Pawan Kalyan Responds : ఉప రాష్ట్రపతి రాజీనామా పై స్పందించిన పవన్ కళ్యాణ్

భారత ఉప రాష్ట్రపతి జగదీప్ ధన్‌ఖడ్ తన పదవికి రాజీనామా చేసిన సంగతి తెలిసిందే. ఆరోగ్యం సహకరించనందునే తాను ఈ నిర్ణయం తీసుకున్నట్లు త‌న‌ రాజీనామా లేఖలో పేర్కొన్నారు. కాగా ఈ రాజీనామాపై స్పందించారు ఏపీ డిప్యూటీ సీఎం పవన్ కళ్యాణ్.ఈ మేరకు తన ఎక్స్ ఖాతాలో పోస్ట్ చేసిన ఆయన జగదీప్ ధన్ఖడ్ సేవలను గుర్తు చేసుకున్నారు.

రాజ్యాంగవిలువ‌ల‌ను కాపాడుతూ నిష్పాక్షిక‌త, నిబ‌ద్ధ‌త‌తో బాధ్య‌త‌లు నిర్వహించారని.. భారత్‌కు అంకితభావంతో విలువైన సేవ చేసినందుకు మీకు ధన్యవాదాలు అని తెలిపారు. మీ పదవీకాలం అంతా ఉపరాష్ట్రపతి పదవి గౌరవాన్ని అచంచలమైన నిబద్ధతతో నిలబెట్టారు. రాజ్యాంగ విలువలను కాపాడారు. దయ, నిష్పాక్షికత, సమగ్రతతో మీరు బాధ్య‌త‌లు నిర్వహించారు. రాజకీయ ఒత్తిడి లేకుండా మీ నిర్భయమైన అభిప్రాయాల వ్యక్తీకరణ ప్రజా జీవితానికి ఒక ఉన్నత ప్రమాణాన్ని నిర్దేశించింది. గౌరవనీయమైన పాత్ర నుంచి వైదొలగుతున్న మీకు మంచి ఆరోగ్యం, ఆనందం, ప్రశాంతమైన జీవ‌నం ఉండాలని హృదయపూర్వక శుభాకాంక్షలు తెలియజేస్తున్నాను" అని ప‌వ‌న్ త‌న పోస్టులో రాసుకొచ్చారు.

కాగా, జగదీప్ ధన్‌ఖడ్ 2022 ఆగస్టు 11 న భారత ఉపరాష్ట్రపతిగా బాధ్యతలు చేపట్టారు . రాజ్యసభ ఛైర్మన్‌గా సేవలు అందించిన ఆయన ..2019 నుంచి 2022 వరకు పశ్చిమ బెంగాల్ గవర్నర్‌గా కూడా పనిచేశారు. తన రాజీనామాకు ముందు జరిగిన పార్లమెంటు వర్షాకాల సమావేశాలకు రాజ్యసభ ఛైర్మన్‌గా అధ్యక్షత వహించారు. ఈ సందర్భంగా రాజకీయ విభేదాలను పక్కనపెట్టి, ఆరోగ్యకరమైన చర్చలు జరపాలని ఆయన రాజకీయ పక్షాలను కోరారు.