Telangana Weather : తెలంగాణలో మూడు రోజులు వానలు : వాతావరణ శాఖ
తెలంగాణలో రానున్న మూడు రోజుల పాటు ఉరుములు, మెరుపులతో కూడిన తేలికపాటి నుంచి మోస్తరు వర్షాలు కురిసే అవకాశముందని వాతావరణ శాఖ వెల్లడించింది. సోమవారం ఉమ్మడి ఆదిలాబాద్‌, కరీంనగర్‌, ఖమ్మం, మెదక్‌, నిజామాబాద్‌, మహబూబ్‌నగర్‌, నల్గొండ, రంగారెడ్డి, హైదరాబాద్‌, ములుగు జిల్లాల్లో తేలికపాటి నుంచి మోస్తరు వర్షం కురిసే అవకాశముంది. మంగళ, బుధవారాల్లో ఉమ్మడి నిజామాబాద్‌, ఖమ్మం, నల్గొండ, వరంగల్‌, హైదరాబాద్‌, రంగారెడ్డి, మెదక్‌, మహబూబ్‌నగర్‌తోపాటు నిర్మల్‌ జిల్లాల్లో తేలికపాటి నుంచి మోస్తరు వర్షాలు కురవొచ్చు.ఈ నేపథ్యంలో ఆయా జిల్లాలకు వాతావరణ శాఖ ఎల్లో హెచ్చరికలు జారీ చేసింది. దక్షిణ ఆంధ్రప్రదేశ్ తీరంలో పశ్చిమ-మధ్య బంగాళాఖాతంలో సగటు సముద్ర మట్టం నుంచి 5.8 కి.మీ. ఎత్తు వరకు ఓ చక్రవాతపు ఆవర్తనం కేంద్రీకృతమైంది. దీని ప్రభావంతో తెలంగాణ రాష్ట్రంలో తూర్పు, ఆగ్నేయ దిశల నుంచి గాలులు వీస్తున్నాయి.
హైదరాబాద్‌లోని పలు ప్రాంతాల్లో వర్షం
హైదరాబాద్‌ నగరంలోని పలుచోట్ల వర్షం కురిసింది. కూకట్‌పల్లి, ఆల్విన్‌ కాలనీ, నిజాంపేట, కేపీహెచ్‌బీ కాలనీ, ప్రగతినగర్‌, బాచుపల్లి, కొంపల్లి, కుత్బుల్లాపూర్‌, అల్వాల్‌, నేరెడ్‌మెట్‌, గచ్చిబౌలి, మియాపూర్‌, ఖాజాగూడ, బంజారాహిల్స్‌లో వర్షం పడింది. అలాగే. సంగారెడ్డి జిల్లా పటాన్‌చెరు, వికారాబాద్‌ జిల్లా తాండూరుతో పాటు బహదూర్‌పల్లి, సూరారం, గుండ్లపల్లి పోచంపల్లి, సుచిత్ర, కొంపల్లి, జీడిమెట్ల, బాలానగర్‌, మేడ్చల్‌, కృష్ణాపూర్‌, గండిమైసమ్మ, మల్లంపేట్‌, దుండిగల్‌లోనూ వర్షం కురిసింది. ఒక్కసారిగా కురిసిన వర్షానికి వాహనదారులు ఇబ్బందులకు గురయ్యారు. ఇదిలా ఉండగా.. హైదరాబాద్‌లో ఆకాశం సాధారణంగా మేఘావృతమై ఉంటుందని.. నగరంలో తేలికపాటి నుంచి మోస్తరు వర్షాలు కురిసే అవకాశం ఉందని హైదరాబాద్‌ వాతావరణ కేంద్రం తెలిపింది. పలుచోట్ల ఉరుములు, మెరుపులు, ఈదురుగాలులతో కూడిన వర్షాలు పడుతాయని పేర్కొంది. తూర్పు, ఆగ్నేయ దిశలో గాలులు వీచే అవకాశం ఉందని తెలిపింది.