Vehicle Sales : జీఎస్టీ 2.0, పండుగ సీజన్ ఎఫెక్ట్.. సెప్టెంబర్‌లో ఏకంగా ఎన్ని లక్షల వెహికల్స్ అమ్ముడయ్యాయంటే.

Vehicle Sales : సెప్టెంబర్ భారత ఆటోమొబైల్ రంగంలో మరచిపోలేని నెలగా నిలిచిపోయింది. జీఎస్టీ 2.0 తర్వాత పండుగ సీజన్‌కు ముందు డీలర్‌షిప్‌లలో పెరిగిన ఉత్సాహం, రిటైల్ మార్కెట్‌లో కొనుగోళ్లు పెరగడం ఈ ఇండస్ట్రీకి కొత్త శక్తిని ఇచ్చాయి. ఈ నెలలో పట్టణ ప్రాంతాల్లో బలమైన డిమాండ్‌తో పాటు గ్రామీణ మార్కెట్‌లోనూ మెరుగుదల కనిపించింది. నెల చివరి నాటికి ఈ రంగం 3.12 లక్షల ప్యాసింజర్ వాహనాలు, 21.6 లక్షలకు పైగా టూ-వీలర్లు, 84,077 త్రీ-వీలర్ల సరఫరాను నమోదు చేసింది. మొత్తం మీద సెప్టెంబర్ నెల పండుగ త్రైమాసిక ప్రారంభానికి మంచి ఓపెనింగ్ అందించింది.

ప్యాసింజర్ వెహికల్ సెగ్మెంట్ మొత్తం 3,12,791 యూనిట్ల అమ్మకాలను నమోదు చేసింది. ఇది సంవత్సరానికి స్వల్పంగా తక్కువగా ఉన్నప్పటికీ, త్రైమాసికం ప్రారంభంలో ఉన్న మందగమనం తర్వాత మార్కెట్ పుంజుకోవడానికి సంకేతం. గత మూడేళ్లుగా మార్కెట్‌లో దూసుకుపోతున్న ఎస్‌యూవీ సెగ్మెంట్ 2,04,392 యూనిట్ల అమ్మకాలను నమోదు చేసింది. ఇది స్వదేశీ మార్కెట్‌లో కేవలం 0.9 శాతం మాత్రమే స్వల్ప క్షీణతను సూచిస్తోంది.

ఈ నెలలో చిన్న కార్ల అమ్మకాలు జోరుగా జరిగాయి.. జీఎస్టీకి సంబంధించిన ధరల సర్దుబాట్ల కారణంగా ఈ చిన్న కార్ల అమ్మకాలు పెరిగాయి. ప్యాసింజర్ కార్ల అమ్మకాలు 98,364 యూనిట్ల వద్ద స్థిరంగా ఉన్నా, డీలర్లు ఎంట్రీ-లెవల్ మోడళ్లకు ఎంక్వైరీలు బాగా పెరిగాయని నివేదించారు. ఇది చాలా నెలల తర్వాత ఇండస్ట్రీ చూసిన సానుకూల సంకేతం. అయితే, ఫ్లీట్ ఆపరేటర్లు కాంపాక్ట్ యూవీ-బేస్డ్ ప్యాసింజర్ వెహికల్స్ కు ప్రాధాన్యత ఇవ్వడం కొనసాగించడంతో వ్యాన్‌ల అమ్మకాలు 15.7 శాతం తగ్గి 10,035 యూనిట్లకు చేరుకున్నాయి.

టూ-వీలర్ తయారీదారులకు గుడ్ న్యూస్ ఏంటంటే.. ఈ విభాగంలో అమ్మకాలు 6.7 శాతం పెరిగి 21,60,889 యూనిట్లకు చేరుకున్నాయి. దీనికి ప్రధాన కారణం పట్టణ, సెమీ-అర్బన్ ప్రాంతాలలో స్కూటర్లకు పెరిగిన డిమాండ్. స్కూటర్ల అమ్మకాలు 9.1 శాతం పెరిగి 7,33,391 యూనిట్లకు చేరుకున్నాయి. ఇది పట్టణ ప్రయాణికులు, మార్కెట్‌కు తిరిగి వచ్చిన కొత్త కొనుగోలుదారుల మధ్య వాటి పెరుగుతున్న ప్రజాదరణను చూపుతుంది. గ్రామీణ ప్రాంతాల్లో నిరంతర డిమాండ్‌తో మోటార్‌సైకిళ్ల అమ్మకాలు 5.8 శాతం పెరిగి 13,73,750 యూనిట్ల వద్ద స్థిరంగా ఉన్నాయి. ప్రస్తుతం పండుగ వాతావరణం, జీఎస్టీ తగ్గింపు తర్వాత పెరిగిన కొనుగోలు శక్తి డీలర్‌షిప్‌లకు మరింత బలాన్ని ఇచ్చాయి.