AP: ఈనెల 11 నుంచి ఏపీ బడ్జెట్ సమావేశాలు

ఏపీలో అసెంబ్లీ సమావేశాల నిర్వహణకు ప్రభుత్వం సిద్ధమైంది. ఈ నెల 11 నుంచి ఆంధ్రప్రదేశ్‌ అసెంబ్లీ సమావేశాలు మొదలు కాబోతున్నాయి. అదే రోజు పూర్తిస్థాయి బడ్జెట్ ప్రవేశపెట్టే అవకాశం ఉంది. ఆర్థిక పద్దుతో పాటు పలు కీలక బిల్లులు సభ ముందుకు వచ్చే అవకాశాలున్నాయి. ఈ నెల 11 నుంచి 10 రోజుల పాటు సమావేశాలు నిర్వహించేందుకు కూటమి ప్రభుత్వం కసరత్తు చేసింది. అసెంబ్లీ సమావేశాలు నిర్వహణకు ప్రభుత్వం అన్ని ఏర్పాట్లు చేసింది. ఇప్పటివరకు ఓటాన్ అకౌంట్ బడ్జెట్ నే ప్రవేశపెట్టిన సర్కార్.. ఇక పూర్తి స్థాయి బడ్జెట్ ప్రవేశపెట్టేందుకు రెడీ అయ్యింది. రాష్ట్ర ఆర్థిక పరిస్థితి దృష్ట్యా తప్పనిసరి పరిస్థితుల్లో ఓటాన్ అకౌంట్ బడ్జెట్‌కు వెళ్తున్నట్లు ప్రభుత్వం తెలిపింది. ఆర్థిక పరిస్థితిపై స్పష్టత వచ్చేందుకు గడువు తీసుకోవాల్సి వచ్చిందని పేర్కొంది.

కీల‌క బిల్లుల ఆమోదం..

బడ్జెట్ సమావేశాల్లో భాగంగా.. పూర్తి స్థాయి బడ్జెట్ ప్రవేశపెట్టబోతున్నారు. నవంబర్ 11వ తేదీన లేదా మరునాడు వార్షిక బడ్జెట్‌ను సభలో ప్రవేశపెట్టే అవకాశాలున్నాయి. ఈ సమావేశాల్లో పూర్తి స్థాయి బడ్జెట్ పెట్టడంతో పాటు కీలక బిల్లులు సభ ముందుకు వచ్చేందుకు అవకాశం ఉంది. ఓటాన్‌ అకౌంట్‌ బడ్జెట్‌ నవంబర్ నెలాఖరుతో ముగుస్తుంది. ఈ క్రమంలోనే పూర్తిస్థాయి బడ్జెట్ కు సర్కార్ సిద్ధమైంది. ఆర్థిక స్థితికి అనుగుణంగానే.. నిజానికి రాష్ట్ర చరిత్రలో తొలిసారిగా ఒకే ఏడాదిలో రెండు సార్లు ఓటాన్ అకౌంట్ బడ్జెట్ ప్రవేశపెట్టారు. 6న కేబినెట్ సమావేశం..అసెంబ్లీ సమావేశాల నిర్వహణ నేపథ్యంలో 6వ తేదీన ఏపీ కేబినెట్ భేటీ కాబోతుంది. సీఎం చంద్రబాబు అధ్యక్షతన మంత్రులు స‌మావేశం కానున్నారు. ఈ సమావేశంలో పలు అంశాలపై చర్చించి తుది నిర్ణయం తీసుకోనున్నారు. సమావేశాల నిర్వహణతో పాటు బడ్జెట్ పై లోతుగా చర్చించే అవకాశాలున్నాయి. అంతేకాకుండా.. సభ ముందుకు తీసుకురావాల్సిన అంశాలపై కూడా చర్చ జ‌ర‌గ‌నున్నట్టు తెలుస్తోంది.

అసెంబ్లీ సమావేశాలకు వస్తే కొత్త ప్రభుత్వం ఏర్పడిన తర్వాత రెండుసార్లు అసెంబ్లీ సమావేశాలు జరిగాయి. జూన్‌లో కొత్త ఎమ్మెల్యేల ప్రమాణస్వీకారం కోసం.. ఆ తర్వాత జులై చివరి వారంలో ఐదు రోజుల పాటు నిర్వహించారు. ఈ సమావేశంలోనే మూడు నెలల కాలపరిమితికి ఓటాన్ అకౌంట్ పద్దును ప్రభుత్వం తీసుకొచ్చిన విషయం తెలిసిందే.