తేజస్వీ యాదవ్ కు ఊరట.. పరువునష్టం కేసును కొట్టేసిన సుప్రీం
బీహార్ మాజీ ఉప ముఖ్యమంత్రి తేజస్వీ యాదవ్‌పై 'గుజరాతీలు దుండగులు' అనే వ్యాఖ్యపై పెండింగ్‌లో ఉన్న క్రిమినల్ పరువు నష్టం కేసులను సుప్రీంకోర్టు కొట్టివేసింది. గత వారం, జస్టిస్ అభయ్ ఎస్. ఓకా నేతృత్వంలోని ధర్మాసనం తన వ్యాఖ్యలను బేషరతుగా ఉపసంహరించుకుంటూ యాదవ్ నిర్దిష్ట అఫిడవిట్ దాఖలు చేసిన విషయాన్ని పరిగణనలోకి తీసుకుని ఈ కేసులో తన తీర్పును రిజర్వ్ చేసింది.
రాజ్యాంగంలోని ఆర్టికల్ 142 ప్రకారం అహ్మదాబాద్‌లోని మేజిస్ట్రేట్ కోర్టులో యాదవ్‌పై పెండింగ్‌లో ఉన్న క్రిమినల్ పరువునష్టం దావాను రద్దు చేస్తామని గతంలో సుప్రీం కోర్టు సూచించింది. అంతకుముందు యాదవ్ తన వ్యాఖ్యలు గుజరాతీ ప్రజలను లేదా ఒక నిర్దిష్ట రాష్ట్రంలోని ఏ వర్గాన్ని కించపరిచేలా లేదని పేర్కొంటూ అఫిడవిట్ దాఖలు చేశారు. నవంబర్ 2023లో, క్రిమినల్ పరువు నష్టం కేసును గుజరాత్ నుండి బీహార్‌కు బదిలీ చేయాలని తేజస్వి యాదవ్ కోరడంతో సుప్రీంకోర్టు విచారణ ప్రక్రియను నిలిపివేసింది.
గత ఏడాది మార్చిలో పాట్నాలో తేజస్వి యాదవ్ చేసిన ఆరోపణలపై ఫిర్యాదు వచ్చింది. "నేటి కాలంలో గుజరాతీలు మాత్రమే గూండాలు అవుతారని, వారు కూడా క్షమించబడతారని" యాదవ్ అన్నట్లు ఆరోపణలు వచ్చాయి. పంజాబ్ నేషనల్ బ్యాంక్ కుంభకోణంలో కీలక నిందితుడు, పరారీలో ఉన్న వ్యాపారవేత్త మెహుల్ చోక్సీకి రెడ్ కార్నర్ నోటీసును రద్దు చేసిన విషయాన్ని ప్రస్తావిస్తూ, ప్రధాని నరేంద్ర మోదీ, కేంద్ర హోంమంత్రి అమిత్ షాలను ఉద్దేశించి ఆయన ఈ వ్యాఖ్యలు చేశారు.
