Crude Oil : మండిపోతున్న చమురు ధరలు.. 1983 తర్వాత అత్యంత భారీ పెరుగుదల.

Crude Oil : మధ్యప్రాచ్యంలో రగులుతున్న యుద్ధ జ్వాలలు అంతర్జాతీయ ఇంధన మార్కెట్‌ను అతలాకుతలం చేస్తున్నాయి. ఇరాన్ చుట్టూ ముదురుతున్న ఉద్రిక్తతలు ప్రపంచ దేశాల వెన్నులో వణుకు పుట్టిస్తున్నాయి. క్రూడ్ ఆయిల్ ధరలు రాకెట్ వేగంతో దూసుకుపోతూ 115 డాలర్ల ప్రమాదకర స్థాయిని దాటేశాయి. అంతర్జాతీయ మార్కెట్‌లో చమురు ధరలు ఇలా అదుపుతప్పడం వల్ల ప్రపంచవ్యాప్తంగా ద్రవ్యోల్బణం కొత్త పుంతలు తొక్కే ప్రమాదం ఉంది. రవాణా ఖర్చులు భారీగా పెరగడం వల్ల నిత్యావసర వస్తువుల ధరలు ఆకాశాన్నంటుతాయి, దీనివల్ల సామాన్యుడి జేబుకు చిల్లు పడటం ఖాయంగా కనిపిస్తోంది.

హార్ముజ్ జలసంధి కేవలం ఒక సముద్ర మార్గం మాత్రమే కాదు, ఇది ప్రపంచ ఆర్థిక వ్యవస్థకు జీవనాడి. ప్రపంచవ్యాప్తంగా వాడే మొత్తం చమురులో సుమారు 20 శాతం ఇక్కడి నుంచే రవాణా అవుతుంది. ఇరాన్ యుద్ధం కారణంగా ఈ కీలక మార్గం దాదాపుగా మూతపడింది. దాడుల భయంతో పెద్ద పెద్ద ట్యాంకర్ కంపెనీలు, ఓడల యజమానులు తమ నౌకలను ఈ ప్రాంతం నుంచి పంపేందుకు సాహసించడం లేదు. రవాణా నిలిచిపోవడమంటే మార్కెట్‌లో చమురు కొరత ఏర్పడటమే. సరఫరా గొలుసు దెబ్బతినడంతో లభ్యత తగ్గి ధరలు అమాంతం పెరిగిపోతున్నాయి.

1983 తర్వాత ఇదే అతిపెద్ద విస్ఫోటనం

ప్రస్తుత సంక్షోభం ఎంత తీవ్రంగా ఉందో గణాంకాలే చెబుతున్నాయి. అమెరికన్ వెస్ట్ టెక్సాస్ ఇంటర్మీడియట్ చమురు ధరలు ఏకంగా 28 శాతం పెరిగి 116 డాలర్లకు చేరువయ్యాయి. అటు బ్రెంట్ క్రూడ్ కూడా 26 శాతం వృద్ధితో 117 డాలర్ల వద్ద ట్రేడవుతోంది. ఫ్యూచర్స్ మార్కెట్ చరిత్రలో 1983 తర్వాత ఒకే వారంలో ఇంత భారీ స్థాయిలో ధరలు పెరగడం ఇదే మొదటిసారి. హార్ముజ్ మార్గంలో రాకపోకలు త్వరగా పునరుద్ధరించబడకపోతే, ఈ సంక్షోభం మరింత భీకర రూపం దాల్చుతుందని ఇంధన రంగ నిపుణులు హెచ్చరిస్తున్నారు.

పడిపోయిన ఉత్పత్తి - గల్ఫ్ దేశాల వెనకడుగు

కేవలం రవాణా మాత్రమే కాదు, చమురు ఉత్పత్తి కూడా దారుణంగా పడిపోతోంది. యుద్ధ భయంతో గల్ఫ్ దేశాలు తమ కార్యకలాపాలను తగ్గించుకుంటున్నాయి. నౌకల భద్రత దృష్ట్యా కువైట్ తన రిఫైనరీ పనుల్లో కోత విధించగా, ఇరాక్ పరిస్థితి మరీ ఆందోళనకరంగా ఉంది. యుద్ధానికి ముందు రోజుకు 4.3 మిలియన్ బ్యారెల్స్ ఉత్పత్తి చేసిన ఇరాక్, ఇప్పుడు కేవలం 1.3 మిలియన్ బ్యారెల్స్ మాత్రమే ఉత్పత్తి చేస్తోంది. అంటే ఏకంగా 70 శాతం ఉత్పత్తి పడిపోయింది. అటు యూఏఈ కూడా తమ నిల్వలపై ఒత్తిడి పడకుండా ఉండేందుకు సముద్ర తీర ప్రాంతాల్లో ఉత్పత్తిని చాలా జాగ్రత్తగా నిర్వహిస్తోంది. ఈ పరిణామాలు చూస్తుంటే ప్రపంచం మరో ఇంధన విపత్తు వైపు వెళ్తున్నట్లు స్పష్టమవుతోంది.