PONNAM: నిబంధనలు అతిక్రమిస్తే లైసెన్స్ రద్దే
నిబంధనలు పాటించకుండా వాహనాలు నడిపే వాళ్ల డ్రైవింగ్ లైసెన్సులు రద్దు చేస్తామని, వాళ్ల పేరిట భవిష్యత్తులో వాహనాలు రిజిస్ట్రేషన్స్ ఉండకుండా చేస్తామని తెలంగాణ రవాణాశాఖ మంత్రి పొన్నం ప్రభాకర్ తెలిపారు. ఇప్పటికే ట్రాఫిక్ నిబంధనలు అతిక్రమించిన 8వేల మంది లైసెన్సులు రద్దు చేశామని గుర్తు చేశారు. కేంద్రం పరిధిలో ఉన్న సారథి వాహన్ పోర్టల్లో తెలంగాణ చేరబోతోందని అన్నారు. తెలంగాణలో రోడ్డు ప్రమాదాల నివారణపై దృష్టి పెట్టామని చెప్పారు.
రవాణ శాఖలో కీలక మార్పులు
రవాణాశాఖలో పలు కీలక మార్పులు తీసుకొస్తున్నట్లు కూడా పొన్నం ప్రభాకర్ ప్రకటించారు. ప్రధానంగా.. వెహికిల్ స్క్రాప్‌ పాలసీ, వాహనాల ఆటోమేటిక్‌ టెస్టింగ్‌ సెంటర్లు, వాహన్ సారథి పోర్టల్ అమలు, ట్రాఫిక్ రూల్స్‌ కఠినతరం చేయడం, అవగాహన కల్పించడం లాంటి అంశాలపై ప్రత్యేక దృష్టి పెట్టినట్లు వెల్లడించారు. దేశంలోని 28 రాష్ట్రాలు ఇప్పటికే అమలు చేస్తున్న భారత మోటారు వాహన చట్టంలోని వాహన్ సారిథి తెలంగాణలోనూ అమలు చేయబోతున్నామని తెలంగాణ రవాణశాఖమంత్రి పొన్నం ప్రభాకర్ వెల్లడించారు. దీంతో వాహనదారులకు సంబంధించిన అంతరాష్ట్ర ఇబ్బందులకు చెక్‌ పడుతుందని చెప్పారు. అలాగే.. వెహికల్ స్క్రాపింగ్‌ పాలసీ అమలుకు నిర్ణయించామన్నారు. ప్రైవేట్‌ వాహనాల వాలెంటరీ వెహికిల్ స్క్రాపింగ్‌ పాలసీ ద్వారా వాహనదారులకు సర్టిఫికెట్లు ఇచ్చి.. కొత్తగా వాహనాలు కొనుగోలు చేస్తే లైఫ్ టాక్స్‌లో రాయితీలు ఇస్తామన్నారు. బైక్స్ తుక్కుగా మారిస్తే.. లైఫ్ ట్యాక్స్‌లో కనీసం రూ.వెయ్యి నుంచి రూ.ఆరేడు వేల వరకు, ఫోర్ వీలర్ వాహనాలకు అయితే కనీసం రూ.15 వేలు, గరిష్ఠంగా రూ.50 వేల వరకు డిస్కౌంట్ ప్రతిపాదించినట్లు తెలిసింది. కొత్తగా కొనుగోలు చేసే వెహికల్ విలువ ఆధారంగా ఈ డిస్కౌంట్ మొత్తం ఉంటుందని రవాణాశాఖ అధికారులు తెలిపారు. కర్ణాటక, మహారాష్ట్ర లాంటి రాష్ట్రాల్లోని పాలసీలను అధ్యయనం చేసి.. తెలంగాణలోనూ అమలు చేసేందుకు కొత్తగా జీవో తీసుకొచ్చామని తెలిపారు.
కాలుష్య నియంత్రణకు చర్యలు
తెలంగాణలో వాహన కాలుష్య నియంత్రణ, ఫిట్‌నెస్‌కు సంబంధించి కఠిన చర్యలు తీసుకోబోతున్నట్లు వెల్లడించారు మంత్రి పొన్నం ప్రభాకర్. వాహనాల ఫిట్‌నెస్‌ టెస్టింగ్‌ కోసం ఆటోమేటిక్‌ టెస్టింగ్‌ స్టేషన్లు నిర్మిస్తామన్నారు. ప్రస్తుతం ఆర్టీవో ఆఫీసుల్లో వాహనాల ఫిట్‌నెస్‌ టెస్టింగ్‌ సరిగ్గా జరగడం లేదని.. ఇకపై ఆటోమేటిక్‌ టెస్టింగ్‌ సెంటర్లలో వాహనాల ఫిట్‌నెస్‌ సర్టిఫికేట్లు ఇచ్చేలా చర్యలు తీసుకుంటున్నట్లు తెలిపారు. మరోవైపు.. తెలంగాణలో రోడ్డు ప్రమాదాలు తగ్గించేందుకు ప్రత్యేక చర్యలు తీసుకుంటామన్నారు.