అయోధ్యలో రామమందిర భూమి పూజ కార్యక్రమానికి అన్ని ఏర్పాట్లు చేస్తున్నారు. కరోనా నేపథ్యంలో ఈ కార్యక్రమాన్ని చాలా నిరాడంబరంగా నిర్వహించేందుకు సన్నాహాలు చేస్తున్న సంగతి తెలిసిందే. ముందుగా 200 మంది ఆహ్వానితులతో ఈ కార్యక్రమాన్ని నిర్వహించాలని ప్లాన్ చేశారు. అయితే, తరువాత ఈ సంఖ్యను తగ్గించి 170కి ఆహ్వానాలు పంపించారు. అయితే, ఈ కార్యక్రమానికి బీజేపీ అగ్రనేతలు ఎల్.కె.అడ్వాణి, మురళీ మనోహర్ జోషి పరోక్షంగా హాజరయ్యే అవకాశం ఉందని పార్టీ వర్గాలు చెబుతున్నాయి. వయస్సు, ఆరోగ్య కారణాల రీత్యా ఈ ఇద్దరు అగ్రనేతలు వీడియో కాన్ఫరెన్స్ ద్వారా భూమిపూజలో పాల్గొంటారని ఆ వర్గాలు తెలిపాయి.
కాగా.. ఆగస్టు 5న జరగనున్న ఈ కార్యక్రమానికి ప్రధాని నరేంద్ర మోదీ హాజరు కానున్నారు. ఆయనతోపాటు పలు రాష్ట్రాల ముఖ్యమంత్రులు, పలువురు కేంద్ర మంత్రులు, ఆర్ఎస్ఎస్ చీఫ్ మోహన్ భగవత్, తదితరులు హాజరయ్యే అవకాశాలున్నాయి. ఆగస్టు 5వ తేదీన అయోధ్య దేదేప్యమానంగా వెలుగులీనేందుకు 1.25 లక్షల దీపాలు వెలిగించనున్నారు.