India US Trade Deal : ఢిల్లీకి అమెరికా ఉన్నతాధికారులు..భారత్-అమెరికా వాణిజ్య ఒప్పందంపై చర్చలు షురూ.

India US Trade Deal : భారతదేశం, అమెరికా మధ్య చాలా కాలంగా పెండింగ్‌లో ఉన్న వాణిజ్య ఒప్పందం గురించి చర్చలు మరోసారి వేగం పుంజుకున్నాయి. అమెరికా వాణిజ్య ప్రతినిధి కార్యాలయం నుంచి ఒక ఉన్నత స్థాయి బృందం ఢిల్లీకి చేరుకున్న తర్వాత, రెండు రోజులపాటు కీలక చర్చలు ప్రారంభమయ్యాయి. ఈ సమావేశాన్ని, భవిష్యత్తులో సాధ్యమయ్యే మొదటి దశ వాణిజ్య ఒప్పందం దిశగా ఒక పెద్ద అడుగుగా భావిస్తున్నారు. ఈ ఒప్పందం ద్వారా రెండు దేశాల మధ్య వాణిజ్య సంబంధాలు మరింత బలపడనున్నాయి.

కేంద్ర వాణిజ్య, పరిశ్రమల శాఖ మంత్రి పీయూష్ గోయల్ మాట్లాడుతూ.. భారత్, అమెరికా మధ్య ఒప్పందం నిరంతరం ముందుకు సాగుతోందని, అనేక సంక్లిష్ట సమస్యలపై కూడా సానుకూల పురోగతి సాధించబడిందని అన్నారు. పెద్ద ఎత్తున, సమగ్ర వాణిజ్య ఒప్పందానికి మార్గం సుగమం చేయడానికి, రెండు దేశాల బృందాలు త్వరగా పరిష్కారం సాధ్యమయ్యే రంగాలపై ప్రధానంగా దృష్టి సారిస్తున్నాయని ఆయన తెలిపారు.

ఈ సమావేశంలో అధికారులు అనేక కీలక అంశాలపై చర్చించే అవకాశం ఉంది. అవి.. వ్యవసాయ ఉత్పత్తులపై టారిఫ్‌లు, మార్కెట్ యాక్సెస్, స్టీల్, అల్యూమినియం వంటి ఉత్పత్తులపై సుంకాల తగ్గింపు, మెడికల్ పరికరాల ధరలు, నియంత్రణలపై చర్చ, ఇన్ఫర్మేషన్ టెక్నాలజీ సేవలు, మార్కెట్ యాక్సెస్.

అమెరికా తరపున భారతదేశంలోని కొన్ని ఉత్పత్తులపై ఉన్న అధిక టారిఫ్‌లను తగ్గించాలని చాలా కాలంగా డిమాండ్ ఉంది. అదే సమయంలో భారతదేశం తమ ఎగుమతులకు వెన్నెముకగా ఉన్న పరిశ్రమలలో స్థిరమైన మార్కెట్ యాక్సెస్‌ను అమెరికా నుంచి ఆశిస్తోంది.

ఇటీవలి సంవత్సరాలలో రెండు దేశాలు కలిసి అనేక వాణిజ్య వివాదాలను పరిష్కరించుకున్నాయి. దీనివల్ల చర్చల్లో ముందుకు సాగడం సులభమైంది. ఉదాహరణకు.. భారత్ కొన్ని అమెరికన్ వ్యవసాయ ఉత్పత్తులపై టారిఫ్‌లను పాక్షికంగా తగ్గించడం, అమెరికా భారతీయ స్టీల్ పై కొన్ని కస్టమ్స్ సుంకాల వివాదాలను తగ్గించడం వంటి చర్యలు ఈ సానుకూల వాతావరణానికి నిదర్శనం.

భారత్, అమెరికా మధ్య వాణిజ్యం 2023-24లో దాదాపు $200 బిలియన్ల స్థాయికి చేరుకుంది. ఇప్పుడు రెండు దేశాలు దీనిని 2030 నాటికి రెట్టింపు చేయాలని లక్ష్యంగా పెట్టుకున్నాయి. ఈ మొదటి దశ ఒప్పందం విజయవంతం అయితే రాబోయే సంవత్సరాలలో పెట్టుబడి, సాంకేతిక సహకారం, సప్లై చైన్ పార్టనర్ షిప్ లో భారీ వృద్ధిని చూడవచ్చని నిపుణులు భావిస్తున్నారు. ఈ చర్చల ఫలితాలు కేవలం రెండు దేశాల వాణిజ్య సంబంధాలనే కాకుండా ప్రపంచ ఆర్థిక వాతావరణంలో కూడా సానుకూల సంకేతాలను ఇస్తాయి.