TG High Court : హైకోర్టులో కేసీఆర్, హరీశ్ రావుకు చుక్కెదురు.. స్టే ఇచ్చేందుకు నిరాకరణ

బీఆర్ఎస్ అధినేత కేసీఆర్, మాజీ మంత్రి హరీష్ రావులకు తెలంగాణ హైకోర్టులో చుక్కెదురైంది. కాళేశ్వరం ప్రాజెక్టులో అవకతవకలకు పాల్పడినట్టు ఆరోపణలపై ఏర్పాటు చేసిన జస్టిస్ పీసీ ఘోష్ కమిషన్ నివేదికను రద్దు చేయాలని కోరుతూ వారు దాఖలు చేసిన పిటిషన్‌పై తక్షణమే మధ్యంతర ఉత్తర్వులు జారీ చేసేందుకు న్యాయస్థానం నిరాకరించింది.

ఈ పిటిషన్లపై వాదనలు విన్న హైకోర్టు పిటిషనర్లు కోరినట్లుగా స్టే ఇవ్వలేమని స్పష్టం చేసింది. మూడు వారాల్లోగా ఈ పిటిషన్‌పై కౌంటర్ దాఖలు చేయాలని రాష్ట్ర ప్రభుత్వాన్ని ఆదేశిస్తూ, తదుపరి విచారణను నాలుగు వారాలకు వాయిదా వేసింది. ఈ పరిణామం బీఆర్ఎస్ నేతలకు తాత్కాలికంగా నిరాశ కలిగించింది.

ప్రభుత్వ వాదనలు

విచారణ సందర్భంగా రాష్ట్ర ప్రభుత్వం తరఫున అడ్వొకేట్ జనరల్ (ఏజీ) వాదనలు వినిపించారు. కాళేశ్వరంపై జస్టిస్ పీసీ ఘోష్ కమిషన్ ఇచ్చిన నివేదికను తొలుత శాసనసభలో ప్రవేశపెడతామని, ఆ తర్వాతే దాని ఆధారంగా బాధ్యులపై చర్యలు తీసుకుంటామని ఆయన కోర్టుకు వివరించారు. ఈ ప్రక్రియ ఇంకా ప్రారంభం కాలేదని స్పష్టం చేశారు.

నివేదికపై హైకోర్టు ఆదేశం

అంతేకాకుండా, ఈ నివేదిక ఇప్పటికే ప్రజల (పబ్లిక్ డొమైన్)లో అందుబాటులో ఉన్నట్లయితే, దానిని తక్షణమే తొలగించాలని కూడా ప్రభుత్వాన్ని హైకోర్టు ఆదేశించడం గమనార్హం. ఏజీ మాట్లాడుతూ.. ప్రభుత్వం ఇంకా నివేదికలోని విషయాలను బహిర్గతం చేయలేదని, అలాగే కమిషన్ నివేదిక ఆధారంగా ఎవరిపైనా ఎటువంటి ముందస్తు బెదిరింపు చర్యలు తీసుకోలేదని స్పష్టం చేశారు. ఈ కేసులో ప్రభుత్వ చర్యలు నిష్పక్షపాతంగా, న్యాయబద్ధంగా ఉంటాయని కోర్టుకు వివరించారు.

ఈ మొత్తం వ్యవహారం తెలంగాణ రాజకీయాల్లో చర్చనీయాంశంగా మారింది. కాళేశ్వరం ప్రాజెక్ట్ అవకతవకల ఆరోపణలపై జస్టిస్ పీసీ ఘోష్ కమిషన్ నివేదిక భవిష్యత్తులో ఎలాంటి పరిణామాలకు దారితీస్తుందో వేచి చూడాలి.