LOKESH: లోకేశ్ దాతృత్వంతో పునర్వికకు పునర్జన్మ
నెట్టింట మంత్రి నారా లోకేశ్పై ప్రశంసల జల్లు
మనసుంటే మార్గం ఉంటుందనే మాటకు ‘#SavePunarvika’ ఉద్యమం నిలువెత్తు ఉదాహరణగా నిలిచింది. 11 నెలల చిన్నారి పునర్విక ప్రాణాలను కాపాడేందుకు సోషల్ మీడియా వేదికగా ప్రారంభమైన ఫండ్ రైజింగ్ మహాయజ్ఞం అద్భుత విజయాన్ని సాధించింది. రూ.16 కోట్ల విలువైన ప్రాణరక్షక ఇంజెక్షన్ అవసరమైన ఈ చిన్నారి కోసం వేలాదిమంది ముందుకు వచ్చి విరాళాలు అందించారు. ఇన్ఫ్లుయెన్సర్ అనే పదానికి అసలైన అర్థం ఏమిటో చాటి చెప్పిన ఈ ఉద్యమం సమాజంలోని దాతృత్వ హృదయాలను ఒకే తాటిపైకి తీసుకొచ్చింది. పునర్విక అరుదైన వ్యాధితో బాధపడుతోంది. ఆమెకు బతికే అవకాశముండాలంటే రూ.16 కోట్ల విలువైన ప్రత్యేక ఇంజెక్షన్ అవసరం. సాధారణ కుటుంబానికి ఆ మొత్తాన్ని సమకూర్చడం అసాధ్యమే. దీంతో చిన్నారి తండ్రి సురేష్ సోషల్ మీడియాలో వీడియో విడుదల చేసి సహాయం కోరారు. తమకు ఇప్పటికే దాతలు అందించిన విరాళాలు, కేంద్ర ప్రభుత్వం మంజూరు చేసిన రూ.50 లక్షల సహాయంతో కలిపి రూ.10 కోట్లు సమకూరాయని, ఇంకా రూ.6 కోట్లు అవసరమని ఆయన ఆవేదన వ్యక్తం చేశారు. అంత పెద్ద మొత్తాన్ని భరించే స్థోమత తమకు లేదని, ప్రభుత్వ సహాయం కావాలని వేడుకున్నారు.
స్పందించిన నారా లోకేశ్
ఈ ఘటనపై ఆంధ్రప్రదేశ్ మంత్రి నారా లోకేష్ స్పందించారు. వేలాదిమంది ప్రజలు కలిసి రూ.10 కోట్లు సమకూర్చడం తనను ఎంతో కదిలించిందని ఆయన పేర్కొన్నారు. చిన్నారి జీవితాన్ని మార్చే ఈ ఇంజెక్షన్ కోసం ప్రజలు చూపిన దాతృత్వం గొప్పదని ప్రశంసించారు. సమాజంలో ఇంకా మానవత్వం బతికే ఉందని, ఇలాంటి సందర్భాల్లో ప్రజలు ఏకమవడం గర్వకారణమని అన్నారు. కేంద్ర ప్రభుత్వం ఇప్పటికే రూ.50 లక్షల సహాయం మంజూరు చేయడం కూడా కుటుంబానికి ఊరటనిచ్చింది. అయితే ఇంకా అవసరమైన రూ.6 కోట్లు సమకూర్చాల్సి ఉంది. సోషల్ మీడియా వేదికగా మొదలైన ఈ ఉద్యమం మరింత వేగం పుంజుకుని లక్ష్యాన్ని చేరుకునే దిశగా సాగుతోంది. #SavePunarvika హ్యాష్ట్యాగ్ దేశవ్యాప్తంగా ట్రెండ్ అవుతూ మరింత మంది దాతలను ఆకర్షిస్తోంది. ఈ సంఘటన సోషల్ మీడియా శక్తిని మరోసారి నిరూపించింది. సరైన ఉద్దేశంతో ఉపయోగిస్తే సామాజిక మాధ్యమాలు ఎంతటి మార్పు తీసుకురాగలవో ఇది స్పష్టం చేసింది. ఇన్ఫ్లుయెన్సర్లు కేవలం వినోదం లేదా ప్రచారం కోసమే కాకుండా సమాజానికి ఉపయోగపడే కార్యక్రమాల్లోనూ కీలక పాత్ర పోషించగలరని చూపించారు. పునర్విక కోసం సాగుతున్న ఈ పోరాటం కేవలం ఒక చిన్నారి ప్రాణాల కోసం మాత్రమే కాదు సమాజంలోని మానవత్వానికి ప్రతీకగా నిలుస్తోంది. చిన్నారి పునర్విక త్వరగా పూర్తిస్థాయి చికిత్స పొందుతూ ఆరోగ్యంగా కోలుకోవాలని అందరూ కోరుకుంటున్నారు.