India-EU FTA Deal : భారత్-ఈయూ చారిత్రాత్మక వాణిజ్య ఒప్పందం..ఇక ఐరోపా మార్కెట్లో మనదే హవా.

India-EU FTA Deal : ఫ్రీ ట్రేడ్ అగ్రిమెంట్ అంటే రెండు దేశాలు లేదా సమూహాల మధ్య జరిగే ఒక ప్రత్యేక ఒప్పందం. దీని ద్వారా ఒకరి వస్తువులపై మరొకరు విధించే దిగుమతి సుంకాలను భారీగా తగ్గిస్తారు. దీనివల్ల వ్యాపారంలో అడ్డంకులు తొలగిపోయి, ఎగుమతులు, దిగుమతులు వేగంగా పెరుగుతాయి. భారత్, యూరోపియన్ యూనియన్ మధ్య ఈ ఒప్పందం కుదిరితే, సుమారు 200 కోట్ల మంది జనాభా ఉన్న అతిపెద్ద మార్కెట్ మనకు అందుబాటులోకి వస్తుంది. ఇది ప్రపంచంలోనే అతిపెద్ద వాణిజ్య భాగస్వామ్యాలలో ఒకటిగా నిలవనుంది.

ఈ కీలక ఒప్పందాన్ని ఖరారు చేసేందుకు యూరోపియన్ యూనియన్ ప్రతినిధి బృందం జనవరి 25 నుంచి 27 మధ్య భారతదేశంలో పర్యటించనుంది. ఈ పర్యటనలో భాగంగా 16వ భారత్-ఈయూ శిఖరాగ్ర సమావేశం జరగనుంది. విశేషమేమిటంటే.. ఈయూ ప్రతినిధులు భారతదేశ 77వ గణతంత్ర దినోత్సవ వేడుకలకు ముఖ్య అతిథులుగా హాజరుకానున్నారు. ఈ వేడుకల సాక్షిగానే ఈ చారిత్రాత్మక ఒప్పందంపై తుది సంతకాలు జరిగే అవకాశం ఉందని దౌత్య వర్గాలు భావిస్తున్నాయి. దీనివల్ల భారతీయ వస్త్రాలు, తోలు ఉత్పత్తులు, రత్నాలు, ఆభరణాల ఎగుమతులు ఐరోపా దేశాలకు గణనీయంగా పెరగనున్నాయి.

అయితే ఈ ఒప్పందంలో ఇంకా కొన్ని చిక్కుముడులు విడవాల్సి ఉంది. ముఖ్యంగా వ్యవసాయ ఉత్పత్తుల వ్యాపారం, ఐరోపా సమాఖ్య విధిస్తున్న కఠినమైన పర్యావరణ నిబంధనలు (CBAM - కార్బన్ టాక్స్), మేధో సంపత్తి హక్కుల (Patents) విషయంలో ఇరు పక్షాల మధ్య చర్చలు కొనసాగుతున్నాయి. ఈ సాంకేతికపరమైన అంశాలపై రాజకీయ స్థాయిలో నిర్ణయం తీసుకుంటేనే డీల్ సాఫీగా ముందుకు సాగుతుంది. అయినప్పటికీ ప్రస్తుత పరిస్థితుల్లో భారత్ వంటి బలమైన ఆర్థిక శక్తితో చేతులు కలపడం ఐరోపాకు కూడా ఎంతో అవసరమని ఆ దేశాలు గుర్తిస్తున్నాయి.

ఈ ఒప్పందం కేవలం వ్యాపారానికే పరిమితం కాకుండా రక్షణ, భద్రత రంగాలకు కూడా విస్తరించనుంది. సముద్ర భద్రత, ఉగ్రవాద వ్యతిరేక పోరాటం, సైబర్ భద్రత, రక్షణ పరికరాల తయారీలో భారత్‌ను తన ప్రధాన భాగస్వామిగా ఈయూ భావిస్తోంది. అంతేకాకుండా, భారత్ నుంచి వలస వెళ్లే నిపుణులకు ఇది మంచి వార్త కానుంది. ఈ ఒప్పందం ద్వారా భారతీయ విద్యార్థులు, పరిశోధకులు, నైపుణ్యం కలిగిన ఐటీ నిపుణులకు యూరప్ దేశాల్లో పని చేసేందుకు వీసా నిబంధనలు సులభతరం అయ్యే అవకాశం ఉంది. సీజనల్ వర్కర్లకు కూడా మెరుగైన అవకాశాలు లభిస్తాయి.

మొత్తానికి జనవరి చివరలో జరగబోయే ఈ శిఖరాగ్ర సమావేశం భారత్ భవిష్యత్తుకు చాలా కీలకం. ఐరోపా సమాఖ్యతో దోస్తీ కుదిరితే, చైనా వంటి దేశాలపై ఆధారపడటం తగ్గి మన సొంత సరఫరా గొలుసు బలోపేతం అవుతుంది. ఇది కేవలం ఆర్థిక వృద్ధిని మాత్రమే కాకుండా, ప్రపంచ వేదికపై భారతదేశం దౌత్యపరమైన బలాన్ని కూడా చాటిచెబుతుంది. ఈ డీల్ ఖరారైతే వచ్చే పదేళ్లలో భారత్‌కు వేల కోట్ల పెట్టుబడులు వచ్చే అవకాశం ఉందని ఆర్థిక నిపుణులు విశ్లేషిస్తున్నారు.