USA Jobs Crisis : అమెరికాలో స్కిల్డ్ వర్కర్స్ కొరత.. కోటి రూపాయలు జీతం ఇస్తామన్నా ఎవరూ దొరకట్లేదట.

USA Jobs Crisis : అమెరికాలో ప్రస్తుతం ఒక వింత పరిస్థితి నెలకొంది. లక్షల రూపాయలు కాదు, ఏకంగా కోటి రూపాయల వరకు జీతం ఆఫర్ చేస్తున్నా కూడా కంపెనీలకు పనిచేసేవారు దొరకడం లేదు. వలసదారుల వీసా నిబంధనలు కఠినతరం చేయడం, స్థానిక యువత సాంకేతికత వైపు మళ్లడం వల్ల ఈ సమస్య తీవ్రమైంది. ముఖ్యంగా, మెకానిక్, ప్లంబింగ్, ఎలక్ట్రీషియన్ వంటి చేతి వృత్తుల కార్మికుల కొరత అమెరికా ఆర్థిక వ్యవస్థను కలవరపెడుతోంది.

ఫోర్డ్ సీఈఓ ఆవేదన, కోటి జీతం ఆఫర్

ప్రముఖ ఫోర్డ్ మోటార్ కంపెనీ సీఈఓ జిమ్ ఫార్లీ ఈ సమస్య గురించి ఇటీవల బహిరంగంగా మాట్లాడారు. తమ కంపెనీలో దాదాపు 5,000 మెకానిక్ పోస్టులను భర్తీ చేయలేకపోతున్నామని ఆయన తెలిపారు. ఈ ఉద్యోగాలకు సంవత్సరానికి కోటి రూపాయల (సుమారు 1,20,000 డాలర్లు) వరకు జీతం ఆఫర్ చేస్తున్నా, అర్హులైన, నైపుణ్యం కలిగిన కార్మికులు దొరకడం లేదని ఆయన ఆవేదన వ్యక్తం చేశారు.

చేతి వృత్తులకే భారీ డిమాండ్

మెకానిక్, ప్లంబర్, ట్రక్ డ్రైవర్, ఫ్యాక్టరీ వర్కర్, ఎలక్ట్రీషియన్ వంటి చేతి వృత్తులకు అమెరికాలో భారీ డిమాండ్ ఉంది. అయితే, స్థానిక అమెరికన్లలో ఈ నైపుణ్యాలు ఉన్నవారి సంఖ్య చాలా తక్కువగా ఉంది. అమెరికన్ యువత అంతా ఆర్టిఫిషియల్ ఇంటెలిజెన్స్ (AI), చిప్ డిజైన్ వంటి హై-ఎండ్ టెక్నాలజీ ఉద్యోగాలపై దృష్టి పెట్టడంతో, సంప్రదాయ చేతి వృత్తుల విద్యను నేర్చుకోవడం లేదు.

నైపుణ్య లోపమే ప్రధాన సమస్య

ఈ నైపుణ్యం ఎంత ముఖ్యమో ఫార్లీ ఒక ఉదాహరణతో వివరించారు: "ఫోర్డ్ సూపర్ డ్యూటీ ట్రక్ నుంచి డీజిల్ ఇంజిన్‌ను తీయడం అంత సులభం కాదు. ఆ పరిజ్ఞానం సంపాదించడానికి ఐదేళ్లు పడుతుంది" ప్రస్తుత అమెరికన్ యువతకు ఈ సాంకేతిక నైపుణ్యం తెలియడం లేదు. తమ తాతల కాలంలో దొరికిన విధంగా వృత్తి విద్య నేటి యువతకు దొరకడం లేదని ఫార్లీ పేర్కొన్నారు.

ఆర్థిక వ్యవస్థపై ప్రభావం, నిపుణుల సూచన

కార్మికుల కొరత కారణంగా ఫోర్డ్ వంటి పెద్ద కంపెనీల్లో కూడా అనేక కార్లు అసెంబ్లీ లైన్ల నుంచి బయటకు రాకుండా నిలిచిపోతున్నాయి. కొన్ని నగరాల్లో ఎలక్ట్రీషియన్లు, ప్లంబర్లకు సంవత్సరానికి 1.20 లక్షల డాలర్ల (దాదాపు కోటి రూపాయల) వరకు జీతం ఆఫర్ చేస్తున్నారు. ఒక ఆర్థిక వ్యవస్థ కేవలం సాఫ్ట్‌వేర్, ఏఐ అభివృద్ధిపైనే ఆధారపడకూడదని, మధ్యతరగతిని బలోపేతం చేయడానికి యువతకు మెకానిక్స్, ఎలక్ట్రీషియన్ వంటి చేతి వృత్తుల నైపుణ్యాలను నేర్పించడంపై దృష్టి పెట్టాలని విశ్లేషకులు సూచిస్తున్నారు.