TG : సూపర్ సీఎం.. రేవంత్‌కు రాజాసింగ్ ప్రశంసలు
గణేశ్ నిమజ్జనం కోసం ప్రభుత్వ ఏర్పాట్లపై బీజేపీ సీనియర్ నేత, గోషామహల్ ఎమ్మెల్యే రాజాసింగ్ ( Raja Singh ) హర్షం వ్యక్తం చేశారు. సీఎం రేవంత్ రెడ్డి ( Revanth Reddy ) సూపర్ అంటూ కితాబునిచ్చారు. గణేశ్ నిమజ్జన శోభాయాత్రలో భాగంగా మంగళవారం బాలాపూర్లో పాల్గొన్నారు. ఈ సందర్భంగా మీడియాతో మాట్లాడుతూ.. నిమజ్జనం విషయంలో ఈ సారి ప్రభుత్వంలోని వ్యవస్థలు చాలా బాగా పని చేశాయన్నారు.
ముఖ్యంగా పోలీసు వ్యవస్థ పనితీరు బాగుందన్నారు రాజాసింగ్. ఉత్సవాల ఏర్పాట్ల నుంచి నిమజ్జనం వరకు అన్నింటినీ ఎప్పటికప్పుడు సమీక్షిస్తున్న సీఎం రేవంత్రెడ్డికి హృదయపూర్వక ధన్యవాదాలు తెలిపారు. గతంలో ఏ ముఖ్యమంత్రి చేయని విధంగా ఈసారి సీఎం రేవంత్ రెడ్డి ఖైరతాబాద్ గణేశ్ నిమజ్జన ఏర్పాట్లను స్వయంగా పరిశీలించడం సంతోషకరమన్నారు. అలాగే ఖైరతాబాద్ మండపాన్ని సైతం సీఎం దర్శించారని గుర్తుచేశారు. అన్ని ఏర్పాట్లు. వ్యవస్థలు బాగున్నాయన్నారు.