TG : ఇందిరమ్మ ఇళ్లు.. కలెక్టర్లకు కీలక ఆదేశాలు

ఇందిరమ్మ ఇళ్ల లబ్ధిదారుల ఎంపికలో ఎలాంటి పొరపాట్లు జరగకుండా జాగ్రత్తలు తీసుకోవాలని జిల్లా కలెక్టర్లను గృహనిర్మాణ సంస్థ ఎండీ గౌతమ్ ఆదేశించారు. దరఖాస్తుదారులు పేర్కొన్న స్థలం సరైనదా కాదా అనే విషయాన్ని పరిశీలకులే నిర్ధారించాలని, ఆ తర్వాతే యాప్‌లో వివరాల్ని నమోదు చేయాలని స్పష్టం చేశారు. యాప్‌లో నమోదు చేసిన వివరాలపై 360 డిగ్రీల సాఫ్ట్‌వేర్‌తో మరోసారి పరిశీలన ఉంటుందన్నారు.

ఇందిరమ్మ ఇళ్ల పథకం కింద మొదటి విడతలో నియోజకవర్గానికి 3,500 చొప్పున ఇచ్చేందుకు రెడీ అయ్యారు. తెలంగాణ తొలి విడతలో 4.50 లక్షల ఇళ్లను ఇవ్వాలని ప్రభుత్వం టార్గెట్‌గా పెట్టుకుంది. ఒక్కో ఇంటి నిర్మాణానికి లబ్ధిదారుకి ప్రభుత్వం రూ.5 లక్షలు ఇవ్వనుంది. మెుత్తం 4 విడతల్లో ఈ డబ్బులు లబ్ధిదారుల అకౌంట్లలో జమ చేయనున్నారు. తొలి విడతలో స్థలం ఉన్నవారికి ఇళ్లు మంజూరు చేసేందుకు రెడీ ప్రణాళికలు రచిస్తున్నారు. మొదటి విడతలో మంజూరు చేసే ఇందిరమ్మ ఇళ్లకు రూ.7,740 కోట్లు వెచ్చించనున్నట్లు ప్రభుత్వం స్పష్టం చేసింది. ఈ ఆర్థిక సంవత్సరంలోనే లబ్ధిదారుల ఎంపిక పూర్తి చేసి.. ఇళ్లకు నిధుల కేటాయించేలా రేవంత్ ప్రభుత్వం ప్రణాళికతో ముందుకు సాగుతోంది.