Virat Kohli : రూ.80 కోట్ల ఆస్తి బాధ్యత అన్నకు అప్పగించిన కోహ్లీ..అసలు పవర్ ఆఫ్ అటార్నీ అంటే ఏమిటి?

Virat Kohli : టీమిండియా క్రికెటర్ విరాట్ కోహ్లీ గురుగ్రామ్‌లో తనకు ఉన్న లగ్జరీ బంగ్లా బాధ్యతను తన అన్న వికాస్ కోహ్లీకి అప్పగించారు. ఇందుకోసం ఆయన పవర్ ఆఫ్ అటార్నీ అనే చట్టపరమైన పత్రాన్ని రూపొందించారు. విరాట్ ప్రస్తుతం తన భార్య అనుష్క శర్మ, పిల్లలతో కలిసి లండన్‌లో ఉంటున్నారు. దీనివల్ల ఆయన తరచుగా భారత్‌కు వచ్చి ఆస్తి వ్యవహారాలను చూసుకోలేకపోతున్నారు. ఈ నేపథ్యంలో తన ఆస్తికి సంబంధించిన అన్ని పనులను చూసుకునేందుకు వీలుగా తన సోదరుడికి పవర్ ఆఫ్ అటార్నీ ద్వారా అధికారం ఇచ్చారు.

విరాట్ కోహ్లీ గురుగ్రామ్‌లో ఉన్న ఈ బంగ్లా సుమారు రూ.80 కోట్ల విలువ చేస్తుందని సమాచారం. ఈ బంగ్లాతో పాటు అక్కడ ఒక ఫ్లాట్ కూడా ఉంది. పవర్ ఆఫ్ అటార్నీ ఇవ్వడం ద్వారా వికాస్ కోహ్లీకి ఈ ఆస్తికి సంబంధించిన ఏవైనా చట్టపరమైన లేదా ప్రభుత్వపరమైన ప్రక్రియలను నిర్వహించే అధికారం లభించింది. దీనివల్ల విరాట్ కోహ్లీ తరచుగా భారత్‌కు రావాల్సిన అవసరం ఉండదు. వికాస్‌కు విరాట్ తరఫున అన్ని పనులను చూసుకునే అనుమతి లభిస్తుంది. అయితే, ఆస్తికి అసలు యజమాని మాత్రం విరాట్ కోహ్లీయే అవుతారు.

పవర్ ఆఫ్ అటార్నీ అనేది ఒక చట్టపరమైన పత్రం. దీని ద్వారా ఒక వ్యక్తి(ప్రిన్సిపల్) తన తరఫున నిర్దిష్ట లేదా సాధారణ పనులను నిర్వహించడానికి మరొక వ్యక్తి(ఏజెంట్)కి అనుమతి ఇస్తాడు. ఈ అధికారం ఆస్తికి సంబంధించిన వ్యవహారాలు, బ్యాంకింగ్ పనులు లేదా ఏవైనా చట్టపరమైన కార్యకలాపాలకు సంబంధించినది కావచ్చు. పత్రం ఇచ్చిన తర్వాత, ఏజెంట్ తీసుకునే నిర్ణయాలు, ప్రిన్సిపాల్ తీసుకున్న నిర్ణయాలుగానే చట్టపరంగా చెల్లుబాటు అవుతాయి.

పవర్ ఆఫ్ అటార్నీ ప్రధానంగా రెండు రకాలుగా ఉంటుంది:

జనరల్ పవర్ ఆఫ్ అటార్నీ : ఇందులో ఏజెంట్‌కు ప్రిన్సిపాల్‌కు సంబంధించిన అన్ని రకాల పనులను నిర్వహించే పూర్తి స్వేచ్ఛ ఉంటుంది. అంటే, యజమాని తరఫున ఏజెంట్ ఏదైనా నిర్ణయం తీసుకోవచ్చు.

స్పెషల్ లేదా లిమిటెడ్ పవర్ ఆఫ్ అటార్నీ : ఇందులో ఏజెంట్‌కు కేవలం ఒక నిర్దిష్ట పని లేదా పరిమిత బాధ్యతలకు మాత్రమే అధికారం ఇవ్వబడుతుంది. ఉదాహరణకు, ఒక నిర్దిష్ట ఇంటిని అమ్మడం లేదా కొనుగోలు చేయడం వంటి పనులకు మాత్రమే ఏజెంట్‌కు అధికారం ఇవ్వవచ్చు.

పవర్ ఆఫ్ అటార్నీ పత్రాన్ని తయారు చేయడానికి ముందుగా ఒక నాన్-జుడీషియల్ స్టాంప్ పేపర్‌ (సాధారణంగా రూ.100) పై దీనిని రూపొందించాలి. ఆ తర్వాత చట్టబద్ధత కోసం దీనిని నోటరైజ్డ్ చేయించడం తప్పనిసరి. ఈ పత్రంపై ప్రిన్సిపాల్, ఏజెంట్‌ల సంతకాలతో పాటు, ఇద్దరు సాక్షుల సంతకాలు కూడా తప్పనిసరిగా ఉండాలి. ఈ ప్రక్రియ పూర్తయిన తర్వాత, ఏజెంట్‌కు ప్రిన్సిపాల్ తరఫున పనిచేసే అధికారం లభిస్తుంది. ఇది అధికారిక పత్రం కాబట్టి, భవిష్యత్తులో ఎలాంటి వివాదాలకు ఆస్కారం ఉండదు.