AP: కేసులు, నోటీసులు, విమర్శలతో వైసీపీ ఉక్కిరి బిక్కిరి
ఏపీలో వైసీపీ నేతలకు వరుస షాకులు... తాజాగా మరో ఇద్దరు నేతలపై కేసులు...రజనీ, బ్రహ్మనాయుడిపై పోలీస్ కేసులు
ఆంధ్రప్రదేశ్ రాజకీయ వాతావరణం మరింత ఉద్రిక్తంగా మారుతోంది. అధికార, విపక్ష పార్టీల మధ్య మాటల యుద్ధం, పరస్పర ఆరోపణలు, కేసులు–నోటీసులతో రాజకీయ వేడి తారాస్థాయికి చేరుతోంది. ఈ నేపథ్యంలో ప్రతిపక్ష వైఎస్సార్ కాంగ్రెస్ పార్టీకి చెందిన పలువురు కీలక నేతలు పోలీసు చర్యలతో ఎదురుదెబ్బలు తగులుతున్నాయి. వరుసగా కేసులు నమోదు కావడం, నోటీసులు అందుకోవడం రాష్ట్ర రాజకీయాల్లో హాట్టాపిక్గా మారింది. ఇటీవల తిరుమల లడ్డూ కల్తీ వ్యవహారం రాజకీయ రంగును సంతరించుకోవడంతో అధికార పార్టీ, విపక్షాల మధ్య తీవ్ర వాగ్వాదం మొదలైంది. ఈ అంశం చుట్టూ జరిగిన పరిణామాలు ఏపీ రాజకీయాలను పూర్తిగా వేడెక్కించాయి. పరస్పర విమర్శలు తీవ్రస్థాయికి చేరడంతో పాటు, కొన్ని చోట్ల ఉద్రిక్త ఘటనలు కూడా చోటు చేసుకున్నాయి. ఈ క్రమంలోనే వైసీపీ నేతలపై పోలీసు చర్యలు వరుసగా కొనసాగుతున్నట్లు కనిపిస్తోంది.
మాజీ మంత్రులు, ఎమ్మెల్యేలు
ఇప్పటికే పలువురు మాజీ మంత్రులు, పార్టీ నేతలపై కేసులు నమోదైన నేపథ్యంలో తాజాగా మరో ముగ్గురు ప్రముఖ వైసీపీ నేతలు పోలీసు చర్యల పరిధిలోకి వచ్చారు. మాజీ మంత్రి విడదల రజిని, వినుకొండ మాజీ ఎమ్మెల్యే బొల్లా బ్రహ్మనాయుడు మీద కేసులు నమోదుకాగా, మరో మాజీ మంత్రి కాకాణి గోవర్ధన్ రెడ్డికి పోలీసులు నోటీసులు జారీ చేశారు. ఈ పరిణామాలతో ప్రతిపక్ష వైసీపీలో ఆందోళన వాతావరణం నెలకొంది. గుంటూరు జిల్లా పరిధిలో చోటుచేసుకున్న ఒక రాజకీయ ఘర్షణ నేపథ్యంలో మాజీ మంత్రి విడదల రజినిపై కేసు నమోదైంది. గత నెలాఖరులో విడదల రజిని అనుచరులు, తెలుగుదేశం పార్టీ నేతల మధ్య వాగ్వాదం చోటుచేసుకుంది. ఈ ఘటన క్రమంగా ఉద్రిక్తతకు దారి తీసినట్లు సమాచారం. ఈ నేపథ్యంలో టీడీపీ నేతలు పోలీసులకు ఫిర్యాదు చేశారు. ఫిర్యాదును స్వీకరించిన పోలీసులు దర్యాప్తు చేపట్టి, విడదల రజినితో పాటు పలువురు వైసీపీ నేతలపై కేసులు నమోదు చేశారు. మొత్తం ఇరవై మందికి పైగా పార్టీ కార్యకర్తలు, నేతలు ఈ కేసుల్లో నిందితులుగా ఉన్నట్లు తెలుస్తోంది. ఈ ఘటనపై వైసీపీ నేతలు స్పందిస్తూ, రాజకీయ కక్షతోనే కేసులు నమోదు చేస్తున్నారని ఆరోపిస్తున్నారు. స్థానిక రాజకీయాల్లో ఆధిపత్య పోరాటమే ఈ ఘటనకు కారణమని వారు అంటున్నారు. అయితే పోలీసులు మాత్రం ఫిర్యాదుల ఆధారంగానే చట్టపరమైన చర్యలు తీసుకున్నామని స్పష్టం చేస్తున్నారు. అయితే దీనిని వైసీపీ తప్పుపడుతోంది.
