TS : కేసీఆర్ లెక్కల్లో బీఆర్ఎస్కు వచ్చే సీట్లు ఇవే..
లోక్‌సభ ఎన్నికల్లో తమ పార్టీకి ఎన్ని సీట్లు వస్తాయన్నదానిపై గులాబీ బాస్ కేసీఆర్ నోరు విప్పారు. అసెంబ్లీ ఎన్నికల్లో ఓటమిని చూసిన బీఆర్ఎస్ లోక్ సభ ఎన్నికల్లో మాత్రం పుంజుకుంటుందని చెప్పారు. సార్వత్రిక ఎన్నికల్లో బీఆర్ఎస్కు 8 నుంచి 12 సీట్లు వస్తాయని చంద్రశేఖర్ రావు అంచనా వేశారు. తెలంగాణలో బీజేపీకి ఒకే ఒక్క సీట్ వస్తుందని అన్నారు.
తెలుగు వార్తా ఛానల్ కు ఇచ్చిన ఇంటర్వ్యూలో కేసీఆర్ తనదైన శైలిలో స్పందించారు. కాంగ్రెస్ నిర్లక్ష్యపూరితమైన, అమలు చేయని హామీల ఫలితంగా ప్రజల ఆగ్రహానికి గురికావాల్సి వస్తుందన్నారు కేసీఆర్. తెలంగాణ రాష్ట్రంలో ఎన్నికలు ఎప్పుడు జరిగినా BRS అధికారంలోకి వస్తుందని, మళ్లీ తాను ముఖ్యమంత్రి అవుతానని కేసీఆర్ విశ్వాసం వ్యక్తం చేశారు.
కాంగ్రెస్ ప్రభుత్వం పడిపోతుందని మీరు అంచనా వేస్తున్నారా అని అడిగిన ప్రశ్నకు, ఏమి జరగబోతోందో తాను ఊహించలేనప్పటికీ, లోక్‌సభ ఎన్నికల తర్వాత అది జరిగే అన్ని అవకాశాలు ఉన్నాయని అన్నారు. "లోక్ సభ ఎన్నికల తర్వాత, హిమాచల్ ప్రదేశ్‌లోని ప్రభుత్వాన్ని బీజేపీ కూల్చబోతోంది. అక్కడి కాంగ్రెస్ ప్రభుత్వాన్ని కూల్చివేశాక.. తెలంగాణ వంతు వస్తుంది, 'అని ఆయన అన్నారు. ప్రజాస్వామ్య వ్యక్తిగా, కాంగ్రెస్ ప్రభుత్వం తన ఐదేళ్ల పదవీకాలాన్ని పూర్తి చేయాలని కోరుకుంటున్నానని ఆయన అన్నారు. పరిస్థితులను బట్టి సంకీర్ణ ప్రభుత్వం ఏర్పాటుచేస్తామన్నారు కేసీఆర్.
