Chiranjeevi : తమ్ముడు నీ లేఖ హృదయాన్ని తాకింది.. పవన్ విషెస్‌కు చిరు రిప్లై
మెగాస్టార్ చిరంజీవి తన 70వ పుట్టినరోజును జరుపుకుంటున్న సందర్భంగా సోషల్ మీడియాలో ఆయనకు శుభాకాంక్షలు వెల్లువెత్తాయి. అయితే ఆయన తమ్ముడు, ఉప ముఖ్యమంత్రి పవన్ కల్యాణ్ చేసిన పోస్ట్ అభిమానులందరి హృదయాలను తాకింది. ‘‘మీకు తమ్ముడిగా పుట్టడం నా అదృష్టం’’ అంటూ పవన్ కల్యాణ్ చిరంజీవికి పుట్టినరోజు శుభాకాంక్షలు తెలిపారు.
పవన్‌కు చిరంజీవి భావోద్వేగ లేఖ
పవన్ కల్యాణ్ శుభాకాంక్షలకు స్పందించిన చిరంజీవి.. తన తమ్ముడికి ప్రేమతో ఓ లేఖ విడుదల చేశారు. ఆ లేఖలో ‘‘తమ్ముడు కల్యాణ్.. ప్రేమతో నీవు పంపిన పుట్టినరోజు శుభాకాంక్షలు నా హృదయాన్ని తాకాయి. నన్ను చూసి నువ్వెంత గర్విస్తున్నావో, నీ విజయాల్ని, నీ పోరాటాన్ని నేను అంతగా ఆస్వాదిస్తున్నాను. నీ కార్యదీక్ష, పట్టుదల చూసి ప్రతి క్షణం గర్వపడుతూనే ఉన్నా’’ అని లేఖలో తెలిపారు.
అంతేకాకుండా పవన్ కల్యాణ్ నాయకత్వ లక్షణాలను ప్రశంసిస్తూ.. ‘‘నిన్ను నమ్మినవాళ్లకు ఏదో చేయాలన్న తపనే నీకు ఎప్పటికప్పుడు కొత్త శక్తిని ఇస్తుంది. ఈ రోజు నీ వెనక కోట్లాదిమంది జనసైనికులు ఉన్నారు. ఆ సైన్యాన్ని ఓ రాజువై నడిపించు. వారి ఆశలకు, కలలకు కొత్త శక్తినివ్వు’’ అని చిరంజీవి ఆకాంక్షించారు. అభిమానుల ఆశీర్వాదం, ప్రేమ నీకు మెండుగా లభిస్తూనే ఉండాలి. ఓ అన్నయ్యగా నా ఆశీర్వచనాలు ఎప్పుడూ నీకు ఉంటాయి. నీ ప్రతి అడుగులోనూ విజయం నిన్ను వరించాలని ఆ భగవంతుడ్ని కోరుకుంటున్నాను’’ అంటూ పవన్‌తో ఉన్న అరుదైన ఫోటోలను చిరంజీవి షేర్ చేశారు.