RBI Utkarsh 2.0 : ఆర్బీఐ ఉత్కర్ష్ 2.0 షురూ.. కస్టమర్ సేవల్లో విప్లవాత్మక మార్పులు.. ఇకపై బ్యాంకింగ్ మరింత సులభం.
RBI Utkarsh 2.0 : భారత రిజర్వ్ బ్యాంక్ దేశ ఆర్థిక వ్యవస్థను మరింత బలోపేతం చేసే దిశగా అడుగులు వేస్తోంది. ఇందులో భాగంగా ఉత్కర్ష్ 2.0 పేరుతో ఒక మధ్యకాలిక వ్యూహాత్మక ప్రణాళికను విడుదల చేసింది. వినియోగదారులకు మెరుగైన సేవలు అందించడం, సాంకేతికతను అందిపుచ్చుకోవడం, అంతర్జాతీయ స్థాయిలో రూపాయి విలువను పెంచడం వంటి అంశాలపై ఆర్బీఐ ప్రత్యేక దృష్టి సారించింది. రిజర్వ్ బ్యాంక్ ఆఫ్ ఇండియా తన పనితీరును మరింత మెరుగుపరుచుకోవడానికి ఉత్కర్ష్ 2.0 ఫ్రేమ్వర్క్ను అమల్లోకి తెచ్చింది. దీని ప్రధాన ఉద్దేశం నిబంధనలను సులభతరం చేయడం, సామాన్యులకు ఆర్థిక సేవలను దగ్గర చేయడం. ఇందులో ఆర్టిఫిషియల్ ఇంటెలిజెన్స్ వంటి అత్యాధునిక సాంకేతికతను వాడబోతున్నారు. అలాగే, మన దేశపు యూపీఐ సేవలను ప్రపంచవ్యాప్తంగా విస్తరించడం, విదేశీ వాణిజ్యంలో రూపాయి వినియోగాన్ని పెంచడం వంటి కీలక లక్ష్యాలను ఆర్బీఐ పెట్టుకుంది. దీనివల్ల ప్రపంచ ఆర్థిక వేదికపై భారత్ ఒక శక్తివంతమైన దేశంగా ఎదగనుంది.
యథాతథంగా రెపో రేటు
ప్రస్తుతం ప్రపంచవ్యాప్తంగా నెలకొన్న అనిశ్చితి, ముఖ్యంగా పశ్చిమ ఆసియాలో యుద్ధ వాతావరణం వల్ల ముడి చమురు ధరలు పెరిగాయి. ఇది ద్రవ్యోల్బణం (ధరల పెరుగుదల) పై ప్రభావం చూపే అవకాశం ఉంది. ఈ పరిస్థితులను గమనించిన ఆర్బీఐ, బుధవారం జరిగిన పరపతి సమీక్షలో రెపో రేటును 5.25 శాతం వద్దే స్థిరంగా ఉంచాలని నిర్ణయించింది. ప్రస్తుతానికి వేచి చూసే ధోరణిని అవలంబిస్తూ, ధరల పెరుగుదలను అదుపులో ఉంచడమే లక్ష్యంగా పెట్టుకుంది. దీనివల్ల లోన్ తీసుకున్న వారికి ప్రస్తుతానికి వడ్డీ భారం పెరగదు.
ఆర్థిక వృద్ధి, ద్రవ్యోల్బణం
చమురు ధరల పెరుగుదల మరియు అంతర్జాతీయ యుద్ధ ప్రభావం వల్ల 2026-27 ఆర్థిక సంవత్సరంలో భారత ఆర్థిక వృద్ధి రేటు 6.9 శాతంగా ఉండవచ్చని ఆర్బీఐ అంచనా వేసింది. ఇది గత ఏడాది అంచనా వేసిన 7.6 శాతం కంటే కొంచెం తక్కువ. అయితే, కొత్త జీడీపీ లెక్కల ప్రకారం భారత్ ఇప్పటికీ వేగంగా అభివృద్ధి చెందుతున్న దేశంగానే కొనసాగుతోంది. ఇక సామాన్యులను ఇబ్బంది పెట్టే ధరల పెరుగుదల ఈ ఏడాది 4.6 శాతంగా ఉండవచ్చని కేంద్ర బ్యాంక్ భావిస్తోంది.
కస్టమర్ కేంద్రంగా సేవలు:
ఆర్బీఐ తన కొత్త ప్రణాళికలో కస్టమర్ సర్వీస్కు పెద్ద పీట వేసింది. ప్రభుత్వ సెక్యూరిటీల మార్కెట్లో పారదర్శకతను పెంచడం, ఆర్థిక సమ్మిళితత్వాన్ని ప్రోత్సహించడం ద్వారా అట్టడుగు వర్గాలకు కూడా బ్యాంకింగ్ సేవలు అందేలా చూడటం ఉత్కర్ష్ 2.0లో భాగం. సాంకేతికతను ఉపయోగించుకుంటూనే, మరోవైపు మారుతున్న ఆర్థిక పరిస్థితులకు అనుగుణంగా ఎప్పటికప్పుడు సమీక్షలు నిర్వహిస్తూ నిబంధనలను సవరించుకుంటామని ఆర్బీఐ స్పష్టం చేసింది.