TGSRTC : విజయవాడ బస్సుల్లో ఆర్టీసీ డిస్కౌంట్

హైదరాబాద్ నుంచి విజయవాడ వెళ్లే ప్రయాణికులకు తెలంగాణ రాష్ట్ర రోడ్డు రవాణా సంస్థ (టీజీఎస్ ఆర్టీసీ) శుభవార్త తెలిపింది. విజయవాడ మార్గంలో ప్రయాణించే వారికి ప్రత్యేక రాయితీలను ప్రకటిస్తున్నట్లు తెలంగాణ ఆర్టీసీ వెల్లడించింది. లహరి - నాన్ ఏసీ స్లీపర్ కమ్ సీటర్, సూపర్ లగ్జరీ సర్వీసుల్లో 10 శాతం రాయితీ, అదే రాజధాని ఏసీ బస్సుల్లో 8 శాతం డిస్కౌంట్ ఇస్తున్నట్లు టీజీ ఆర్టీసీ తెలిపింది. ఈ మేరకు బుధవారం ఆర్టీసీ యాజమాన్యం ఒక ప్రకటన విడుదల చేసింది. ఈ రాయి తీతో కల్పించే డిస్కౌంట్ సదుపాయాన్ని ప్రయాణికులు వినియోగించు కోవాలని సూచించింది.

టీజీఎస్ఆర్టీసీ బస్సుల్లో ముందస్తు రిజర్వేషన్ కోసం http://tgsrtcbus.in/అధికారిక వెబ్సైటిని సందర్శించాలని సూచించింది. ఈ విషయాన్ని టీజీఎస్ ఆర్టీసీ ఎండీ సజ్జనార్ సోషల్ మీడియా ప్లాట్ఫామ్ ఎక్స్(ట్విట్టర్)లో వెల్లడించారు. విజయవాడ రూట్లో ప్రయాణించే వారికి టికెట్లపై ఆర్టీసీ డిస్కౌంట్ ఇస్తున్నట్లు ఆయన తెలిపారు. తెలంగాణలోనే రెండో అతిపెద్దదైన గొల్లగట్టు జాతర సూర్యాపేటలో ఘనంగా జరుగుతోంది. రాష్ట్రంలోని నలుమూలల నుంచి భక్తులు ఈ జాతరకు వెళ్లే అవకాశం ఉంది. దీనిని దృష్టిలో పెట్టుకుని ఆర్టీసీ ఈ ఆఫర్ ప్రకటించినట్లు తెలుస్తోంది. అలాగే.. ఈ నెల 26న శివరాత్రి పండుగ నేపథ్యంలో హైదరాబాద్లో ఉండేవారు సొంతూర్లు వెళ్లే అవకాశం కూడా ఉండటంతో ఆర్టీసీకి భారీ ఎత్తున ఆదాయం రానుందని యాజమాన్యం భావిస్తోంది.