Havy Rainfall : ఉత్తర తెలంగాణలో కుండపోత వర్షాలు.. 28శాతం అధిక వర్షపాతం నమోదు

ఉత్తర తెలంగాణ జిల్లాల్లో వర్షాలు ఆగడం లేదు. వరుసగా మూడో రోజు గురువారం కూడా భారీ వర్షాలు కురిశాయి. కామారెడ్డి, నిర్మల్ జిల్లాలతో పాటు నిజామాబాద్‌లోని కొన్ని ప్రాంతాల్లో కుండపోత వర్షాలు పడ్డాయి. కరీంనగర్, మెదక్ జిల్లాల్లో అతి భారీ వర్షాలు కురవగా, ఆదిలాబాద్, జగిత్యాల, రాజన్న సిరిసిల్ల, కుమ్రంభీం ఆసిఫాబాద్ జిల్లాల్లో భారీ వర్షపాతం నమోదైంది. కామారెడ్డి, నిజామాబాద్ జిల్లాల్లో మరోసారి 20 సెం.మీ. పైగా వర్షం పడింది.

అత్యధిక వర్షపాతం వివరాలు:

కామారెడ్డి జిల్లాలోని అన్ని మండలాల్లోనూ 10 సెం.మీ.కు పైగానే వర్షపాతం రికార్డయింది. అత్యధికంగా:

కామారెడ్డి జిల్లా గాంధారిలో 23.7 సెం.మీ.

నిజామాబాద్ జిల్లా ముగ్పాల్‌లో 21.1 సెం.మీ.

నిర్మల్ జిల్లా ముథోల్‌లో 18.8 సెం.మీ.

కామారెడ్డి జిల్లా బాన్సువాడలో 18.3 సెం.మీ.

రాష్ట్రంలో సాధారణం కంటే 28శాతం అధిక వర్షపాతం:

గత మూడు రోజులుగా కురుస్తున్న భారీ వర్షాలతో రాష్ట్రంలో వర్షపాతం లెక్కలు మారిపోయాయి. వర్షాకాలం మొదలైనప్పటి నుంచి ఇప్పటివరకు రాష్ట్రంలో సగటు వర్షపాతం 55.85 సెం.మీ. కురవాల్సి ఉండగా, ఏకంగా 71.43 సెం.మీ. కురిసింది. ఇది సాధారణం కంటే 28 శాతం ఎక్కువ.

జిల్లాల వారీగా వర్షపాతం:

అత్యధిక వర్షపాతం రికార్డయిన జిల్లాలు: మెదక్, నాగర్‌కర్నూల్, మహబూబ్‌నగర్, యాదాద్రి భువనగిరి, వనపర్తి, కామారెడ్డి, నారాయణపేట, సిద్దిపేట.

అధిక వర్షపాతం రికార్డయిన జిల్లాలు: రంగారెడ్డి, సంగారెడ్డి, సూర్యాపేట, జోగులాంబ గద్వాల, నల్గొండ, వికారాబాద్, హైదరాబాద్, మేడ్చల్ మల్కాజిగిరి, ఖమ్మం, వరంగల్.

ఇప్పటివరకు అత్యధికంగా కామారెడ్డి జిల్లాలో 103.81 సెం.మీ. వర్షపాతం నమోదైంది.

వచ్చే ఐదు రోజుల పాటు రాష్ట్రంలో మోస్తరు వర్షాలు కురిసే అవకాశం ఉందని భారత వాతావరణ శాఖ వెల్లడించింది. ఈ మేరకు ఎల్లో అలర్ట్‌ను కూడా జారీ చేసింది.