Bajaj Pulsar N160: బడ్జెట్ ధరలో డ్యూయల్ ఏబీఎస్ బైక్..లీటరు పెట్రోల్‌తో 60కిమీ ప్రయాణం.

Bajaj Pulsar N160: బైక్ నడిపేటప్పుడు సేఫ్టీ అనేది చాలా ముఖ్యం. ముఖ్యంగా వర్షాకాలంలో లేదా ఇసుక రోడ్ల మీద బ్రేక్ వేసినప్పుడు బైక్ స్కిడ్ అవ్వకుండా ఉండాలంటే డ్యూయల్ ఛానల్ ఏబీఎస్ ఉండాల్సిందే. సాధారణంగా ఈ ఫీచర్ ఖరీదైన బైక్‌లలో ఉంటుంది, కానీ బజాజ్ పల్సర్ N160 ద్వారా దీనిని సామాన్యులకు కూడా అందుబాటులోకి తెచ్చింది. రూ.1.50 లక్షల లోపు ధరలో ఈ ఫీచర్ ఇస్తున్న ఏకైక బైక్ ఇదే కావడం విశేషం.

ఈ బైక్‌లో 164.82cc సింగిల్ సిలిండర్ ఆయిల్ కూల్డ్ ఇంజన్ ఉంటుంది. ఇది 16PS పవర్, 14.65 Nm టార్క్‌ను ఉత్పత్తి చేస్తుంది. దీనివల్ల బైక్ రైడింగ్ చాలా స్మూత్‌గా ఉంటుంది. ఇక మైలేజీ విషయానికి వస్తే, బజాజ్ కంపెనీ క్లెయిమ్ ప్రకారం ఈ బైక్ లీటరు పెట్రోల్‌కు 60 కిలోమీటర్ల మైలేజీని ఇస్తుంది. అయితే సిటీ ట్రాఫిక్, రోడ్డు పరిస్థితులను బట్టి ఇది 45-55 కి.మీ మధ్యలో ఉండవచ్చు. ఈ సెగ్మెంట్లో ఇంత మైలేజీ ఇచ్చే బైక్‌లు చాలా తక్కువ.

బజాజ్ పల్సర్ N160 బేస్ వేరియంట్ ధర సుమారు రూ.1,13,835 (ఎక్స్-షోరూమ్) నుంచి ప్రారంభమవుతుంది. కానీ మనకు కావాల్సిన డ్యూయల్ ఛానల్ ఏబీఎస్ వేరియంట్ ధర రూ.1,16,773 (ఎక్స్-షోరూమ్) గా ఉంది. ఒకవేళ మీకు యూఎస్‌డీ ఫోర్క్స్ ఉన్న టాప్ మోడల్ కావాలంటే దాని ధర రూ.1,26,290 వరకు ఉంటుంది. అన్ని ట్యాక్స్‌లు కలిపి రూ.1.45 లక్షల నుంచి రూ.1.55 లక్షల లోపు ఆన్-రోడ్ ధరకు వచ్చేస్తుంది. ఇది హీరో ఎక్స్‌ట్రీమ్ 160R 4V, టీవీఎస్ అపాచీ RTR 160 4V వంటి బైక్‌లకు గట్టి పోటీ ఇస్తోంది.

కేవలం బ్రేకింగ్ మాత్రమే కాదు, ఈ బైక్‌లో మరిన్ని స్మార్ట్ ఫీచర్లు ఉన్నాయి. ఇందులో మూడు రైడింగ్ మోడ్స్ (రెయిన్, రోడ్, ఆఫ్-రోడ్) ఉన్నాయి. వాతావరణం, రోడ్డును బట్టి మీరు బ్రేకింగ్ సిస్టమ్‌ను మార్చుకోవచ్చు. దీనితో పాటు బ్లూటూత్ కనెక్టివిటీ ఉన్న డిజిటల్ కన్సోల్ ఉంది. దీని ద్వారా మీ ఫోన్‌కు వచ్చే కాల్స్, మెసేజ్ అలర్ట్స్, టర్న్-బై-టర్న్ నావిగేషన్ వంటివి బైక్ స్క్రీన్ మీదే చూసుకోవచ్చు. స్టైలిష్ ఎల్‌ఈడీ ప్రొజెక్టర్ హెడ్ లాంప్స్ ఈ బైక్‌కు మంచి స్పోర్టీ లుక్ ఇస్తాయి.