International News : పాకిస్థాన్‌లో ఆర్థిక గణన: సంచలన నిజాలు వెల్లడి
పాకిస్థాన్‌లో మొదటిసారిగా పూర్తిస్థాయిలో నిర్వహించిన ఆర్థిక గణనలో అనేక దిగ్భ్రాంతికరమైన విషయాలు బయటపడ్డాయి. ఈ గణాంకాలు దేశంలో స్కూళ్లు, ఆసుపత్రుల కంటే మతపరమైన కట్టడాలైన మసీదులు ఎక్కువగా ఉన్నాయని స్పష్టం చేస్తున్నాయి. సుమారు 25 కోట్ల జనాభా ఉన్న ఈ దేశంలో, విద్య, వైద్యం వంటి కీలక రంగాల కంటే మతానికే అధిక ప్రాధాన్యత ఇస్తున్నారని ఈ నివేదిక తేటతెల్లం చేస్తోంది.
ఈ సర్వే ప్రకారం, పాకిస్థాన్‌లో ఆరు లక్షలకు పైగా మసీదులు, 36 వేల మతపరమైన సెమినరీలు ఉన్నాయి. అయితే, దేశ భవిష్యత్తుకు అత్యంత అవసరమైన పాఠశాలలు కేవలం 2.69 లక్షలు మాత్రమే. వైద్య రంగం పరిస్థితి మరింత దయనీయంగా ఉంది. దేశంలో 1.19 లక్షల ఆసుపత్రులు మాత్రమే ఉండగా, ప్రతి 2,083 మందికి ఒక్క ఆసుపత్రి మాత్రమే అందుబాటులో ఉంది. ఇది పోషకాహార లోపం, అనేక వ్యాధులతో బాధపడుతున్న ఆ దేశ ప్రజలకు ఆరోగ్య సేవలు ఎంత తక్కువగా ఉన్నాయో తెలియజేస్తోంది.
ఆర్థిక అసమానతలు, అసంఘటిత ఆర్థిక వ్యవస్థ
ఉన్నత విద్యా రంగం కూడా సంక్షోభంలో ఉన్నట్లు ఈ సర్వే వెల్లడించింది. పాకిస్థాన్‌లో కేవలం 11,568 కళాశాలలు, 214 విశ్వవిద్యాలయాలు మాత్రమే ఉన్నాయి. ఇది మానవ వనరుల నాణ్యతపై తీవ్ర ప్రభావాన్ని చూపుతుందని నిపుణులు అభిప్రాయపడుతున్నారు.
అంతేకాకుండా, ఈ గణన పాకిస్థాన్ ఆర్థిక వ్యవస్థలోని లోపాలను కూడా బయటపెట్టింది. దేశంలో మొత్తం 71.43 లక్షల వ్యాపార సంస్థలు ఉన్నప్పటికీ, వాటిలో కేవలం 2.5 లక్షల సంస్థలు మాత్రమే అధికారికంగా సెక్యూరిటీస్ అండ్ ఎక్స్ఛేంజ్ కమిషన్ ఆఫ్ పాకిస్థాన్‌లో నమోదయ్యాయి. 95 శాతం వ్యాపారాలు పది మంది కంటే తక్కువ సిబ్బందితో నడిచే చిన్న పరిశ్రమలే. పశుపోషణ, టైలరింగ్, ఆన్‌లైన్ సేవలు వంటి అసంఘటిత రంగాలపై 1.09 కోట్ల మంది ఆధారపడి జీవిస్తున్నారని నివేదిక పేర్కొంది.
రక్షణ రంగానికే పెద్దపీట
ఈ నివేదికను ప్లానింగ్ మినిస్టర్ అహ్సాన్ ఇక్బాల్ విడుదల చేశారు. పొరుగు దేశాలు ఎన్నోసార్లు ఆర్థిక గణనలు చేపట్టి అభివృద్ధిని అంచనా వేసుకుంటుండగా, పాకిస్థాన్ స్వాతంత్ర్యం వచ్చిన 78 ఏళ్లకు ఈ పని చేయడం గమనార్హం అని ఆయన అన్నారు. చాలా సంవత్సరాలుగా రక్షణ రంగానికి అధిక ప్రాధాన్యత ఇవ్వడం, ప్రభుత్వ వ్యవహారాలపై సైన్యం పెత్తనం చేయడం వంటి కారణాల వల్ల విద్య, వైద్యం వంటి ముఖ్యమైన రంగాలు నిర్లక్ష్యానికి గురయ్యాయని విశ్లేషకులు చెబుతున్నారు. ఈ సర్వేలో పంజాబ్, సింధ్ రాష్ట్రాలతో పోలిస్తే ఖైబర్ పఖ్తుంఖ్వా, బలూచిస్థాన్ వంటి ప్రాంతాల్లో ఆర్థిక, సామాజిక అసమానతలు ఎక్కువగా ఉన్నాయని కూడా తేలింది.