మరోవైపు నెల్లూరు జిల్లాలో వైసీపీకి చెందిన సీనియర్ నేత, మాజీ మంత్రి కాకాణి గోవర్ధన్ రెడ్డికి పోలీసులు నోటీసులు అందించారు. ముఖ్యమంత్రి చంద్రబాబు నాయుడు, అలాగే ఓ ఎమ్మెల్యేపై అనుచిత వ్యాఖ్యలు చేశారన్న ఆరోపణలతో ఆయనపై కేసులు నమోదైనట్లు సమాచారం. ఈ కేసుల నేపథ్యంలో విచారణకు హాజరుకావాలంటూ పోలీసులు నోటీసులు జారీ చేశారు. నేరుగా ఆయన నివాసానికి వెళ్లి నోటీసులు అందజేయడం రాజకీయంగా ప్రాధాన్యం సంతరించుకుంది. ఈ వ్యవహారంపై వైసీపీ వర్గాలు తీవ్రంగా స్పందిస్తున్నాయి. రాజకీయ విమర్శలను కూడా నేరంగా పరిగణిస్తూ కేసులు నమోదు చేయడం ప్రజాస్వామ్యానికి విరుద్ధమని పార్టీ నేతలు అంటున్నారు. మరోవైపు అధికార పార్టీ నేతలు మాత్రం చట్టాన్ని ఉల్లంఘించిన వారిపై చర్యలు తప్పవని వ్యాఖ్యానిస్తున్నారు.
ఇక గుంటూరు జిల్లా వినుకొండలో చోటుచేసుకున్న మరో ఘటన రాజకీయంగా చర్చనీయాంశమైంది. వినుకొండ మాజీ ఎమ్మెల్యే బొల్లా బ్రహ్మనాయుడుపై పోలీసులు కేసు నమోదు చేశారు. ఆలయ దర్శనానికి వెళ్లిన సందర్భంగా జరిగిన గందరగోళం ఈ కేసుకు కారణమైంది. ఆలయంలో ప్రత్యేక పూజల సందర్భంగా తోపులాట జరగడంతో ఓ పోలీసు కానిస్టేబుల్ గాయపడినట్లు ఫిర్యాదు అందింది. ఈ ఫిర్యాదు ఆధారంగా బొల్లా బ్రహ్మనాయుడుతో పాటు పలువురు వైసీపీ నేతలపై కేసులు నమోదు చేసినట్లు సమాచారం. ఈ ఘటనపై కూడా వైసీపీ నేతలు అభ్యంతరం వ్యక్తం చేస్తున్నారు. ఆలయ దర్శన సమయంలో జరిగిన సాధారణ గందరగోళాన్ని అతిశయపరుస్తూ కేసులు బనాయించారని ఆరోపిస్తున్నారు. పోలీసు చర్యల వెనుక రాజకీయ ఒత్తిళ్లు ఉన్నాయని వారు విమర్శిస్తున్నారు. అయితే పోలీసులు మాత్రం విధి నిర్వహణలో ఉన్న సిబ్బందిపై దాడి జరిగిందన్న ఫిర్యాదు మేరకే కేసు నమోదు చేశామని స్పష్టం చేస్తున్నారు. ఇప్పటికే మాజీ మంత్రులు అంబటి రాంబాబు, జోగి రమేష్లపై నమోదైన కేసులు రాజకీయంగా పెద్ద చర్చకు దారితీశాయి.