Israel : ఇజ్రాయెల్ పైకి హెజ్‌బొల్లా ప్రతీకారం.. 140 రాకెట్లతో దాడి
పేజర్లు, వాకీటాకీల పేలుళ్ల నేపథ్యంలో ఇజ్రాయెల్ పై హెజ్ బొల్లా ప్రతి దాడికి దిగింది. ఆ దేశంపైకి తాజాగా 140 రాకెట్లు ప్రయోగించింది. ఇజ్రాయెల్ హద్దుమీరిందని, ప్రతి దాడి ఉంటుందంటూ హెజ్ బొల్లా అధినేత హసన్ సస్రల్లా పేర్కొన్న వేళ ఈ రాకెట్లు ప్రయోగించారు.
ఉత్తర ఇజ్రాయెల్లోని పలు మిలటరీ బ్యారెక్స్ పై ఈ దాడులు జరిపినట్లు హెజ్ బొల్లా పేర్కొంది. దక్షిణ లెబనాన్లోని ఇజ్రాయెల్ జరిపిన దాడికి ప్రతిగా రాకెట్లతో దాడులకు పాల్పడినట్లు తెలిపింది. లెబనాన్
సరిహద్దుల నుంచి మూడు దఫాలుగా రాకెట్లు దూసుకొచ్చిన విషయాన్ని ఇజ్రాయెల్ మిలటరీ సైతం ధ్రువీకరించింది. నష్టం వివరాలు మాత్రం తెలియరాలేదు.
పాలస్తీనాలోని హమాస్ పై దృష్టి పెట్టిన ఇజ్రాయెల్.. ఇప్పుడు హెజ్ బొల్లాను లక్ష్యంగా చేసుకుంది. ఈ క్రమంలోనే ఇటీవల పేజర్లు, వాకీటాకీల పేలుళ్లతో లెబనాన్ అట్టుడికింది. ఈ పేలుళ్ల వెనుక ఇజ్రాయెల్ కుట్ర ఉందనేది హెజ్ బొల్లా వాదన. ఈ క్రమంలోనే దక్షిణ లెబనాన్ పై ఇజ్రాయెల్ వైమానిక దాడులతో విరుచుకుపడగా.. హెజ్ బొల్లా ప్రతీకార దాడికి దిగింది.