కారణాన్ని కేంద్ర ప్రభుత్వం స్పష్టం చేసింది.

పీఎం కిసాన్ పథకానికి సంబంధించిన మార్గదర్శకాలను పాటించకుండా, లక్షలాది మంది అనర్హులైన రైతులు కూడా ఈ పథకంలో నమోదు చేసుకున్నట్లు ప్రభుత్వం గుర్తించింది. ఈ తప్పుడు దరఖాస్తులన్నింటినీ ప్రస్తుతం సందేహాస్పద జాబితాలో ఉంచారు. దేశవ్యాప్తంగా ఈ అనర్హుల తనిఖీ ప్రక్రియ పూర్తి కావడం వల్లే ఈ 21వ విడత విడుదల ఆలస్యం అవుతోంది. పథకం అమలును పటిష్టం చేయడానికి, అర్హులైన నిజమైన రైతులకు మాత్రమే డబ్బులు అందేలా చూడటానికి ఈ ప్రక్రియ చాలా ముఖ్యం అని ప్రభుత్వం తెలిపింది.

పీఎం-కిసాన్ పథకం కింద డబ్బులు పొందాలంటే, లబ్ధిదారులు తప్పనిసరిగా ఎలక్ట్రానిక్ నో యువర్ కస్టమర్ను పూర్తి చేయాలి. ఒకవేళ మీ కేవైసీ అప్‌డేట్ కాకపోతే మీ 21వ విడత డబ్బులు నిలిచిపోతాయి. రైతులు ఈ కేవైసీని రెండు సులువైన పద్ధతుల్లో పూర్తి చేసుకోవచ్చు.. రైతులు నేరుగా పీఎం-కిసాన్ అధికారిక పోర్టల్‎లో తమ మొబైల్ ఓటీపీని ఉపయోగించి పూర్తి చేయవచ్చు.బయోమెట్రిక్ కేవైసీ కోసం దగ్గరలోని కామన్ సర్వీస్ సెంటర్ను సంప్రదించాల్సి ఉంటుంది.

లక్షల సంఖ్యలో ఉన్న అనర్హుల దరఖాస్తులను తొలగించడానికి వ్యవసాయ శాఖ ప్రస్తుతం కొన్ని ప్రధాన అంశాలపై దృష్టి పెట్టింది. 2019 ఫిబ్రవరి 1వ తేదీ తర్వాత వ్యవసాయ భూమిని కొనుగోలు చేసిన లేదా యాజమాన్యం పొందిన కొత్త కేసులను చాలా జాగ్రత్తగా పరిశీలిస్తున్నారు. భార్యాభర్తలు ఇద్దరూ లేదా ఒకే కుటుంబంలోని ఇద్దరు పెద్దలు/మైనర్లు పథకం కింద డబ్బులు పొందుతున్న సందర్భాల్లో ఫిజికల్ వెరిఫికేషన్ పూర్తయ్యే వరకు వారి డబ్బులను తాత్కాలికంగా నిలిపివేశారు.

అందుకే రైతన్నలు వెంటనే పీఎం-కిసాన్ వెబ్‌సైట్ లేదా మొబైల్ యాప్‌లో తమ ఎలిజిబిలిటీ స్టేటస్ని తప్పకుండా తనిఖీ చేసుకోవాలని అధికారులు సూచిస్తున్నారు. 21వ విడత ఎప్పుడు విడుదల అవుతుంది అనే దానిపై ప్రభుత్వం ఇప్పటివరకు అధికారిక తేదీని ప్రకటించలేదు. అయితే, ఈ దేశవ్యాప్త వెరిఫికేషన్ పూర్తయిన తర్వాతే డబ్బులు విడుదల చేస్తామని స్పష్టం చేసింది. మీడియా వర్గాల సమాచారం ప్రకారం.. ఈ నెల చివరి నాటికి (నవంబర్ 2025) రైతుల ఖాతాల్లో డబ్బులు జమ అయ్యే అవకాశం ఉంది.

దేశంలోని చాలా మంది రైతులు ఎదురుచూస్తుండగా, కొన్ని రాష్ట్రాల్లోని రైతులకు మాత్రం 21వ విడత డబ్బులు ఇప్పటికే అందాయి. హిమాచల్ ప్రదేశ్, ఉత్తరాఖండ్, పంజాబ్, జమ్మూ-కశ్మీర్‌లలో ఇటీవలి కాలంలో భారీ వర్షాలు, కొండచరియలు విరిగిపడటం వంటి సహజ విపత్తుల కారణంగా నష్టపోయిన రైతులకు తక్షణ సహాయం అందించడానికి ఈ విడతను ముందుగానే విడుదల చేశారు.