పాఠశాలల్లో ఫోన్ నిషేధం.. విద్యార్థులతో పాటు టీచర్లు కూడా

ఆంధ్రప్రదేశ్ రాష్ట్ర ప్రభుత్వం పాఠశాలల్లో మొబైల్ ఫోన్ల వినియోగాన్ని నిషేధించింది. విద్యార్థులకే కాదు ఈ ఉత్తర్వులు తరగతి గదుల్లో ఉపాధ్యాయులు సైతం మొబైల్ ఫోన్ వినియోగించరాదని ఆర్డర్స్ పాస్ చేసింది ప్రభుత్వం.

తరగతి గదికి వెళ్లే ముందు ఉపాధ్యాయులు తమ మొబైల్‌ ఫోన్‌లను హెడ్‌మాస్టర్‌కు అందజేయాలని కోరింది. ఈ మేరకు ఏపీ రాష్ట్ర విద్యాశాఖ ఉత్తర్వులు జారీ చేసింది. యునెస్కో గ్లోబల్ ఎడ్యుకేషన్ మానిటరింగ్ రిపోర్ట్ ఆధారంగా ఈ ఉత్తర్వులు వచ్చినట్లు పేర్కొంది.

ఉపాధ్యాయ సంఘాలు, ఇతర వాటాదారులతో సంప్రదించిన తర్వాతే ఈ నిర్ణయం తీసుకున్నట్లు విద్యాశాఖ తెలిపింది. పాఠశాలల్లో నిబంధనలు ఉల్లంఘించిన వారిపై కఠిన చర్యలు తీసుకుంటామని ప్రభుత్వం ప్రకటించింది.

పాఠశాలల్లో నిబంధనలను కచ్చితంగా అమలు చేసేలా పాఠశాలల ప్రధానోపాధ్యాయులు, విద్యాశాఖ ఉన్నతాధికారులు చర్యలు తీసుకోవాలని విద్యాశాఖ సూచించింది.